TI JOSEE mu xa xmuk yuʼun li kʼusi oy ta yoʼontone. La jyal mantal ti akʼo xlokʼik skotol li yajtunele. Kʼalal stuk xaʼox te xchiʼuk xchiʼiltak ta vokʼel ti Josee, lik okʼuk. Mi xnop kuʼuntik yaʼel li kʼu x-elan chʼayel to kʼot yoʼontonik li xchiʼiltak ta vokʼel Josee, yuʼun mu snaʼik ti kʼu yuʼun ch-okʼe. Ti José ne, xi la jyale: Voʼon Joseun. ¿Mi kuxul to ti jtotike?

Toj chʼayel to kʼot yoʼontonik li xchiʼiltak ta vokʼel Josee, solel mu xa xkʼopoj komik. Och xiʼel ta stojolalik. Pe ti Josee xi la jyale: Avokolikuk, nopajanik tal. Kʼalal yakal chnopajik batele, li Josee xi la jyale: Voʼon li avitsʼinikun Josee, ti buchʼu la achonik tal ta Egiptoe.

Ti Josee lek yoʼonton ikʼopoj-o batel: Mu xa vakʼbe aba amulinik ti la achonikun tale. Ta melel jaʼ Dios ti buchʼu la stakun tal ta Egipto sventa muʼyuk buchʼu xcham. Ti Faraone la svaʼanun ta ajvalil ta sjunul slumal Egipto. Jech oxal anil xa batik ta stojolal li jtotike xchiʼuk albeik skotol li kʼusi la avilike. Albeik ti akʼo tal nakluk liʼe.

Vaʼun ti José ne la smey xchiʼuk la stsʼutsʼanbe sat skotol li xchiʼiltak ta vokʼele. Kʼalaluk li Faraón la jyaʼi ti talem xchiʼiltak ta vokʼel ti Josee, xi la jyale: Akʼo yichʼik batel karetaetik xchiʼuk akʼo yikʼik talel li atotike xchiʼuk li yutsʼ yalalike. Akʼo talikuk skotolik. Jaʼ chkakʼbeik li balumil ti bu toj lek ta sjunul Egiptoe.

Jech la spasik ti kʼux-elan albatike. Tana liʼ ne te cha vil José ti yakal tskʼopon stot ti kʼalal vul xa ta Egipto xchiʼuk skotol li yutsʼ yalaltake.

Li yutsʼ yalaltak Jacobe epajem xa tajek. Oyik xa 70 ta skotolik ti kʼalal talik ta naklej ta Egiptoe, xchiʼuk xa Jacob, xnichʼnabtak xchiʼuk smamomtak. Pe teik ek li yajnilike xchiʼuk ep van smosovik te xtok. Te lik nakiikuk ta Egipto. J-israeletik sbiinojik, yuʼun ti Jacobe Israel xa onoʼox sbi akʼbil yuʼun Dios. Jech oxal ta tsʼakale jaʼ jun tʼujbil jteklum ikʼot ta stojolal Dios.