XCHANOBIL 6
¿Mi ta to van xkuxiik yan velta li animaetike?
1. ¿Kʼusi lekil aʼyej oy ta sventa li animaetike?
Kʼalal liʼ toʼox oy ta balumil li Jesuse, cham jun yamigo ti Lasaro sbi ti te nakal ta Betaniae, jaʼ jun bikʼit lum ti nopol xil Jerusalene. Kʼalal kʼot ta Betania li Jesuse, oy xa ox ta xchanibal kʼakʼal xchamel. Kʼalal bat ta smukinal Lasaro li Jesuse, te xchiʼuk batel Marta xchiʼuk Maria, ti jaʼ xchiʼiltak ta vokʼel li Lasaroe, ta anil noʼox ep la stsob sba krixchanoetik li ta mukinale. ¿Mi xnop avuʼun kʼu to yelan muyubajik li Marta xchiʼuk Maria kʼalal chaʼkuxesbat li xchiʼilik ta vokʼele? Kʼelo Juan 11:21-24, 38-44.
Li spatobil oʼontonal sventa chaʼkuxesele jaʼ lekil aʼyejetik xtok ti chalbe skʼoplal li Vivliae. Li Martae snaʼoj xa onoʼox ti yaloj Jeova ti chchaʼkuxes animaetik sventa chkuxiik yan velta liʼ ta balumile. Kʼelo Job 14:14, 15.
2. ¿Kʼusi chkʼot ta jtojolaltik mi lijchame?
Xi albat yuʼun Dios li Adane: «Ta lum pasbilot, jaʼ yuʼun ta lum chasut batel» (JENESIS 3:19)
Li krixchanoutike pasbilutik «ta lum» (Jenesis 2:7; 3:19). Li voʼotike muʼyuk jchʼuleltik ti mu snaʼ xchame. Kʼalal chijchame, chʼabal kʼusi kuxul chkom kuʼuntik. Kʼalal mi cham o paj ta abtel li jchinabtike, muʼyuk xa kʼusi ta jnoptik. Jaʼ yuʼun, li buchʼu chamemike muʼyuk xa kʼusi tsnopik xchiʼuk muʼyuk xa kʼusi chaʼiik. Jech oxal, kʼalal chaʼkuxi li Lasaroe, muʼyuk laj yal mi ay ta vinajel o mi oy kʼusi la snuptan. Kʼelo Salmo 146:4; Eklesiastes 9:5, 6, 10.
Oy jlom krixchanoetike xchʼunojik ti kʼalal oy buchʼu chchame li Diose ta la xakʼbe svokol ta kʼatinbak, pe taje mu meleluk. Jech kʼuchaʼal laj xa kiltike, li animaetike muʼyuk xa kʼusi tsnopik xchiʼuk muʼyuk xa kʼusi chaʼiik. Jaʼ yuʼun, li chanubtasel ta sventa kʼatinbake maʼuk melel xchiʼuk jaʼ noʼox tsokesbe skʼoplal li Jeovae. Li stuke solel chopol chaʼi kʼalal naka noʼox chichʼ alel ti oy buchʼu chichʼ chikʼele. Kʼelo Jeremias 7:31.
Kʼelo li video ¿Kʼu yelan oy li animaetike?
3. ¿Mi stakʼ jkʼopontik li animaetike?
Li animaetike mu xkʼopojik xchiʼuk muʼyuk kʼusi chaʼiik (Salmo 115:17). Pe oy chopol anjeletik ti xuʼ skʼopon li krixchanoetike xchiʼuk ti tskoʼoltas sbaik ta animaetike (2 Pedro 2:4). Ta skoj taje, li Jeovae toj chopol chaʼi kʼalal ta jkʼan ta jkʼopontik li animaetike. Kʼelo Deuteronomio 18:10, 11.
4. ¿Buchʼutik chchaʼkuxiik?
Ta smiyonal noʼox krixchanoetik ti chamemike ta xkuxiik yan velta liʼ ta balumile. Jech xtok, ta xchaʼkuxiik li buchʼutik muʼyuk laj yojtikinik Jeova ti la spasik toʼox kʼusitik chopole. Kʼelo Lukas 23:43; Echos 24:15.
Li buchʼutik chchaʼkuxiike xuʼ xchanik li kʼusi melel ta sventa Diose, chakʼ xchʼunel yoʼontonik ta stojolal Jesus xchiʼuk chakʼik ta ilel ti chchʼunik mantale (Apokalipsis 20:11-13). Mi jech la spasike, tskʼupinik sbatel osil li xkuxlejalik liʼ ta balumile. Kʼelo Juan 5:28, 29.
5. ¿Kʼusi chakʼ kiltik ta sventa Jeova li chaʼkuxesele?
Li chaʼkuxesele jaʼ svinajeb ti kʼanvanem xchiʼuk ti oy slekil yutsil yoʼonton li Jeovae. Koliyal ti la stak tal Xnichʼon sventa tal yakʼ xkuxlejal ta jtojoltike, oy spatobil koʼontontik ti xuʼ xchaʼkuxi li animaetike. Li voʼote, ¿buchʼu chakʼan chakʼel mi kʼot ta pasel taje? Kʼelo Juan 3:16; Romanos 6:23.
