Nopo ta sventa liʼe: Li Andrese, mu xa snaʼ kʼusi ta xchʼun. Yuʼun voʼne onoʼox xchʼunoj ti Dios la spas vinajelbalumile. Pe li avi une, jun smaestro sventa Biología chal ti oy lek sprevail yuʼun sientifikoetik ti kʼunkʼun kʼataj talel skotol li kuxlejaletike. Li Andrese, mu skʼan ti xakʼ sba ta kʼexlale, vaʼun xi tsnope: «Ta melel, ti mi chalik sientifikoetik ti kʼunkʼun kʼataj talel li kuxlejale ¿kʼusi van kabtel voʼon ti chkal ti mu jechuke?».

Ti voʼotuk li Andrese, ¿mi chachʼun ti kʼunkʼun kʼataj talel kuxlejaletik, ta skoj noʼox ti jech chal livroetik ti melele?

Oy krixchanoetik ti anil chalik li kʼusi xchʼunojike, pe mu snaʼik kʼuxi chalbeik smelolal ti kʼu yuʼun jech chchʼunike.

• Jlome xchʼunojik ti oy Jpasvaneje, ta skoj noʼox ti jech yichʼik chanubtasel li ta srelijionike.

• Li yantik xtoke, xchʼunojik ti kʼunkʼun kʼataj talel li kuxlejale, yuʼun jaʼ jech laj yichʼik chanubtasel li ta eskuelae.

Ta Evreos 3:4 xi chale: «Oy buchʼu svaʼanoj li jujupʼej nae, pe jaʼ spasoj Dios skotol li kʼusitik oye». ¿Mi oy van srasonal chavaʼi li kʼusi chal Vivliae?

XI CHALIKE: Skotol li kʼusitik oy li ta vinajelbalumile, ayan skotol kʼalal oy kʼusi ta jecheʼ noʼox tʼom stuke, ti Big Bang sbie.

XI CHALIKE: Li krixchanoetike likemik talel ta chonbolometik.

XI CHALIKE: Oy sprevail ti kʼunkʼun kʼataj talel li kʼusitike.

«Nopo noʼox ti chaxanav ta yut teʼtike, vaʼun te chata jun alakʼ sba na ti pasbil ta teʼe. Ta melel muʼyuk van xi chanope, ‹yuʼun lom talel jayibuk teʼetik vaʼun pas ta jpʼej na›. Mu xichʼ chʼunel ta melel ti jeche. Jaʼ yuʼun chaʼa, xuʼ jchʼuntik ti oy buchʼu la spas li vinajelbalumile» (Julia).

«Ti oyuk buchʼu chalbot ti oy kʼusi tʼom ta junuk imprentae, ti nom to bu mal batel li tintae xchiʼuk ti jaʼ te lokʼ talel junuk diksionarioe, ¿mi ta van xachʼun?» (Gwen).

Li Vivliae chal ti skʼan xatunes li apʼijile (Romanos 12:1). Jaʼ xkaltik, ti oy xchʼunel avoʼontone maʼuk noʼox ta skoj:

• LI KʼUSI CHAVAʼIE: «Chkaʼi noʼoxe oy kʼusi mas tsots sjuʼel»

• LI KʼUSI CHCHʼUNIK YANTIKE: «Li krixchanoetik oy ta jpat jxokone, xchʼunojik li Diose».

• LI KʼUSI CHALBOXUK YANTIKE: «Li ta kutsʼ kalale chalbeikun ti skʼan jchʼun ti oy li Diose».

Skʼan oyuk lek srasonaltak avuʼun ti kʼu yuʼun jech chachʼune, ti maʼuk noʼox li kʼusi xchʼunoj yantike.

«Kʼalal chalbe smelolal maestro ta sventa ti kʼu yelan ch-abtej li kʼusitik ta jbekʼtaltike, mas to chakʼ jchʼun ti oy ta melel li Diose. Yuʼun akʼo mi bikʼit tajek, oy stu. Mu onoʼox jnaʼtik kʼu yelan ch-abtej li kʼusitik ta yut jbekʼtaltike. ¡Toj labal xa noʼox sba!» (Teresa).

«Kʼalal ta jkʼel tayal naetik, varkoetik xchiʼuk jkotuk karoe, xi ta jakʼbe jbae: ‹¿Buchʼu van la smeltsan?›. Jech kʼuchaʼal liʼe, li buchʼu la smeltsan li karoe, yuʼun xa onoʼox toj pʼij, yuʼun toj ep kʼusitik yichʼoj ti bikʼitik tajeke, ti lek staojan yavtake xchiʼuk ti lek xtune. Jaʼ yuʼun, mi oy buchʼu la smeltsan li karoe, jaʼ skʼan xal ti oy buchʼu la spas li krixchanoetike» (Richard).

«Kʼalal ta jchan mas ta sventa li siensiae, mas mu jchʼun-o ti kʼunkʼun kʼataj talel li kuxlejaletike. [...] Ta jnop noʼoxe, mas tsots ta chʼunel chkaʼi ti kʼunkʼun kʼataj talel li kuxlejaletike ti jaʼ mu sta jech kʼalal ta jchʼuntik ta sventa ti oy jun Jpasvaneje» (Anthony).

Akʼo mi toj ep xa jabiletik xchanojbeik tal skʼoplal li sientifikoetike, pe mu jmojuk kʼusitik kʼotem ta nopel yuʼunik ta sventa ti kʼunkʼun kʼataj talel li kuxlejaletike. Akʼo mi xchanojbeik skʼoplal, pe mu jmojuk xkʼot ta nopel yuʼunik, jaʼ yuʼun, ¿mi chopol van ti xa jakʼbe skʼoplal ta sventa li kʼusi mu to nabiluk mi melele?