SKOTOL li kʼusitik lek kuʼuntike likem tal ta stojolal Dios. Li Kʼakʼale la spas sventa chakʼbutik sakilal osil ta kʼakʼaltik, li Ue xchiʼuk li kʼanaletike jaʼ sventa xuʼ saksaktikuk osil ta akʼobaltik. Li Balumile la spas sventa chi jkuxiutik te.

Pe ti Diose mu jaʼuk baʼyel la spas li Kʼakʼale, li Ue, li kʼanaletike xchiʼuk li Balumile. ¿Mi xa naʼ kʼusi baʼyel la spas? Jaʼ kuxlejaletik kʼuchaʼal li stuke. Taje mu xkiltik, jech kʼuchaʼal mu xkiltik ti Diose. Li Vivliae anjeletik yakʼojbe sbi. Li anjeletike pasatik yuʼun Dios sventa chkuxiik ta vinajel xchiʼuk.

Li baʼyel anjel la spas Diose mu xkoʼolaj li ta yan anjeletike. Jaʼ sbaʼyel Nichʼon ti Diose, taje abtej xchiʼuk sTot. La skolta Dios ta spasel li kʼusitike. La skolta ta spasel li Kʼakʼale, li Ue, li kʼanaletike xchiʼuk li jBalumiltike.

¿Kʼu toʼox x-elan li Balumile? Ta slikebale muʼyuk toʼox buchʼu xuʼ xkuxi te. Kʼajomal noʼox voʼ oy ta sba. Pe ti Diose oy ox ta yoʼonton ti akʼo kuxiuk krixchanoetik ta Balumile. Jech oxal lik xchapan ta jventatik. ¿Kʼusi la spas?

Veno, ta baʼyele skʼan sakilal osil li Balumile. Jaʼ yuʼun ti Diose la jyakʼ akʼo kʼotuk xojobal Kʼakʼal ta sba li Balumile. Jaʼ jech la spas sventa oyuk akʼobaltik xchiʼuk kʼakʼaltik. Ta tsʼakal ne la jyakʼ vinajuk li balumil ta sba li mukʼta nabe.

Ta baʼyuke muʼyuk toʼox kʼusi oy li ta sba balumile. Xkoʼolaj toʼox kʼuchaʼal li lokʼol cha vil liʼe. Chʼabal toʼox nichimetik, teʼetik mi jaʼuk chonetik. Muʼyuk toʼox mi jtosuk choy li ta mukʼta nabetike. Sventa xuʼ staik lekil kuxlejal ta Balumil li chonetik xchiʼuk li krixchanoetike, ti Diose ep to kʼusitik skʼan spasan.