XCHANOBIL 11
¿Kʼuxi tskoltautik li beiltaseletik ta Vivliae?
1. ¿Kʼu yuʼun skʼan xkichʼtik beiltasel?
¿Kʼuxi tskoltautik li beiltaseletik ta Vivlia sventa jchabi li jkuxlejaltike? (SALMO 36:9)
Li Jeovae jaʼ Jtotik xchiʼuk jaʼ Jpasvanej kuʼuntik, jaʼ noʼox stuk toj ep spʼijil. Jech xtok, skʼanojutik xchiʼuk oyutik ta yoʼonton. Muʼyuk la spasutik sventa ta jventain jba jtuktik (Jeremias 10:23). Jech kʼuchaʼal li ololetik ti skʼanik beiltasel yuʼun stot smeʼike, li voʼotik eke skʼan sbeiltasutik li Diose (Isaias 48:17, 18). Li beiltaseletik oy ta Vivliae jaʼ jun matanal yakʼojbutik li Diose. Kʼelo 2 Timoteo 3:16.
Li mantaletik xchiʼuk beiltaseletik yakʼoj Jeovae jaʼ sventa xchanubtasutik kʼuxi xuʼ jkʼupin li jkuxlejaltike xchiʼuk ti kʼuxi xuʼ jtatik bendisionetik ta sbatel osile. Ta skoj ti jaʼ Jpasvanej kuʼuntike, skʼan ta sjunuluk koʼontontik jchʼamtik li beiltasel chakʼbutike. Kʼelo Salmo 19:7, 11; Apokalipsis 4:11.
2. ¿Kʼusi jaʼ li beiltaseletik ta Vivliae?
Li beiltaseletik ta Vivliae jaʼ li kʼusi chakʼ jnaʼtik kʼusi xuʼ jpastik kʼalal oy kʼusi ta jnuptan ta jkuxlejaltike. Pe li mantaletike jtos noʼox lek chal ti bu xuʼ xkakʼ ta jkuxlejaltike (Deuteronomio 22:8). Sventa xkaʼibetik smelolal kʼuxi xuʼ xkakʼ ta jkuxlejaltik junuk beiltasel ta Vivliae, skʼan jtunestik lek jnopbentik (Proverbios 2:10-12). Jech kʼuchaʼal liʼe, li Vivliae chchanubtasvan ti jaʼ jun matanal yakʼoj Dios li kuxlejale. Li beiltasel taje jtunel tajek sventa sbeiltasutik ta kabteltik, ta jnatik xchiʼuk kʼalal oy bu chijbate, yuʼun tsvules ta joltik ti skʼan jchabi jbatike. Kʼelo Echos 17:28.
3. ¿Kʼusi chaʼtos beiltasel ti mas tsots skʼoplale?
Li Jesuse laj yal chaʼtos beiltasel ti tsotsik skʼoplale. Li baʼyele chakʼ ta ilel ti kʼu yuʼun laj kichʼtik pasele: sventa xkojtikintik Dios, sventa jkʼantik xchiʼuk sventa tukʼuk xijtun ta stojolal. Li beiltasel taje skʼan jtsaktik ta venta ta skotol li kʼusi ta jnop ta jpastike (Proverbios 3:6). Li buchʼutik chakʼ ta xkuxlejalik li beiltasel taje chkʼotik ta yamigo Dios, tstaik melel muyubajel xchiʼuk kuxlejal sbatel osil. Kʼelo Mateo 22:36-38.
Li xchibal beiltasele tskoltautik sventa lekuk xkil jbatik xchiʼuk li yantike (1 Korintios 13:4-7). Kʼalal jech ta jpastike, jaʼ ta jchanbetik stalelal li Dios ti kʼu yelan chil li krixchanoetike. Kʼelo Mateo 7:12; 22:39, 40.
4. ¿Kʼuxi ta jtabetik sbalil li beiltaseletike?
Li beiltaseletik ta Vivliae chkoltavan sventa skʼan sbaik xchiʼuk ti jmojuk oy li utsʼ alalile (Kolosenses 3:12-14). Jech xtok, oy jun beiltasel ti chchabi li utsʼ alalile, yuʼun chchanubtasvan ti maʼuk noʼox sventa jayib kʼakʼal li nupunele. Kʼelo Jenesis 2:24.
Kʼalal ta jchʼuntik li beiltaseletik ta Vivliae, ta jtabetik sbalil xtok sventa oyuk li kʼusi chtun kuʼuntike xchiʼuk sventa junuk noʼox koʼontontik. Epal yajval abteletike jaʼ tsaʼik j-abteletik ti yakʼoj ta xkuxlejalik li beiltaseletik ta Vivliae, ti mu snaʼ x-elkʼajike xchiʼuk ti chakʼ ta yoʼonton li yabtelike (Proverbios 10:4, 26; Ebreos 13:18). Jech xtok, li Skʼop Diose chchanubtasutik ti skʼan junuk koʼontontik mi oy li kʼusitik chtun kuʼuntike xchiʼuk ti jaʼ mas tsots skʼoplal xkaʼi ta jkuxlejaltik ti lek xkil jbatik xchiʼuk li Diose maʼuk li kʼulejale. Kʼelo Mateo 6:24, 25, 33; 1 Timoteo 6:8-10.
Li beiltaseletik ta Vivliae tskoltautik xtok sventa lekuk oy li jbekʼtaltike. Jun skʼelobile jaʼ li kʼusi chal smantal Dios ta sventa li yakubele, yuʼun chchabiutik sventa mu stsakutik chamel xchiʼuk ti mu kʼusi xibal sba xkʼot ta jtojolaltike (Proverbios 14:30; 22:24, 25; 23:20). Melel onoʼox ti muʼyuk chopol chil Jeova mi oy noʼox smelolal kʼu yepal chichʼ uchʼel li poxe (Salmo 104:15; 1 Korintios 6:10). Li beiltaseletik ta Vivliae ta jtabetik sbalil, yuʼun tskoltautik sventa jkʼel li jtalelaltike xchiʼuk li jnopbentike (Salmo 119:97-100). Li melel yajtsʼaklomtak Kristoe maʼuk noʼox ta xchʼunik li beiltaseletik ta skoj ti ta stabeik sbalil ta xkuxlejalike, yuʼun jaʼ sventa xichʼik-o ta mukʼ li Jeova ti jaʼ Jtotik ta vinajele. Kʼelo Mateo 5:14-16.
