XUʼ ME xkʼot ta jun alal ikatsil kʼalal oy jmul chkaʼi jbatike. Xi la stsʼiba li ajvalil Davide: «Li jmule ijelov xa cʼalal ta jol; xcoʼlaj xa xchiʼuc jun alal icatsil ta cuchel chcaʼay» (Salmo 38:4). Jlom ermanoetike chat tajek yoʼontonik ta skoj ti tsnopik ti muʼyuk ch-akʼatik ta perton yuʼun li Jeovae (2 Korintios 2:7). ¿Mi toj nom chavaʼi aba ta stojolal Jeova ta skoj li muliletik apasoje? ¿Mi mu xakʼot ta perton avaloj ta skoj ti tsotsik tajek li amule? Junuk avoʼonton, tskoltaot yaʼi li Jeovae.

Li Jeovae muʼyuk tspʼaj li buchʼutik tsutes yoʼontonike. Jaʼ noʼox oy ta yoʼonton tskoltaan. Li Jesuse laj yalbe skʼoplal li lokʼolkʼop sventa jtoyba kerem ti lokʼ batel ta sna sventa bat mulivajuke, pe la snop sut tal ta mas tsʼakal. ¿Kʼusi kʼot ta pasel kʼalal sut tale? «Kʼalal nom to skʼan xkʼote, taat ta ilel yuʼun li stote, kʼuxubaj ta yoʼonton xnichʼon li totile, vaʼun bat snup ta be ta anil, la smey xchiʼuk la skʼunil tsʼutsʼ» (Lukas 15:11-20.) Li Jeovae xkoʼolaj xchiʼuk li totil taje ti chkʼanvan xchiʼuk chkʼuxubinvane. ¿Mi chakʼan chanopaj ta stojolal, pe mi «nom to» oyot chavaʼi? Jpʼeluk ta avoʼonton ti sjamoj xa skʼob tsmalaot li Jeovae.

¿Mi toj ep amultak o toj tsotsik avaloj ti mu xa xakʼot-o ta perton li Jeovae? Mi jeche, nopbo skʼoplal li kʼusi chal stuk Jeova li ta Isaías 1:18: «Jech chayalboxuc li Mucʼul Diose: ‹Laʼic ta jtojol ta ora, laʼ caltic cʼusi tscʼan pasel. Acʼo me batsʼi cuxul tsoj li amulique, sac chcom jech chac cʼu chaʼal tayo›». Ta melel, xuʼ xchʼay jmultik li Jeovae manchuk mi solel mu xtupʼ yilel kʼuchaʼal yatinoj tsajal tinta li sakil kʼuʼile.

Li Jeovae mu skʼan ti jech-o xkil jvokoltik ta skoj ti oy jmul chkaʼitik ta jol koʼontontike. Xkuxet tajek chkaʼitik kʼalal chakʼutik ta perton li Diose xchiʼuk ti muʼyuk kʼusi chopol chaʼi jol koʼontontike. ¿Kʼusi xuʼ xapas sventa xatae? Jaʼ ti xapas li kʼusi la spas li ajvalil Davide. Baʼyel, xi laj yale: «Jaʼ lec ta xcalbe ta jamal jmul li Mucʼul Diose» (Salmo 32:5). Xi xa yalojbot li Diose: «Laʼ caltic cʼusi tscʼan pasel». Paso li kʼusi chal Diose xchiʼuk nopajan ta stojolal kʼalal chapas orasione. Albo ta jamal li amultake xchiʼuk albo ti kʼu yelan chavaʼi abae. Xi la spas orasion ta sjunul yoʼonton li Davide: «Chʼaybun li jmule». Xi to laj yale: «Dios cuʼun, jaʼ lec chavil [...] me ta jsutes coʼntoncutic ta atojole, me ta xcat coʼntoncutic yuʼun li jmulcutique, xchiʼuc me ta jbicʼtajes jbacutic ta atojole» (Salmo 51:2, 17).

Xchibal, li Davide la xchʼam ti koltaat yuʼun jun yajkʼopojel Dios ti jaʼ li j-alkʼop Natane (2 Samuel 12:13). Avie sbiiltasoj moletik ta tsobobbailetik li Jeovae. Li moletike tojobtasbilik sventa tskoltaik li buchʼutik tsutes yoʼontonik ta skoj smulik ti tskʼan lek chil sbaik xchiʼuk Dios yan veltae. Kʼalal chbat achiʼin ta loʼil li moletike,  tstunesik Vivlia sventa tskoltaoxuk yoʼ xachaʼtam aba likel ta mantale. Jech xtok, chchiʼinoxuk ta spasel orasion sventa junuk avoʼonton xchiʼuk ti mu xa chopoluk xavaʼi abae (Santiago 5:14-16).

Vokol van chkaʼitik ti chkalbetik ta jamal jmultik li Jeovae xchiʼuk ti chkalbetik li moletike. Vokol onoʼox laj yaʼi li David eke. Li Vivliae chal ti te van kʼuk sjalil muʼyuk buchʼu laj yalbe ta jamal li smultak la spase (Salmo 32:3). Pe laj yakʼ venta ti ep sbalil kʼalal laj yal ta jamal li smule xchiʼuk ti la sjel li stalelale.

Li sbalil la stabe ti mas toj leke jaʼ ti muyubaj yan velta li Davide. Xi la stsʼibae: «Xcuxet noʼox yoʼnton li bochʼo jʼechʼel ichʼaybat, ti jʼechʼel ipasbat o perdón yuʼun smule» (Salmo 32:1). Xi la skʼanbe li Diose: «Cajval, jambun li quee; acʼo jpuc batel li alequilale» (Salmo 51:15). Jun yoʼonton laj yaʼi li Davide xchiʼuk la stojbe tajek ta vokol li Diose, vaʼun jaʼ tijbat-o yoʼonton sventa xalbe batel yantik skʼoplal li Diose.

Li Jeovae tskʼan ti xakʼupin kʼu yelan ti lekuk noʼox ajol avoʼontone. Jech xtok, tskʼan ti xamuyubajuk noʼox, lekuk noʼox ajol avoʼonton xchiʼuk ta sjunuluk avoʼonton xavalbe batel li skʼoplale xchiʼuk ti xavalbe batel yantik li kʼusi yaloj tspase (Salmo 65:1-4). Xi chalbutik li Jeovae: «Jaʼ yuʼun, suteso avoʼontonik xchiʼuk sutanik tal sventa xichʼ tupʼel li amulike, sventa chkʼot yorail li siketel oʼontonal ti te chlik talel ta stojolal Jeovae» (Echos 3:19).

Xi chal li Martha ti laj kalbetik skʼoplal ta slikebale: «Li jkereme nopajtik noʼox la stakbun batel li revista ¡Vikʼiluk me jsatik! xchiʼuk Li Jkʼel-osil ta toyole. Kʼunkʼun lik lekubuk yan velta ti kʼu yelan kamigoinoj toʼox li Diose. Toj tsots laj kaʼi kʼalal laj kʼanbe perton ta orasion ta skoj skotol li muliletik la jpase. Akʼo mi tsots laj kaʼi, laj onoʼox jkʼanbe ti xakʼun ta pertone. Mu xa noʼox chʼunbaj chkaʼi ti jaʼ to lisut tal ta stojolal Jeova kʼalal echʼem xaʼox 40 jabile. Li kʼusi kʼot ta jtojolale chakʼ ta ilel ti chakʼ sutkutik ta steklumal xchiʼuk ti xkaʼitik yan velta kʼu yelan chkʼanvan li Jeovae, manchuk mi jal xa tajek namajemutik ta stojolal».