KʼELAVIL li nichimetike xchiʼuk li yijil almendraetik ti chʼi lokʼel ta teʼ o ta namteʼale. Jaʼ snamteʼ li Aarone. ¡Li nichimetik liʼe xchiʼuk li yijil sat teʼe, ta jun noʼox akʼobal chʼi lokʼel! Jkʼeltikik kʼu yuʼun.

Jal ta jmoj ti bu yalel muyelik ta butikuk noʼox ta xokol balumil li j-israeletike. Jlom j-israeletik mu skʼanik ti jaʼuk Moisés ti jbabe yuʼunike, jech noxtok mu skʼanik ti jaʼuk mero bankilal pale li Aarone. Li Coree jech ta snop, Datán, Abiram xchiʼuk 250 bankilaletik yuʼun li j-israeletike jech ta snopik ek. Bat skotolik ta stojolal Moisés, xi la jyalbeike: ¿Kʼu yuʼun ti toj mukʼ cha vakʼ aba ta jtojolalkutike?, xiik.

Li Coré xchiʼuk li yajtsʼaklomtake xi albatik yuʼun li Moisese: Ichʼik tal yav avakʼalik sob okʼom, tal akʼo apomik. Talanik li ta xchʼulna Jeova pasbil ta nukule. Te chkiltik buchʼu ta stʼuj li Jeovae.

Ta yokʼomal ne, talik ta chʼulna pasbil ta nukul li Coré xchiʼuk li 250 yajtsʼaklomtake. Jech noxtok ep buchʼutik tal chiʼinatikuk. Ilinem tajek li Jeovae. Namajeso abaik lokʼel li ta skarpanaik li chopol krixchanoetike. Mu xa pikbeik li kʼusitik yuʼunike, xi li Moisese. Li krixchanoetike la xchʼunik, namajik lokʼel li ta skarpanaik li Coré, Datán xchiʼuk Abirame.

Vaʼun li Moisese la jyal: Jaʼ to jech cha naʼik buchʼu ta stʼuj ti Jeovae. Li balumile chjav, jech chbikʼatik yalel li chopol viniketik liʼe.

Jaʼ noʼox kʼalal laj kʼopojuk li Moisese, jav li balumile. Ti kʼalal ochem xaʼox yalel ta balumil li skarpana xchiʼuk li kʼusitik yuʼunik li Coree, xchiʼuk ti kʼalal ochem xaʼox yalel li Datán, Abiram xchiʼuk li yantik yajtsʼaklomtak Coree, li balumile la snub sba. Li buchʼutik chbikʼatik yalel yuʼun li balumile solel x-avlajetik. Ti kʼalal la jyaʼiik li yan krixchanoetike tsots xi la jyalike: ¡Anilajanik! ¡Yuʼun li balumile xuʼ xi sbikʼutik yalel ek!

Li Coré xchiʼuk li 250 yajtsʼaklomtake te to nopol oyik li ta chʼulna pasbil ta nukule. Jech oxal li Jeovae la jyakʼ tal kʼokʼ, jaʼ jech kʼakʼ skotolik. Vaʼun ti Jeovae la jyalbe Eleazar, li xnichʼon Aarone, ti akʼo stsakbe li yav yakʼal li animaetike xchiʼuk akʼo spas ta jun pechpech takʼin sventa tsmak li skajleb matanale. Li kʼusi la jyichʼ makel-o li skajleb matanale jaʼ chtun sventa svulesobil ta sjol li j-israeletik ti jaʼ noʼox Aarón xchiʼuk xnichʼnabtak xuʼ xtunik ta paleal yuʼun li Jeovae.

Pe ti Jeovae oy ta yoʼonton chakʼ lek ta ilel ti jaʼ stʼujoj ta paleal li Aarón xchiʼuk li xnichʼnabtake. Jaʼ yuʼun xi la jyalbe li Moisese: Akʼo yichʼ tal snamteʼik li bankilaletik ta jujuchop utsʼ-alalil yuʼun Israele. Li ta jchop utsʼ-alalil Levie jaʼ Aarón ti chichʼ talel snamteʼe. Vaʼun te xa vakʼ ta chʼulna pasbil ta nukul ta yeloval xkaxail mantal. Li vinik ti buchʼu jtʼujoj ta paleale ta x-ayan xnichimaltak li snamteʼe, xi li Jeovae.

Kʼalal li Moisés la skʼel ta yokʼomale, ¡li snamteʼ Aarone ayan xnichimaltak xchiʼuk almendraetik ti yijunebike! ¿Mi la avakʼ venta ti kʼu yuʼun la jyakʼ ayanuk xnichimaltak li snamteʼ Aarón ti Jeovae?