Li Jesuse mu xkoʼolaj kʼuchaʼal li krixchanoetike, yuʼun jaʼ toʼox jun kuxlejal ti mu xvinaj ta kʼelel ta vinajel kʼalal skʼan toʼox xtal ayanuk ta balumile (Juan 8:23). Jaʼ li baʼyel spasben Jeovae xchiʼuk la skolta Dios ta spasel skotol li kʼusitik oye. Li Vivliae chal ti jaʼ «li jun noʼox nichʼonile», yuʼun jaʼ noʼox stuk laj yichʼ pasel yuʼun Dios (Juan 1:14). Jech xtok, ta xichʼ albel skʼoplal ti jaʼ «li Kʼope», yuʼun li Diose la stunes ta yajkʼopojel. Kʼelo Proverbios 8:22, 23, 30; Kolosenses 1:15, 16.

Li Diose la stak tal ta balumil Xnichʼon. Jaʼ yuʼun, la sjelubtasbe xkuxlejal ta yalajeb Maria ti jaʼ jun tojol tsebe xchiʼuk ti jaʼ judae. Jech oxal, maʼuk jun krixchano li stot Jesuse (Lukas 1:30-35). Kʼalal tal ta balumile, oy oxtos ti kʼusi ay spase: 1) laj yakʼ ta chanel li kʼusitik melel ta sventa Diose, 2) laj yakʼ kiltik kʼuxi ta pasel li kʼusi tskʼan yoʼonton Dios akʼo mi oy vokolile xchiʼuk 3) ay yakʼ stukʼil ‹kuxlejal kʼuchaʼal pojelal›. Kʼelo Mateo 20:28.

Li jun pojelale jaʼ li stojol chichʼ tojel sventa mu xichʼ milel jun krixchanoe (Eksodo 21:29, 30). Li Diose maʼuk ox jech tskʼan ti chijcham xchiʼuk chijmalube. ¿Kʼuxi jnaʼojtik taje? Yuʼun li Jeovae laj onoʼox yalbe Adan ti ta xcham mi la saʼ smule, jaʼ xkaltik, mi muʼyuk la xchʼun mantale. Jaʼ yuʼun, ti muʼyukuk la saʼ smule, muʼyuk bu cham ti jechuke (Jenesis 2:16, 17; 5:5). Li Vivliae chal ti jaʼ ta skoj Adan «och talel» li lajelal ta balumile. Jaʼ xkaltik, li Adane la sjelubtasbe mulil li snitilultake, jech oxal chchamik. Ta skoj taje, skʼan oy buchʼu spojutik. Kʼelo Romanos 5:12; 6:23.

 Vaʼun chaʼa, ¿buchʼu xuʼ spojutik xchiʼuk skoltautik li ta lajelale? Kʼalal chijchame, jaʼ stojol chkʼot li jmultike. Ta skoj ti jpasmulilutike, mu xtojbe kuʼuntik smul li yantike. Kʼelo Salmo 49:7-9.

Li Jesuse jelel kʼuchaʼal li voʼotike, yuʼun li stuke tukʼil vinik echʼ xchiʼuk muʼyuk bu la spas smul mi junuk velta. Jaʼ yuʼun, maʼuk ta skoj smul cham, jaʼ sventa tstojbe smul li yantike. Kʼalal la stak tal Xnichʼon Dios sventa tal chamuk ta jtojolaltike, laj yakʼ ta ilel ti skʼanoj tajek li krixchanoetike. Li Jesus eke laj yakʼ ta ilel ti skʼanojutike, yuʼun la xchʼunbe smantal li Stote xchiʼuk laj yakʼ xkuxlejal sventa tspojutik li ta mulil xchiʼuk lajelale. Kʼelo Juan 3:16; Romanos 5:18, 19.

Kʼelo li video ¿Kʼu yuʼun cham li Jesuse?

Kʼalal ay ta balumil li Jesuse, la xpoxta jchameletik, la xchaʼkuxes animaetik xchiʼuk la skolta li buchʼutik oy svokolike, jaʼ jech laj yakʼ ta ilel li kʼusi tspas ta jelavel ta stojolal li tukʼil yajtuneltak Diose (Mateo 15:30, 31; Juan 5:28). Kʼalal cham li Jesuse, li Diose la xchaʼkuxes xchiʼuk laj yakʼbe yan velta xkuxlejal ti mu xvinaj ta kʼelel ta vinajele (1 Pedro 3:18). Vaʼun, li Jesuse la smala ta sbatsʼikʼob Stot jaʼ to kʼalal akʼbat yabtel sventa tsventain li balumile (Ebreos 10:12, 13). Li avie, li Jesuse te ch-ajvalilaj ta vinajel, taje jaʼ jun lekil aʼyej ti yakal chalik ta spʼejel balumil li yajtsʼaklomtake. Kʼelo Daniel 7:13, 14; Mateo 24:14.

Li Ajvalil ti biiltasbil yuʼun Diose poʼot xa stunes sjuʼel sventa slajes li chopol krixchanoetike xchiʼuk li vokolil yakal chakʼike. Skotol li buchʼutik oy xchʼunel yoʼontonik ta stojolal Jesuse xchiʼuk ti chchʼunbeik smantale jun yoʼonton chkuxiik liʼ ta balumil ti chkʼataj ta jun paraisoe. Kʼelo Salmo 37:9-11.