¿MI OY jech xavaʼi aba ek? Li Lindae toj chopol laj yaʼi li kʼusi pasbat yuʼun li ermanae. Kʼux ta alel ti kʼalal oy kʼusi chopol tspasbatik yuʼun yan yajtsʼaklom Kristo li jlome, toj kʼux chaʼiik xchiʼuk chiktaik spasel li kʼusitik sventa mantale. ¿Mi oy jech kʼotem ta atojolal?

Kʼalal oy kʼusi chopol tspasbutik junuk ermanoe, vokol van chkaʼitik ti xkakʼbetik pertone. Yuʼun li Vivliae chal ti skʼan jkʼan jbatik li yajtsʼaklomutik Kristoe (Juan 13:34, 35). Jaʼ yuʼun kʼalal oy buchʼu ta tsobobbail tsyayijesote, tsots van chavaʼi ta tsalel ti chopol chavaʼi xchiʼuk ti kʼux chavaʼie (Salmo 55:12).

Li Vivliae chal ti oy bakʼintike oy yajtsʼaklom Kristo ti tsaʼ smul ta jtojolaltike (Kolosenses 3:13). Kʼalal jech chkʼot ta jtojolaltike, vokol van chkaʼitik sventa stsal kuʼuntik. ¿Mi oy kʼusi xuʼ skoltautik? Oy, jkʼelbetik batel skʼoplal oxibuk beiltaseletik ta Vivlia.

Chchabiutik skotol ora li Jtotik ta vinajele. Yiloj skotol kʼusi chkʼot ta pasel li Jeovae, te tsakal skʼoplal mi oy kʼusi chopol chijpasbate xchiʼuk mi chkil jvokoltike (Evreos 4:13). Pe maʼuk noʼox, yuʼun kʼux chaʼi kʼalal chkil jvokoltike (Isaías 63:9). Muʼyuk me bu chakʼ ti oyuk kʼusi ‹xchʼakutik lokʼel li ta kʼanelal yuʼun Diose›, mi jaʼuk vokoliletik, at-oʼonton mi jaʼuk li yajtuneltake (Romanos 8:35, 38, 39). Jchanbetik li stalelale, mu me xkakʼtik ti oyuk kʼusi o ti oyuk buchʼu xchʼakutik lokʼel li ta kʼanelal yuʼun Jeovae.

Maʼuk skʼan xal ti lek chkilbetik xchopol talelal mi chkakʼtik ta pertone. Kʼalal chij-akʼvan ta pertone, maʼuk skʼan xal ti ta jutukajesbetik skʼoplal li kʼusi chopol la spase, ti xkaltik mi lek o mi chopole o ti ta jpakbetik skʼoplale. Li Jeovae mu bakʼinuk lek chil li mulile, ch-akʼvan ta perton kʼalal oy sprevail sventa jech tspase (Salmo 103:12, 13; Habacuc 1:13). Li Jeovae «muc teuc snacʼoj o ta sbatel osil li scʼacʼal yoʼntone», ta skoj ti oy ta yoʼonton ti jchanbetik stalelale skʼan xij-akʼvan ta perton ek (Salmo 103:9; Mateo 6:14).

Ta jtabetik sbalil kʼalal muʼyuk ta jnakʼ skʼakʼal koʼontontike. ¿Kʼuxi? Nopo noʼox ti chapet jpʼejuk ton ti jun kilo yalale, vaʼun ayeʼoj lek akʼob kʼalal apetoje. Muʼyuk van vokol chavaʼi ti jech apetoj jlikeluke. Pe, ¿kʼu van yelan chavaʼi ti jal jech xapase? Ti te apetojuk jayibuk minuto, junuk ora o mase chlub van li akʼobe. Manchuk mi jech-o yalal li tone, mas to ch-alub chavaʼi kʼalal jal te apetoje. Jaʼ jech kʼalal ta jnakʼ skʼakʼal koʼontontike: mas me ta jlajes jbatik mi jal te jnakʼojtike, manchuk mi mu tsotsuk skʼoplal. Jaʼ yuʼun li Jeovae chalbutik ti mu jnakʼ skʼakʼal  koʼontontik ta stojolal yantike, yuʼun snaʼoj ti jaʼ sventa jlekilaltike (Proverbios 11:17).

¿Kʼusi koltaat Linda sventa mu teuk snakʼoj-o skʼakʼal yoʼonton ta stojolal li ermana ti pakʼtavan ta j-elekʼe? Jtos ti kʼusi koltaate jaʼ ti la snopbe skʼoplal ti kʼu yuʼun skʼan xkakʼ jbatik ta perton ti jech chal li Vivliae (Salmo 130:3, 4). Mas to labal sba laj yaʼi ti chchʼay jmultik Jeova mi ta jchʼaybetik smul li yantike (Efesios 4:32–5:2). Ta skoj ti kʼu yelan chaʼi sba ta sventa li tekstoetik taje xi chale: «Solel jaʼ tskʼoponun stuk laj kaʼi li Jeovae».

Jaʼ yuʼun li Lindae muʼyuk te la snakʼ-o li skʼakʼal yoʼontone. Ta sjunul yoʼonton la xchʼaybe smul li ermanae, vaʼun li avie yamiga xa sbaik. Li Lindae yakal chtun-o ta stojolal Jeova. Ta melel, li Jeovae oy ta yoʼonton ti jechuk-o xatun ta stojolal eke.