Slikeb loʼil
«Jaʼ tscʼan chachanbeic yoʼnton li bochʼotic ta sventa xchʼunojel yoʼntonic, ta sventa smucʼul yoʼntonic chichʼic li cʼusi scʼoplal onoʼox ch-acʼbatique.» (HEBREOS 6:12)
1, 2. ¿Kʼu yelan chil jun jkʼelvanej ta sirkuito li krixchanoetik ti chalbe skʼoplal Vivliae, xchiʼuk kʼu yuʼun ti toj labal sba ti xkʼotuk ta kamigotaktike?
«KʼALAL chalbe skʼoplal krixchanoetik ta Vivliae xkoʼolaj ti voʼne xa jaʼ yamigotake.» Jech laj yal jun ermana kʼalal laj yaʼi li jun mantal laj yakʼ li jun jkʼelvanej ta sirkuito ti mol xae. Oy srason ti jech chal li ermana taje. Yuʼun li ermano taje ep xa ta velta skʼeloj li Vivliae, jaʼ yuʼun xkoʼolaj kʼuchaʼal yamigotak ti voʼne xa yojtikinoj yileluk kʼalal chalbe skʼoplal li tukʼil viniketik xchiʼuk antsetike.
2 ¿Mi mu toj labaluk sba ti jaʼuk xkʼot ta kamigotaktik li krixchanoetik ti chalbe skʼoplal Vivliae? ¿Mi jech chavil li voʼot eke? Nopo noʼox kʼu van yelan chavaʼi aba ti koʼol chaxanavik xchiʼuk ti chaloʼilajik xchiʼuke, ti xavojtikinan li yajtuneltak Dios jech kʼuchaʼal li Noee, li Abrahame, li Rute, li Eliase xchiʼuk li Estere. ¿Kʼusi van sbaliltak chata ta akuxlejal? ¡Nopo noʼox avaʼi kʼu to yepal tojobtaseletik xchiʼuk spatobil oʼontonal chakʼboxuk! (Kʼelo Proverbios 13:20.)
3. 1) ¿Kʼuxi xuʼ skoltautik li viniketik xchiʼuk antsetik ti oy lek xchʼunel yoʼontonik ti chalbe skʼoplal Vivliae? 2) ¿Kʼusitik chichʼ takʼel?
3 Kʼalal mi chaʼkuxiik talel li buchʼutik lekike, xuʼ me jkʼupintik xchiʼinel xchiʼuk yamigoinel (Hech. 24:15). Li avi kʼakʼal eke, xuʼ ep skoltautik li viniketik xchiʼuk antsetik ti oy lek xchʼunel yoʼontonik ti chalbe skʼoplal li Vivliae. ¿Kʼuxi? Li jtakbol Pabloe oy kʼusi chalbutik ti skʼan jpastike: «Jaʼ tscʼan chachanbeic yoʼnton li bochʼotic ta sventa xchʼunojel yoʼntonic, ta sventa smucʼul yoʼntonic chichʼic li cʼusi scʼoplal onoʼox ch-acʼbatique» (Heb. 6:12). Yoʼ to muʼyuk jkʼelojbetik skʼoplal li loʼiletike, ta jtakʼtik baʼyuk chib sjakʼobil ta sventa li kʼusi laj yal Pabloe: ¿Kʼusi jaʼ li xchʼunel oʼontonale, xchiʼuk kʼu yuʼun skʼan oyuk kuʼuntik? ¿Kʼuxi xuʼ jchanbetik stalelal li tukʼil yajtuneltak Dios ta voʼnee?
¿Kʼusi jaʼ li xchʼunel oʼontonale, xchiʼuk kʼu yuʼun skʼan oyuk kuʼuntik?
4. ¿Kʼusi tsnop epal krixchanoetik ta sventa li xchʼunel oʼontonale, xchiʼuk kʼu yuʼun ti mu jechuk ti kʼuchaʼal chalike?
4 Li xchʼunel oʼontonale jaʼ jun talelal ti toj alakʼ sbae, taje tsots skʼoplal laj yilik li krixchanoetik ta jchanbetik batel skʼoplal li ta livroe liʼe. Kʼux ta alel pe epal krixchanoetik avie mu snaʼik kʼusi jaʼ li melel xchʼunel oʼontonale. Tsnopik ti jaʼ noʼox xchʼunojik ti chʼabal sprevailtake o kʼusitik ti muʼyuk kʼotemik ta pasele. Pe, ¿mi jech van ta melel? Moʼoj, li melel xchʼunel oʼontonale maʼuk noʼox li kʼusi chaʼiik ta yoʼontonike o jaʼ noʼox chalik ti xchʼunojik Diose. Li kʼusi chkaʼi ta koʼontontike xuʼ xloʼlavan. Yuʼun maʼuk noʼox skʼan ti jchʼunojtik ta stojolal li Diose, yuʼun li Vivliae chal ti «xchʼunojic ec li pucujetique, jaʼ yuʼun oy xiʼel chaʼyic» (Sant. 2:19).
5, 6. 1) ¿Kʼusi chaʼtos mu xkil ta jsatik ti jaʼ chalbe skʼoplal li xchʼunel koʼontontike? 2) ¿Kʼusi skʼelobil chakʼ ta ilel ti skʼan oyuk lek sprevailtak li xchʼunel koʼontontike?
5 Li melel xchʼunel oʼontonale, maʼuk noʼox ti oy kʼusi jchʼunojtike. Jkʼeltik kʼuxi chalbe skʼoplal xchʼunel oʼontonal li Vivliae (kʼelo Hebreos 11:1). Li jtakbol Pabloe laj yal ti oy chaʼtos ti kʼusi mu xkil ta jsatike. Li june jaʼ ti chkakʼ ta koʼontontik li kʼusitik oy ta melele, akʼo mi «muʼyuc to quilojti[k]»: li jsatike mu xil li kʼusitik oy ta vinajele, jech kʼuchaʼal li Jeovae, li Xnichʼone xchiʼuk li Ajvalilal yuʼun Dios ti tspas xa mantal ta vinajele. Li xchibale, li xchʼunel oʼontonale jaʼ chakʼ ta koʼontontik li kʼusi chichʼ malaele: jaʼ li kʼusitik muʼyuk to kʼotemik ta pasele. Jech kʼuchaʼal liʼe, mu xkiltik ta jsatik li achʼ balumil ti jutuk xa skʼan xichʼ talel li Ajvalilal yuʼun Diose. Pe, ¿mi jaʼ van skʼan xal ti chʼabal srasonal sventa jchʼuntik li kʼusitik taje xchiʼuk li kʼusitik chkʼotanan ta pasele?
6 Moʼoj, li jtakbol Pabloe lek jamal laj yal ti oy lek sprevailtak li xchʼunel oʼontonale. Kʼalal laj yal Pablo ti «jaʼ chacʼ ti jbel scʼoplal ta jtatic» li xchʼunel oʼontonale, la stunes jpʼel kʼop ti xuʼ xichʼ jelubtasel kʼuchaʼal «jlik vun ti chal jaʼ avuʼune». Nopo noʼox avaʼi ti oy buchʼu tskʼelanbot jpʼejuk nae. Xuʼ van chakʼbot jlikuk vun ti te chal ti jaʼ xa avuʼun li nae xchiʼuk ti xi chalbote: «Liʼ oy li anae». Taje jamal xvinaj ti maʼuk ta yoʼonton ti skʼan xa naki ta jlikuk vune, pe li jlik vun taje jaʼ sprevail ti jaʼ xa avuʼun li nae, ti xkaltikuk noʼoxe, li jlik vun taje xkoʼolaj kʼuchaʼal li nae. Li xchʼunel koʼontontik eke, jaʼ chakʼ jchʼuntik ti chkʼot onoʼox ta pasel skotol li kʼusi yaloj Dios ta Skʼope.
7. ¿Kʼusi smakojbe skʼoplal li melel xchʼunel oʼontonale?
7 Jaʼ yuʼun, li melel xchʼunel oʼontonale te smakojbe skʼoplal ti lek jchʼunojtike, ti lek jpatoj koʼontontik ta jyalel ta stojolal li Jeovae. Taje jaʼ tskoltautik sventa jaʼuk Jtotik xkiltik li Dios ti lek skʼanojutike xchiʼuk ti lek jchʼunojtik ti chakʼ kʼotuk ta pasel li kʼusitik yaloj tspase. Pe maʼuk noʼox taje. Jech kʼuchaʼal chkʼot ta stojolal li kʼusitik kuxajtike, li xchʼunel oʼontonale skʼan jmakʼlintik. Skʼan xkakʼtik ta ilel li yabtele, mi moʼoje ta me xcham (Sant. 2:26).
8. ¿Kʼu yuʼun toj tsots skʼoplal ti oyuk xchʼunel koʼontontike?
8 ¿Kʼu yuʼun toj tsots skʼoplal ti oyuk xchʼunel koʼontontike? Li jtakbol Pabloe chalbutik jun srasonal ti toj tsots skʼoplale (kʼelo Hebreos 11:6). Mi muʼyuk xchʼunel koʼontontike, mu xuʼ xijnopaj batel ta stojolal Jeova xchiʼuk muʼyuk lek ta xilutik. Jaʼ yuʼun tsots skʼoplal skʼan oyuk xchʼunel oʼontonal sventa xkʼot ta pasel li kʼusi oy ta yoʼontonik skotol li krixchanoetike xchiʼuk li anjeletike: ti xnopajik ta stojolal li Jtotik Jeova ta vinajele xchiʼuk ti smuyubtaike.
9. ¿Kʼuxi yakʼoj ta ilel Jeova ti skʼan oyuk kuʼuntik li xchʼunel oʼontonale?
9 Li Jeovae snaʼoj ti skʼan oyuk kuʼuntik li xchʼunel oʼontonale, jaʼ yuʼun yakʼojbutik skʼelobiltak sventa jtsʼitestik xchiʼuk xkakʼtik ta ilel. Ta yan xtoke, lek skʼelobil chakʼbutik xtok li ermanoetik ti jaʼ tsbeiltasik batel li tsobobbaile; jaʼ yuʼun xi chalbutik li Vivliae: «Chanbeic cʼu xʼelan li xchʼunojel yoʼntonique» (Heb. 13:7). Li Pablo eke laj yalbe skʼoplal «epal testigoetic», ti jaʼik li yajtuneltak Dios ta voʼne ti laj yakʼik ta ilel lek xchʼunel yoʼontonike (Heb. 12:1). Li jtakbole laj yalbe skʼoplal jlom krixchanoetik li ta kapitulo 11 li ta karta laj yichʼ takbel batel li j-hebreoetike, pe oy to yantik. Li ta Vivliae oy epal loʼiletik sventa viniketik xchiʼuk antsetik ti jelajtik sjabilalik xchiʼuk ti jelajtik kʼusitik kʼot ta xkuxlejalike. Li avi kʼakʼale, chʼabal xa li xchʼunel oʼontonale, jaʼ yuʼun ep tskoltautik li sloʼil xkuxlejal krixchanoetik taje.
¿Kʼuxi xuʼ jchanbetik xchʼunel yoʼontonik?
10. Kʼalal ta jchan Jvivlia jtuktike, ¿kʼuxi xuʼ skoltautik sventa jchanbetik xchʼunel yoʼontonik li viniketik xchiʼuk li antsetik ti chalbe skʼoplal ta Vivliae?
10 Mu xuʼ jchanbetik stalelal jun krixchano kʼalal muʼyuk kilojtik lek li kʼusi tspase. Jaʼ yuʼun, kʼalal laj yichʼ pasel li livro liʼe, laj yichʼ sabel lek smelolal sventa xavil ta asat yileluk li viniketik xchiʼuk antsetik ti laj yakʼ ta ilel xchʼunel yoʼontonik ti liʼ chichʼ albel skʼoplalike. ¿Kʼu yuʼun mu xasabe mas skʼoplal ta sventa li viniketik xchiʼuk antsetik ti chalbe skʼoplal li Vivliae? Kʼalal mi la achan Avivlia atuke tuneso lek li vunetik oy avuʼune. Jech xtok nopbo skʼoplal li kʼusitik yakal chakʼele, nopo kʼuyelan li lumetike xchiʼuk li kʼusitik chkʼotanan ta pasel ta jujun loʼile. Nopo ti te xa oyote, aʼio li kʼusitik chbakʼe xchiʼuk aʼibo smuil. Pe li kʼusi mas tsots skʼoplale, jaʼ ti xavakʼ persa ti jechuk xa chavaʼi aba xchiʼuk ti jechuk xa chanop kʼuchaʼal li buchʼutik chkalbetik skʼoplale. Mi laj avaʼi aba jech kʼuchaʼal chaʼi sba li krixchanoetik taje, melel xa me chavil li tukʼil yajtuneltak Dios ta voʼnee. ¡Chavojtikinan lek ti xkoʼolaj xa jaʼ avamigotak ta voʼnee!
11, 12. 1) ¿Kʼuxi xuʼ jpastik sventa mas nopoluk xkaʼi jbatik ta stojolal li Abraham xchiʼuk li Sarae? 2) ¿Kʼuxi xuʼ skoltautik li sloʼil xkuxlejalik Ana, Elías xchiʼuk li Samuele?
11 Kʼalal ta jchantik mas ta stojolal li viniketik xchiʼuk antsetik ti chalbe skʼoplal ta Vivliae, mas tstij koʼontontik xchanbel li stalelalike. Jnoptik noʼox avaʼi liʼe, li s-organisasion Jeovae chalbot ti skʼan xabat ti bu chtun mas jcholmantaletik sventa x-epaj li avabtel ta cholmantale o ti xavichʼ albel ti akʼo xapas preva jtosuk ti kʼuyelan xuʼ xachol mantal ti vokol chavaʼie o chaxiʼ yuʼune. Kʼalal chanopbe skʼoplal li kʼusitik skʼan xapase albo Jeova ta orasion ta sventa taje, xuʼ ta skoltaot li sloʼil xkuxlejal Abraham mi la anopbe lek skʼoplale. Li Abraham xchiʼuk li Sarae jpʼel yoʼonton laj yiktaik komel li kʼusitik oy yuʼunik ta lum Ure, ta skoj taje epal bendision laj yichʼik. Kʼalal jech ta jpastik eke, mas me nopol chkaʼi jbatik ta stojolalik.
12 Jech xtok, nopo ti oy kʼusi chopol la spasbot junuk ti buchʼu lek xavojtikine, ta skoj taje muʼyuk xa oy ta avoʼonton chakʼan chabat li ta tsobajeletike. Mi jaʼ jeche, xuʼ van xa skoltaot mi la anopbe skʼoplal li kʼusi kʼot ta xkuxlejal li Anae, ti muʼyuk la yikta sba ta yichʼel ta mukʼ Jeova ta skoj li kʼusi pasbat yuʼun li Peninae. Ta melel tstijbot avoʼonton sventa lekuk li kʼusi xkʼot ta nopel avuʼune, vaʼun xkoʼolaj xa kʼuchaʼal avamiga chavil li Anae. Jech xtok, mi oy kʼusi chopol chtal ta ajol xchiʼuk mi chanop ti jecheʼ li kʼusi chapase, xuʼ van koʼol chavaʼi aba xchiʼuk li Eliase. Li ta sloʼil xkuxlejale te chavakʼ venta ti ep svokoltak la snuptane, pe jaʼ onoʼox patbat yoʼonton yuʼun li Jeovae xchiʼuk jaʼ te la sta koltael. ¿Kʼusi xuʼ xkaltik ta stojolal li kerem tsebetik ti chichʼik sujel yuʼun xchiʼiltakik ta chanun ta sventa li mulivajele? Xuʼ ep kʼusitik xchanik ta stojolal li Samuele, yuʼun li stuke muʼyuk laj yakʼ akʼo sokesat li xchopol talelalik laj yakʼik ta ilel li xnichʼnabtak Elí li ta chʼulna pasbil ta nukule.
13. ¿Mi jaʼ van skʼan xal ti muʼyuk xa sbalil xchʼunel koʼontontik ta skoj ti ta jchanbetik kʼusi laj xa spasik li viniketik xchiʼuk li antsetik ti chalbe skʼoplal Vivliae? Alo kʼu yuʼun jech chatakʼ.
13 ¿Mi jaʼ van skʼan xal ti muʼyuk sbalil chil Jeova ta skoj ti jaʼ noʼox ta jchanbetik li kʼusi laj xa spasik li yantike? Moʼoj, yuʼun li Skʼop Diose tstijbutik koʼontontik sventa jchanbetik stalelal li viniketik xchiʼuk li antsetik taje (1 Cor. 4:16; 11:1; 2 Tes. 3:7, 9). Li kʼusi tsots skʼoplale, yuʼun li ta livro liʼe ta jchanbetik batel skʼoplal ti oy jlom viniketik xchiʼuk antsetik ti la xchanbeik stalelal li yan yajtuneltak Dios ti mas voʼne kuxiik kʼuchaʼal li stukike. Kalbetik junuk skʼoplal, li ta kapitulo 17 te chkiltik ti Mariae la xchaʼal jun orasion ti jaʼ la spas li Anae, taje chakʼ ta ilel ti jaʼ la xchanbe Ana li Mariae. ¿Mi yuʼun van chʼabal sbalil li xchʼunel yoʼonton ta skoj taje? ¡Moʼoj! Li sloʼil xkuxlejal Anae jaʼ koltaat-o María sventa la spat yoʼonton mas ta stojolal Jeova xchiʼuk sventa lekuk x-ilat.
14, 15. ¿Kʼusitik yichʼoj talel li livroe liʼe, xchiʼuk kʼuxi xuʼ jtabetik lek sbalil?
14 Li livro laj yichʼ pasel liʼe jaʼ sventa stsatsub li xchʼunel koʼontontike. Li kapituloetike jaʼ te yichʼoj tsobel lokʼel li ta mantaletik «Jchanbetik li xchʼunel yoʼontone» ti xi sbie, jaʼ ta revista Li Jkʼel osil ta toyole, ti lik lokʼanuk ta sjabilal 2008 xchiʼuk ta 2013. Pe akʼo mi jech, yichʼoj talel yan kʼusitik. Li sjakʼobiltak yichʼoj talel ta jujun kapituloe jaʼ sventa jchantik xchiʼuk sventa xkakʼ ta jkuxlejaltik li kʼusi chale. Ta yan xtoke, ta sventa li livro liʼe laj yichʼ pasel epal lokʼoletik ti lek sbon xvinaje xchiʼuk ti lek pasbile, laj yichʼ jelel junantik lokʼoletik o laj yichʼ tikʼel yan kʼusitik li ta lokʼoletik ti oy xa onoʼoxe. Jech xtok, yichʼoj tal kʼusi ti lek xcholet chchapbe skʼakʼalil li kʼusitik kʼot ta pasele xchiʼuk yichʼoj talel chib mapa. Li livro Jchanbetik li xchʼunel yoʼontonike, xuʼ xichʼ chanel ta jtuktik noʼox xchiʼuk ta tsobobbail. Jech xtok, xuʼ stabeik sbalil utsʼ alaliletik kʼalal mi koʼol la xchanike. ¿Kʼu yuʼun mu tsots xakʼelik li loʼiletike? ¡Solel ep ta xakʼupinik!
15 Ta melel, li livro liʼe tskoltautik sventa jchanbetik li xchʼunel yoʼonton laj yakʼik ta ilel li yajtuneltak Dios ta voʼnee. Kʼalal ta jkʼeltik batele, tstsatsub batel li xchʼunel koʼontontike xchiʼuk mas tsnopajesutik batel ta stojolal li Jtotik ta vinajele, ti jaʼ li Jeovae.
