TI JOSEE tskʼan tsnaʼ mi chopolik to xchiʼuk mi chʼabal slekil yoʼontonik li lajunvoʼ sbankiltake. Jech oxal xi la jyale: Voʼoxuke jaʼ jpaʼivanejoxuk. Tal akʼelik bu kʼun li jlumalkutike.

Moʼoj, maʼuk jpaʼivanejunkutik, xiik. Mu jnaʼ xi loʼlavankutik. Jkotol kitsʼin jbankil jbakutik. Lajchaʼvoʼunkutik toʼox. Pe oy jun kitsʼinkutik ti muʼyuk xa te jchiʼukutik ta nakleje, li jkʼox itsʼinkutike te ta na xchiʼuk jtotkutik.

Mu xchʼun yilel la spas sba li Josee. La jyal mantal ti akʼo stikʼik ta chukel ti Simeone. Li yan sbankiltake la jyakʼbe xkuch batel veʼliletik xchiʼuk ti akʼo sutikuk batel ta snaike. Pe xi la jyalanbe batele: Kʼalal mi la sutik tale, persa me xa vikʼbikun tal li akʼox itsʼinike.

Kʼalal kʼot ta snaik ta Canaane, kʼot xchapbeik stotik Jacob skotol li kʼusi kʼot ta pasele. Ti Jacobe ta svul tajek yoʼonton. Ti Josee muʼyuk xa onoʼox liʼ jchiʼuke, jech noxtok li Simeone muʼyuk xa sutal, xi. Mu xkakʼ xa vikʼik batel li jkʼox kerem Benjamine, xi. Pe ti kʼalal yakal chlaj xa batel li sveʼelike, ti Jacobe la jyakʼ batuk ta Egipto li Benjamine sventa chbat xkuchik tal yan veʼliletik.

Vaʼun te xa xtal la jyil xchiʼiltak ta vokʼel ti Josee. Xmuyubaj xa tajek ti kʼalal la jyil li yitsʼine. Ta melel, muʼyuk buchʼu snaʼ yuʼunik mi jaʼ José li vinik lek ichʼbil ta mukʼe. Ti José ne oy kʼusi ta spas sventa tspas ta preva li lajunvoʼ xchabankiltake.

La jyalbe yajtuneltak ti akʼo snojesbeik xkoxtaltak li xchiʼiltak ta vokʼele. Muʼyuk bu la jyalbe li xchiʼiltak ta vokʼele, pe la jyalbe mantal yajtuneltak ti akʼo stikʼbeik ochel ta xkoxtal Benjamín li skʼupil vaso pasbil ta sakil takʼine. Kʼalal bat xaʼox skotolike xchiʼuk ti kʼalal nomnom xaʼox xlokʼik batele, ti Josee la stak batel yajtuneltak sventa tstaik ta be li xchiʼiltak ta vokʼele. Kʼalal tavanik ta bee, xi la jyalike: ¿Kʼu yuʼun la velkʼanbeik tal svaso pasbil ta sakil takʼin li kajvalkutike?, xiik.

Muʼyuk xkelkʼanbekutik svaso, xi skotolik. Mi oy buchʼu junukal kuʼunkutik te yichʼoj li vasoe, akʼo yichʼ milel.

Jaʼ yuʼun li jtuneletike la saʼik ta skotol koxtaletik, te la staik ta xkoxtal Benjamín, jech kʼuchaʼal cha vil liʼe. Li jtuneletike xi la jyalike: Li voʼoxuke xuʼ xa batik, pe li Benjamine ta xi xchiʼinunkutik sutel. ¿Kʼusi van tspasik tana li lajunvoʼ chabankilaletike?

Skotolik la xchiʼinik sutel Benjamín ta sna li Josee. Xi la jyalbe sbankiltak ti Josee: Xuʼ xa sutik batel ta ana akotolik, pe li Benjamine liʼ ta xkom ta jmosove.

Li Judae ikʼopoj, xi la jyale: Mi chʼabal jchiʼuk sutel li kereme, li jtote chcham un bi. Jech oxal, avokoluk, mosovinun li voʼone, pe koltao batel li kereme.

Ti Josee la jyakʼ venta ti jelel xa li sbankiltake. Muʼyuk xa chopolik xchiʼuk oy xa slekil yoʼontonik. Jkʼeltikik kʼusi tspas tana ti Josee.