Nopo ta sventa liʼe: Chib to u snovio sbaik li Miguel xchiʼuk Elenae, pe li Elenae xkoʼolaj xa ti sjunul xkuxlejalik jmoj oyik chaʼi sbae. Jujulikel tstakbe sbaik mensaje, tskʼopon sbaik ta telefono xchiʼuk snaʼojbe xa sbaik li kʼusi chalik ta jujuntale akʼo mi muʼyuk to yaloj li june. Pe li avi une, li Miguele maʼuk xa noʼox tskʼan chchiʼin sbaik ta loʼil, yuʼun oy xa kʼusi yan tskʼan.

Li Miguel xchiʼuk Elenae jaʼ to noʼox stsakojbe sba skʼobik xchiʼuk stsʼutsʼ sbaik bakʼintik. Li Elenae mu skʼan spas kʼusi yan, pe mu skʼan ti x-ikta-at komel yuʼun li snovio xtoke. Yuʼun muʼyuk buchʼu yan ch-albat ti toj kʼupil sbae xchiʼuk ti stuk xa noʼox jech ch-ilate. Jech xtok, xi tsnope. «Yuʼun onoʼox jkʼanoj jbakutik tajek».

Mi oy xa ajabilal sventa oyuk anovio o anovia chavaʼi abae xchiʼuk ti voʼotuk li kʼusi kʼot ta pasel ta stojolal li Elenae, ¿kʼusi van chanop chapas?

Mi muʼyuk laj achʼun li mantaletik ti ch-abtej ta sventa li vinajelbalumile, jech kʼuchaʼal li yip balumile (gravedad), ta me xavil avokol yuʼun. Jaʼ jech chkʼot ta pasel xtok mi muʼyuk laj achʼun li mantaletik ta sventa li talelale, jech kʼuchaʼal ti mu stakʼ xijmulivaje, ti te tsakal skʼoplal li chiʼinejbail ta vayel kʼalal skʼan toʼox xijnupune (1 Tesalonicenses 4:3).

¿Kʼusi van chkʼot ta pasel mi muʼyuk la jchʼuntik li mantal liʼe? Xi chal li Vivliae: «Li buchʼu jaʼ tspasilan li mulivajele tsaʼ smul ta sbekʼtal stuk» (1 Korintios 6:18). ¿Kʼusi skʼan xal taje?

 Kʼalal laj yichʼ chanbel skʼoplal, ti epal kerem tsebetik la xchiʼin sbaik ta vayel kʼalal skʼan toʼox xnupunike, laj yichʼ ilel ti xuʼ xil svokolik ta sventa ti:

• OY SMUL CHAʼI SBAIKE. Jutuk mu skotoluk li kerem tsebetik ti la xchiʼin sbaik ta vayel kʼalal skʼan toʼox xnupunike, chalik ti chopol laj yaʼi sbaik ta tsʼakale.

• MU XA SPAT YOʼONTONIK TA JUJUNTALE. Kʼalal laj xa ox xchiʼin sbaik ta vayele, junantike xi tsjakʼbe sbaike: «¿Buchʼu van yan xchiʼinojan ta vayel?».

• CHAT YOʼONTONIKE. Akʼo mi mu xalik, pe epal tsebetike jaʼ tskʼan chchiʼinik li buchʼu xuʼ chchabiatike, maʼuk li buchʼu mu x-ichʼatik-o ta mukʼe. Xchiʼuk epal keremetike muʼyuk xa bu lek chilik ta tsʼakal li tsebetik ti toj kʼunik ta loʼlaele.

• Stsutseb: Mi laj achiʼin abaik ta vayel kʼalal skʼan toʼox xanupunike, oy me kʼusi chachʼay ti toj tsots skʼoplale: Ti oy abalil chavaʼi abae (Romanos 1:24). Toj ep sbalil li abekʼtale. ¡Mu xakʼelan!

Tsʼiko abaik xchiʼuk mu me xachiʼin abaik ta vayel kʼalal muʼyuk to nupunemoxuke (1 Tesalonicenses 4:3). Kʼalal mi lanupune, ta me xakʼupin. Vaʼun jun me avoʼonton xchiʼuk muʼyuk chavat avoʼonton, muʼyuk chloʼilaj avoʼonton o ti chopol chavaʼi jech kʼuchaʼal chaʼiik li buchʼutik chchiʼin sbaik ta vayel kʼalal muʼyuk to nupunemike (Proverbios 7:22, 23; 1 Korintios 7:3).

• Mi oy buchʼu skʼanojote, ¿mi mu jaʼuk tskʼan ti lekukot noʼoxe xchiʼuk ti xamuyubaj noʼoxe?

• Mi ta melel oyot ta yoʼontone, ¿mi ta van skʼanbot ti oy kʼusi xapas sventa mu xa lekuk xavil aba xchiʼuk li Diose? (Evreos 13:4).