KʼELAVIL li kʼusi yakal chkʼot ta pasele. Ta xichʼik lokʼesel ta nichimaltik Edén ti Adán xchiʼuk Evae. ¿Mi xa naʼ kʼu yuʼun?

Yuʼun oy kʼusi toj chopol la spasik. Jaʼ yuʼun ti Jeovae ta xakʼbe stoj smulik. ¿Mi xa naʼ kʼusi la spasik ti Adán xchiʼuk Evae?

La spasik li kʼusi albatik yuʼun Dios ti mu stakʼ spasike. Li sat teʼetik ta nichimaltike albatik yuʼun Dios ti stakʼ slobeik li sate. Pe oy jtekʼ teʼ ti albatik yuʼun Dios ti mu stakʼ slobeik sate; yuʼun mi la sloʼike, ta xchamik. Yuʼun li sat teʼ taje jaʼ yuʼun ti Diose. Jnaʼojtik ti kʼalal ta jtsaktik li kʼusi maʼuk kuʼuntike, chopol, ¿mu jechuk? Vaʼun chaʼa, ¿kʼusi kʼot ta pasel?

Jun kʼakʼal kʼalal stuk te oy ta nichimaltik ti Evae, kʼoponat yuʼun jkot kiletel chon. ¡Nopo avaʼi! Li kiletel chon taje la jyalbe Eva ti akʼo sloʼ li sat teʼ ti yaloj Dios ti mu stakʼ sloʼike. Veno, kʼalal la spas Jeova li kiletel chonetike mu yuʼunuk la spas sventa chkʼopojik. Jaʼ yuʼun chaʼa oy buchʼu la jyakʼ kʼopojuk li kiletel chone. ¿Buchʼu?

Maʼuk maʼ ti Adane. Jaʼ jun kuxlejal ti spasoj Jeova kʼalal muʼyuk toʼox spasoj li Balumile. Li kuxlejaletik taje jaʼ anjeletik ti mu xvinajik ta kʼelele. Li anjel taje la stoy sba. Lik skʼan li ajvalilal yuʼun Diose xchiʼuk la skʼan ti mu xichʼ chʼunbel smantal ti Jeovae ti jaʼ akʼo chʼunbatuk li stuke. Taje jaʼ ti buchʼu la jyakʼ kʼopojuk li kiletel chone.

Ta skoj smanyail li anjel taje la sloʼla ti Evae. Ti Evae la xchʼunbe kʼalal albat ti chkʼot kʼuchaʼal Dios mi la sloʼ li sat teʼe. Jech oxal la sloʼ, ti Adane la sloʼ ek. Jaʼ yuʼun chʼay yuʼunik li bu toʼox nakalike, jaʼ xkaltik, li alakʼ sba nichimaltike, yuʼun muʼyuk la xchʼunbeik smantal ti Diose.

Pe chkʼot skʼakʼalil ti Diose tspas ta alakʼ sba nichimaltik spʼejel Balumil kʼuchaʼal li nichimaltik Edene. Ta tsʼakal ta jchantik kʼuxi xuʼ cha kolta aba ta spasel ek. Tana liʼ ne ta jkʼeltik kʼusi kʼot ta pasel ta stojolalik li Adán xchiʼuk Evae.