JCHOLVANEJETIK. Li jcholvanejetike jaʼ sventa tskoltautik, jaʼ yuʼun jchʼuntik ti bu chalik akʼo jkotan jkarotike. Jchʼuntik kʼalal chijxanav ta yut salone, kʼalal ta jmak jchotlebtik xchiʼuk ta yan kʼusitik.

ICHʼVOʼ. Li chotlebaletik ta yeloval plataformae chichʼ makel sventa li buchʼutik chichʼik voʼe, mi oy kʼusi jele, te chichʼ alel. Skʼan xa noʼox te xchotiik kʼalal mu to chlik li mantal sventa ichʼvoʼ li ta sob savadoe. Jech xtok, skʼan xichʼ tal stoayaik xchiʼuk skʼuʼik ti lek noʼox sba ta kʼelele.

MATANAL TAKʼIN. Ep takʼin chlaj sventa oyuk ep lekil chotlebaletik, oyuk lek sonido, video xchiʼuk yan kʼusitik ti chtun yoʼ jkʼupintik li asambleae xchiʼuk ti xijnopaj-o mas ta stojolal Jeovae. Kʼalal chakolta abaik ta takʼine, jaʼ jech chichʼ tojel-o li kʼusitik taje xchiʼuk jech chijkoltavan ta sventa li abtelal ta spʼejel balumile. Jech oxal, oy kajaetik ta sjunul salon sventa asamblea. Jech xtok, xuʼ xavakʼ matanal takʼin ta Internet, ta donate.pr418.com. Ta jtojkutik tajek ta vokol ti chavakʼik matanal takʼine. Li Jtsop Jbeiltasvaneje tskʼan tstojboxuk ta vokol ek, yuʼun li atakʼinike jaʼ chkoltavan ta spasel li kʼusitik sventa Ajvalilal yuʼun Diose.

DEPARTAMENTO SVENTA BUCHʼUTIK CH-IPAJIK TA ANIL. Li departamento liʼe jaʼ noʼox me sventa mi oy kʼusi kʼot ta pasel ta anile.

LI KʼUSITIK CHʼAYEME. Mi oy kʼusi la ata ti maʼuk avuʼune ichʼo batel ta Departamento de Objetos Perdidos. Mi oy kʼusi chʼay avuʼune bat saʼo li ta departamento taje. Te chichʼ ikʼel batel ek li ololetik ti chʼayemike. Sventa mu xkil jvokoltike, teuk noʼox me jsatik ta stojolal li kalab jnichʼnabtike.

SMAKEL CHOTLEBALETIK. Ta jkʼanbotkutik vokol ti xatsakik ta venta li yantike. Vuleso ta ajol ti jaʼ noʼox xuʼ xamakbe xchotleb li buchʼutik jmoj akaroalike, li avutsʼ avalale, li buchʼu chavakʼbe estudioe o li buchʼutik jmoj nakaloxuk xchiʼuke. Mu me xavikta kʼusitik ta chotlebal mi muʼyuk buchʼu chchoti tee.

LI BUCHʼUTIK TSKʼAN CHKOLTAVANIKE. Mi chakoltavan avaʼi li ta asambleae, bat jakʼo ta Departamento de Información o ta Servicio Voluntario.

Chanob vun sventa j-al lekil aʼyejetik yuʼun Ajvalilal yuʼun Dios Li prekursoretik ti oy ta yoʼonton tskʼan chepajes li yabtelik ta cholmantal xchiʼuk ti tskʼan chbatik li ta chanob vun liʼe, takbilik ta ikʼel ta jun tsobajel ti chichʼ pasel li ta domingo ta mal kʼakʼale. Xuʼ xkʼotik li buchʼutik yichʼojik xa 23 kʼalal to ta 65 jabile. Chichʼ alel ta plataforma li yorail xchiʼuk ti bu chjelave.