Kuni ermano:

Avakʼoj van venta ti chalbe skʼoplal krixchanoetik li Vivliae. Chalbe sloʼilal viniketik xchiʼuk antsetik ti ep kʼusi kʼot ta stojolalike xchiʼuk ti ‹jaʼ jech laj yaʼi sbaik jech kʼuchaʼal li voʼotike› (Santiago 5:17). Junantike mu xa xuʼ yuʼun laj yaʼiik ta skoj svokolik xchiʼuk li kʼusi tsvul-o yoʼontonike o chopol laj yaʼi sbaik ta skoj li kʼusi la spas yutsʼ yalalik o yan yajtuneltak Diose. Yantik xtoke chlaj xa chaʼiik ta skoj ti oy smul chaʼi sbaik ta skoj ti oy kʼusi chopol la spasike.

¿Mi laj yiktaik-o komel Jeova li vaʼ krixchanoetik ti tukʼ laj yakʼ sbaike? Moʼoj. Ep jech laj yaʼi sbaik kʼuchaʼal laj yaʼi sba li jtsʼibajom yuʼun salmoe, yuʼun xi la skʼopon li Jeovae: «Chʼayemun toʼox ta be jech chac cʼu chaʼal chij ti chʼayem ta bee. Laʼ me, qʼuelun, vuʼun li avajtunelune, yuʼun muʼyuc jchʼayoj o ta coʼnton li amantaltaque» (Salmo 119:176). ¿Mi oy jech xavaʼi aba kʼuchaʼal taje?

Muʼyuk bu chchʼay ta sjol yajtuneltak li Jeovae, manchuk mi lokʼemik batel li ta korale. Yuʼun chbat saʼ talel; bakʼintike jaʼ tstunes li ermanoetik ta tsobobbaile. Nopbo avaʼi skʼoplal ti kʼu yelan koltaat yuʼun Jeova li Jobe, yuʼun ep ta tos kʼusi la snuptan, laj yil svokol ta takʼin, cham yutsʼ yalal xchiʼuk ipaj ta tsatsal chamel. Jech xtok, kuch yuʼun ti oy kʼusi chopol alilanbat yuʼun krixchanoetik ti bat spatbeik yoʼonton ta alele. Melel onoʼox ti muʼyuk laj yikta-o komel Jeovae, pe oy kʼusi kʼot ta nopel yuʼun ti mu meleluke (Job 1:22; 2:10). ¿Kʼuxi koltaat yuʼun Jeova sventa xchaʼtam sba likel li Jobe?

Li Jeovae la stunes jun yajtunel sventa skolta li Jobe, taje Eliú sbi. Li Eliue baʼyel la xchikinta kʼalal yakal chal kʼusitik la snuptan li Jobe, laje laj yal li kʼusi tsnope. ¿Kʼusi van chalbe? ¿Mi ta van xchopol kʼopta? ¿Mi solel oy smul chaʼi sba yuʼun o chkʼexav yuʼun ta skoj ti kʼu yelan chalbe mantale? ¿Mi mas xa van lek chaʼi sba li stuke? Mi jutebuk. Tijbat yoʼonton yuʼun li s-espiritu Diose, yuʼun xi laj yal li Eliue: «Coʼolutic ta stojol Dios; pasbilun ta tsʼuʼilum ec li vuʼune». Laje xi laj yalbee: «Jaʼ yuʼun muʼyuc xiʼbal jba; muc vuʼcun xa echʼem xuʼ cuʼun ta jpas jba ta atojol» (Job 33:6, 7). Muʼyuk chopol laj yaʼi sba yuʼun li Jobe, moʼoj, yuʼun ta slekil yoʼonton la stojobtas xchiʼuk la spatbe yoʼonton ta skoj ti chtun yuʼun laj yile.

Taje jech laj yichʼ pasel li jlik foyeto liʼe. Yuʼun baʼyel la jchikintakutik kʼusi tsnopik epal ermanoetik ti yiktaojik li tsobobbaile xchiʼuk la jnopkutik ti kʼu yelan li xkuxlejalike (Proverbios 18:13). Vaʼun la jpaskutik orasion xchiʼuk la jchankutik loʼiletik ta Vivlia ti bu chakʼ ta ilel kʼu yelan la skolta yajtuneltak li Jeova ti koʼoltik kʼusi kʼot ta stojolalike. Laje laj yichʼ tsʼibael ta jlik foyeto li vaʼ loʼiletik ta Vivliae xchiʼuk li kʼusitik kʼotem ta stojolal li ermanoetik avie, ta jtijkutik avoʼonton ti xakʼel batele. Avokolikuk teuk me ta ajolik ti jkʼanojotkutike.

Jtsop Jbeiltasvanej yuʼun Stestigotak Jeova