¿MI XA vil li kʼusi yakal ta xkʼot ta pasele? Li krixchanoetik liʼe jaʼ soltaroetik ta Israel. Li buchʼutik tsnujan sbaik cha vile, yakal ta xuchʼik voʼ. Li jchapanvanej Gedeone te nopol oy ta stojolalik. Yakal tskʼel kʼu x-elan ta xuchʼik voʼ.

Kʼelavil lek kʼux-elan jelel ta xuchʼik voʼ li viniketike. Yantike solel tsnujan sbaik yalel. Pe oy jun vinik ti tsjop muyel ta skʼob yuchʼ li voʼe, sventa xil kʼusi chkʼot ta pasel ta spat xokon. Liʼe toj tsots skʼoplal, yuʼun ti Gedeone albat yuʼun Jeova ti jaʼ akʼo stʼuj li buchʼutik yakal tskʼelik kʼusi chkʼot ta pasel ta spat xokonik kʼalaluk chuchʼik voʼe. Li yantike skʼan sut batel ta snaik. Jkʼeltikik kʼu yuʼun.

Li j-israeletike toj ep svokolik noxtok, yuʼun muʼyuk la xchʼunbeik smantal li Jeovae. Li jmadianetike toj echʼ noʼox xuʼ yuʼunik jaʼ yuʼun chakʼbeik svokol li j-israeletike yuʼun mu xkoʼolaj stsatsalik. Jech oxal la skʼanik koltael ta stojolal Jeova li j-israeletike, li Jeovae la jyaʼi li kʼusi kʼanbate.

Li Gedeone albat yuʼun Jeova ti akʼo stsob yajsoltarotake, jech oxal li Gedeone la stsob 32.000 jpas letoetik. Pe li yajkontra Israele oy 135.000 viniketik ta skotol. Pe bu cha ta, li Jeovae xi la jyalbe li Gedeone: Toj ep to li aviniktake. ¿Kʼu yuʼun jech ta xal taje?

Yuʼun mi kuch yuʼunik ta pas leto li j-israeletike, xuʼ van ta snopik ti kuch yuʼun ta yip stukike ti muʼyuk chtun yuʼunik li koltael chakʼ Jeovae. Jaʼ yuʼun ti Jeovae xi la jyalbe li Gedeone: Albo ti akʼo sutikuk batel ta snaik li buchʼutik ta xiʼike. Kʼalaluk jech la spas ti Gedeone, 22.000 jpas letoetik sutik batel. Kʼajomal xa noʼox lajunmil krixchanoetik komik ta pas leto ta skontra li 135.000 soltaroetike.

Pe, ¡aʼyo avaʼi! Xi la jyal li Jeovae: Oy to ep aviniktak, xut. Li Gedeone albat ti akʼo yakʼbe yuchʼ voʼ li viniketik li ta be voʼ liʼe, jech noxtok albat ti akʼo stak batel ta sna li buchʼutik solel tsnujan sbaik yalel ta yuchʼel li voʼe. Li Jeovae xi la jyal ta melele: Ta xkakʼ kuchuk avuʼun li letovajel ta 300 noʼox aviniktak ti la skʼelik kʼusi yakal chkʼot ta pasel ta spat xokonik kʼalaluk la jyuchʼik li voʼe.

Kʼot skʼakʼalil li pas letoe. Li Gedeone la xchʼak ta oxvokʼ li 300 sviniktake. La jyakʼbe jujun xkachuik xchiʼuk jujupʼej skʼibik ti te tikʼil batel stojale. Kʼalal jutuk xaʼox mu oʼlol akʼobale, la sjoyibtaik skarpanatak li yajkontraike. Vaʼun, jmoj skotolik, la jyokʼesan li xkachuike xchiʼuk la svokʼ li skʼibike, xchiʼuk xi avanike: ¡Leto ta sventa Jeova xchiʼuk ta sventa Gedeón! Kʼalal julavik li jkontrainvanejetike, mu snaʼ kʼusi tspasik xchiʼuk xiʼik. Jatav skotolik, vaʼun kuch yuʼun li j-israeletike.