Nopo ta sventa liʼe: Li Davide yakal stsʼot batel skaro ti bu mu xojtikin li bee. Kʼalal tskʼelbe sbi li kayeetike xchiʼuk li naetike, laj yakʼ venta ti chʼayeme. Xuʼ van muʼyuk laj yakʼ venta kʼusi ora chʼay ta be.

Ti voʼotuk li Davide, ¿kʼusi van laj apas?

Oy oxtos kʼusi xuʼ xapas:

1. Jaʼ ti oy buchʼu xakʼanbe ti akʼo sbeiltasot ti bu chakʼan chabate.

2. Jaʼ ti xakʼel junuk mapae o xatunes aselular o yan kʼusi sventa xakʼel bu oyote.

3. Jaʼ ti xatsʼot-o batel li akaro jaʼ to mi laj ata li be ti bu chakʼan chabate.

Li yoxtosale, jamal xvinaj ti muʼyuk lek mi jaʼ la tʼuje.

Li xchibal kʼusi stakʼ pasele, jaʼ mas lek, yuʼun oy amapa, aselular o yan kʼusi sventa sbeiltasot batel ta sjunul li bee.

Jaʼ jech xuʼ skoltaot li Vivlia eke.

Li livro ti mas ep chonbile xuʼ:

• Sbeiltasot kʼalal oy avokoltake.

• Skoltaot sventa xavojtikin aba xchiʼuk ti xapas ta jun lekil krixchanoe.

• Xchanubtasot ti kʼu yelan junuk noʼox avoʼonton chakuxie.

Kʼalal ta jchantik kʼopojele, oy kʼusitik chlik jakʼtik.

• ¿Kʼu yuʼun yox li vinajele?

• ¿Kʼusi pasbil-o li kʼanaletike?

Ta tsʼakale, chlik jakʼbe jbatik ta sventa li kʼusi oy ta jpat jxokontike.

• ¿Kʼu yuʼun oy kʼusitik chopol?

• ¿Kʼu yuʼun chijcham?

¿Mi anaʼoj ti xuʼ stakʼ Vivlia li sjakʼobiltak liʼe?

Epal krixchanoetike chalik ti noj ta jecheʼ loʼil xchiʼuk ta kʼusitik ti mu meleluk li Vivliae, o ti jaʼ jun livro ti toj voʼne xae xchiʼuk ti toj tsots ta aʼibel smelolale. Pe, ¿mi jech van ta melel? ¿Mi melel van li kʼusi chalik ta sventa Vivliae? ¿Mi muʼyuk van albilik lek smelolal?

Jech kʼuchaʼal liʼe, li krixchanoetike xchʼunojik ti chal Vivlia ti jaʼ tspas ta mantal krixchanoetik li Diose. Pe ¿mi melel van taje? Muʼyuk xa noʼox smelolal li balumile. Buyuk xa noʼox chkiltik vokolil, kʼusi kʼux ip, chamel, povreal xchiʼuk yan vokoliletik ti anil noʼox ta jnuptantike. ¿Mi jaʼ chakʼ kʼotuk ta pasel jun jkʼanvanej Dios li kʼusitik chopol chkʼot ta pasele?

¿Mi chakʼan chanaʼ buchʼu ch-ajvalilaj li ta balumile? Labal to van chavaʼi ti kʼu yelan tstakʼ li Vivliae.

Laj van avakʼ venta ti skotol li beiltaseletik laj yichʼ alel li ta foyeto liʼe, te laj yichʼ lokʼesel li ta Vivliae. Li stestigotak Jeovae xchʼunojik ta melel ti jaʼ tsbeiltasvan xchiʼuk ti xuʼ jpat koʼontontik ta stojolal li Vivliae, yuʼun jaʼ «laj yakʼ ta naʼel Dios skotol li Tsʼibetike xchiʼuk toj jtunel sventa chanubtasel, tukʼibtasel, beiltasel xchiʼuk tojobtasel ta tukʼilal» (2 Timoteo 3:16, 17). Ojtikino me li livro ti voʼne xa pasbile, pe ti oy kʼusitik achʼ xuʼ xchanubtasutik xtoke.