SJAKʼOBIL 3
¿Kʼuxi xuʼ mas lek jchiʼin ta loʼil li jtot jmeʼe?
LI VOʼOTE, ¿KʼUSI VAN CHAPAS?
Nopo ta sventa liʼe: Mierkoles xa xchiʼuk bat xa kʼakʼal, li Guillermo, ti 17 sjabilale laj xa spas li yabteltake, jaʼ to chkux xa yoʼonton un, ¡sta-o xa ti jeche! Tstsan stelevision, vaʼun tsjip sba ta siyon ti bu mas lek chile.
Jaʼ to chile, vaʼal kʼot stot ta tiʼ na xchiʼuk ch-ilin tajek.
«¡Guillermo! ¿Kʼuxi xa noʼox ti naka chʼay kʼakʼal chapas ta skʼelel li televisone? ¿Mi mu skʼanuk xakolta avitsʼin sventa spas li stareae? ¡Mu xachʼun jsetʼuk li kʼusi chavichʼ albele!».
Ta kʼunkʼun xi la stakʼ li Guillermoe: «¡Lik xa tana xtok!».
Nopaj talel li stote xchiʼuk xi jakʼbate: «¿Kʼusi li laj avale?»
Tsjikʼ yoʼonton xchiʼuk kapem xa sjol xi tstakʼ li Guillermoe: «Muʼyuk».
Li stote Ilinem tajek xi takʼave: «¡Voʼone, mu xtal akʼoponun jech!».
Ti voʼotuk li Guillermoe, ¿kʼusi laj apas jechuk sventa mu stsatsaj li kʼope?
NOPO ME LEK
Li xchiʼinel ta loʼil li atot ameʼe xkoʼolaj kʼuchaʼal stsʼotel karo, mi laj ata junuk be karo ti makale, xuʼ xasaʼ yan be.
JECH KʼUCHAʼAL LIʼE:
Xi chal li Lidiae: «Toj tsots chkaʼi ta jchiʼin ta loʼil li jtote, bakʼintik kʼalal jal xa ox te xi vulvune, jaʼ to xi chalbune, ‹¿kʼusi la?›».
OY OXIB KʼUSI XUʼ SPAS LI LIDIAE
-
Ti tsots xa tstakʼbe li stote.
Xi tstakʼbe stot li Lidiae: «¡Aʼibun un! ¡Yuʼun toj tsots skʼoplal!».
-
Ti mu xa xalbe mas skʼoplale.
Muʼyuk xa laj yalbe svokol li stote.
-
Ti sabe yan skʼakʼalil sventa tskʼopon li stote.
Ta skʼopon ta mas tsʼakal li stote o tstsʼibabe batel jlikuk karta sventa chalbe li svokole.
¿Bu van junukal chavalbe akʼo spas li Lidiae?
NOPO TA SVENTA LIʼE: Li stot Lidiae yakal snopel yan kʼusitik xchiʼuk muʼyuk kʼusi yakʼoj venta. Mi jaʼ la stʼuj ta 1 li Lidiae, ti tsots xa tstakʼbe li stote xuʼ van mu xaʼibe smelolal kʼu yuʼun jech stalelal stseb li totile. Xuʼ van mu x-aʼibat kʼalal chkʼopoj li Lidiae; jech noxtok, mi jech la spase jaʼ skʼan xal ti mu x-ichʼvan ta mukʼe (Efesios 6:2). Muʼyuk me lek kʼusi chkʼot ta pasel mi tsots chtakʼav li Lidiae.
Akʼo mi ep ti kʼusitik xuʼ tsmakote, xuʼ xasabe smelolal sventa xachiʼin ta loʼil xchiʼuk sventa xavaʼibe smelolal li kʼusi chalbot li atot ameʼe.
Akʼo mi jaʼ mas kʼun ta pasel li ta 2, pe maʼuk li kʼusi mas leke. ¿Kʼu yuʼun? Yuʼun mi tskʼan chchapaj li skʼope, skʼan tskʼopon li stote. Vaʼun tskʼan tsnaʼ stot kʼusi ti chat-o yoʼonton sventa xkoltaate. Mi chʼanxi kom-oe mu xchapaj li skʼope.
Pe mi jaʼ la spas li ta 3, mu xakʼ ti te xpaj-o li kʼusi skʼan chalbe li stote, moʼoj, yuʼun tsmala ti xalbe kʼalal mas jun yoʼontone. Xchiʼuk mi la snop ti tstsʼibabe karta li stote, xuʼ van mas to lek chaʼi.
Mi la stsʼiba junuk kartae xuʼ van jaʼ xkoltaat sventa xalbe lek smelolal. Kʼalal mi la skʼel karta li stot Lidiae, xuʼ van mas xaʼibe smelol li kʼusi chkʼot ta pasel ta stojolal li stsebe, li kʼusi mas lek xuʼ stunes li Lidia jaʼ li kʼusi chal li ta 3. Xuʼ van skʼopon sbaik xchaʼvoʼalik o stsʼiba junuk karta, pe li kʼusi skʼan xichʼ pasel chal Vivlia sventa taje jaʼ liʼe: «Jaʼ me jpastik-o li kʼusi jaʼ chakʼ jun oʼontonale» (Romanos 14:19).
¿Kʼusitik yan xuʼ spas li Lidiae?
Nopo yan kʼusi xuʼ spas xchiʼuk nopo ti kʼusi xuʼ xkʼot ta pasele.
JAMALUK XAVAL LI KʼUSI OY TA AVOʼONTONE
Vuleso ta ajol: Li kʼusitik chaval bakʼintike xuʼ van mu jechuk chaʼibeik smelolal li atot ameʼe.
JECH KʼUCHAʼAL LIʼE:
Tsjakʼbot atot ameʼ ti kʼu yuʼun cha-iline. Vaʼun xi chatakʼbee: «Mu jkʼan xkalbe skʼoplal taje».
Pe xuʼ van xi chaʼibeik smelolale: «Muʼyuk xa bu jpatoj koʼonton ta stojolal li jtot meʼe. Jaʼ mas lek jaʼ chkalbe li kamigotake».
Nopo ta sventa ti oy tsots akʼope xchiʼuk chalbot atot o ameʼ ti tskoltaote. Mi xi laj avalbee: «Mu xavat avoʼonton chchapaj kuʼun jtuk».
-
¿Kʼusi van xuʼ tsnop li atot ameʼe?
-
¿Kʼusi van yan xuʼ xaval?
Xuʼ van chakʼupin skʼelel xtok liʼe
LI K'USI TSNOPIK YAN KEREM TSEBETIKE
¿Kʼu yelan skʼan xachiʼin ta loʼil li atot ameʼe?
Toj lek me mi la achan kʼuxi xuʼ xachiʼin ta loʼil li atot ameʼe.
LI KʼUSITIK TSJAKʼ KEREM TSEBETIKE
¿Kʼuxi xuʼ jloʼiltabe jtot jmeʼ ta sventa li mantaletik yakʼojbeikune?
Mi ta slekil avoʼonton chachiʼinan ta loʼil li atot ameʼe, labal sba chavil li sbalil ta xatabee.
DIVUJOETIK TA PISARRON
Kʼuxi xuʼ xa chiʼin ta loʼil atot ameʼ
¿Mi vokol chavaʼi ti xachiʼin ta loʼil atot ameʼe? ¿Kʼuxi xuʼ xavalbe atot ameʼ ti kʼu yelan chavaʼi abae?
