XCHANOBIL 7
¿Kʼusi jaʼ li Ajvalilal yuʼun Diose?
1. ¿Kʼusi jaʼ li Ajvalilal yuʼun Diose?
¿Kʼu yuʼun jaʼ jun lekil Ajvalil li Jesuse? (MARKOS 1:40-42)
Jaʼ jun ajvalilal te ta vinajel ti poʼot xa xkom ta xkʼexol skotol li ajvaliletik liʼ ta balumile xchiʼuk jaʼ chakʼ kʼotuk ta pasel li kʼusi tskʼan yoʼonton Dios liʼ ta balumil jech kʼuchaʼal ta vinajele. Li Ajvalilal yuʼun Dios ti jaʼ li ajvalil chtun yuʼun li krixchanoetike jaʼ chakʼ ti jmoj xkuxiik li jnaklejetik liʼ ta balumile. ¿Mi mu jechuk ti jaʼ lekil aʼyejetik taje? Kʼelo Daniel 2:44; Mateo 6:9, 10; 24:14.
Ta jun ajvalilale skʼan oy buchʼu xbeiltasvan, li Jeova Diose sbiiltasoj Xnichʼon ta Ajvalil li ta Ajvalilal yuʼune. Kʼelo Apokalipsis 11:15.
Kʼelo li video ¿Kʼusi jaʼ li Ajvalilal yuʼun Diose?
2. ¿Kʼu yuʼun jaʼ noʼox stuk lekil Ajvalil li Jesuse?
Li Xnichʼon Diose jaʼ noʼox stuk mas lekil Ajvalil, yuʼun lek yoʼonton xchiʼuk tukʼ kʼusitik tspas (Mateo 11:28-30). Jech xtok, jaʼ noʼox stuk oy sjuʼel sventa tskolta li krixchanoetike, vaʼun tstunes li sjuʼel mi lik sventain li balumile. Kʼalal chaʼkuxesate, muy batel ta vinajel, te la smala yabtel ta sbatsʼikʼob Dios sventa ch-ajvalilaj (Ebreos 10:12, 13). Vaʼun, li Diose laj yakʼbe yabtel sventa xlik ajvalilajuk. Kʼelo Daniel 7:13, 14.
3. ¿Mi oy xchiʼiltak ta ajvalilal li Jesuse?
Li Vivliae chal ti oy jtsop yajtuneltak Dios ti ch-ajvalilajik xchiʼuk li Jesuse. Li ta Daniel 7:27 chal ti «chʼul kʼotemik» li buchʼutik taje. Li buchʼutik baʼyel la stʼuj Diose jaʼ li yajtakboltak Jesuse. Li Jeovae yakal-o tstʼuj viniketik xchiʼuk antsetik ti oy lek xchʼunel yoʼontonik sventa chʼul xkʼotike. Mi laj yichʼik chaʼkuxesel li krixchanoetik taje, chbatik ta vinajel sventa xichʼ sbekʼtalik ti mu xvinaj ta kʼelel jech kʼuchaʼal li Jesuse. Kʼelo Juan 14:1-3; 1 Korintios 15:42-44.
¿Jayvoʼ chbatik ta vinajel? Li Vivliae chal ti jaʼ noʼox uni jtsope, li Jesuse la sbiiltas «uni jtsop chij» (Lukas 12:32). Ti kʼu yepal chbatik ta vinajel ti jmoj ch-ajvalilajik tal xchiʼuk li Jesuse jaʼ 144 mil. Kʼelo Apokalipsis 14:1.
4. ¿Kʼusi kʼot ta pasel kʼalal och ta Ajvalil li Jesuse?
Li kʼusi baʼyel la spas Jesus kʼalal och ta ajvalil ta 1914 jaʼ ti la sjip tal ta balumil li Satanas xchiʼuk li spukujtake. * Ta skoj ti oy tajek skʼakʼal yoʼonton li Satanase, lik yakʼ vokolil ta spʼejel balumil (Apokalipsis 12:7-10, 12). Jaʼ yuʼun, li xkuxlejal krixchanoetike yantik sok batel. Li paskʼope, li nikele, li chamele xchiʼuk li viʼnale jaʼ albil kʼopetik ti chakʼ ta ilel ti poʼot xa tspas mantal ta balumil li Ajvalilal yuʼun Diose. Kʼelo Lukas 21:7, 10, 11, 31.
5. ¿Kʼusi tspas avi xchiʼuk ta jelavel li Ajvalilal yuʼun Diose?
Li Ajvalilal yuʼun Diose yakal tstsob «epal krixchanoetik» ta spʼejel balumil ta skoj ti chichʼ cholel mantale. Ta smiyonal noʼox krixchanoetik ti oy ta yoʼontonik xchʼunel mantale kʼotemik ta yajtsʼaklom Jesus. Li krixchanoetik taje kuxul chkomik mi la slajes chopol balumil li Ajvalilal yuʼun Diose. Jaʼ yuʼun, mi ta jkʼan ta jtabetik sbalil li kʼusi tspas li Ajvalilal yuʼun Diose, skʼan jchʼunbetik smantal li Jesuse. Kʼelo Apokalipsis 7:9, 14, 16, 17.
Li ta jmil jabile, li Ajvalilal yuʼun Diose ta xkʼot ta pasel yuʼun skotol li kʼusi onoʼox tskʼan tspas Jeova ta stojolal li krixchanoetike. Li balumile chkʼataj ta jun paraiso. Mi laj li jmil jabile, li Jesuse chakʼbe ta skʼob Stot li Ajvalilale (1 Korintios 15:24-26). ¿Mi oy ta avoʼonton chakʼan chavalbe yantik ta sventa li Ajvalilal taje? Kʼelo Salmo 37:10, 11, 29.
^ par. 6 Mi chakʼanbe to mas yaʼyejal li albil kʼop ta Vivlia sventa li kʼusi kʼot ta pasel ta 1914, kʼelo nota 21 ta pajina 216 kʼalal ta 219 ta livro ¿Kʼusi chchanubtasvan ta melel li Vivliae?
