¿KʼUSI yakal chjin-o li smuroaltak Jericoe? Xkoʼolaj yilel ti kʼot jpʼej mukʼta vomba ta stojolale. Pe taj toʼoxe muʼyuk toʼox vombaetik mi jaʼuk kanyonetik. ¡Jaʼ yan skʼelobil sjuʼel li Jeovae! Jkʼeltikik kʼuxi kʼot ta pasel.

Aʼyo avaʼi li kʼusi albat yuʼun Jeova li Josuee: Voʼot xchiʼuk li avajsoltarotake chano avokik ta spat xokon li lum Jericoe. Joyobtaik jun velta ta kʼakʼal, vakib kʼakʼal jech xa pasik. Kuchik batel li xkaxail jmantale. Vukub paleetik akʼo jelavikuk batel ta stojolal li xkaxail jmantale xchiʼuk akʼo yokʼesanik li xkachuike.

Li ta svukubal kʼakʼale joyobtaik vukub velta li lume. Vaʼun jal xa vokʼesik li kachuetike xchiʼuk tsots xa avanik kʼuchaʼal jpas leto. ¡Jech ta xjin yalel li muroetike!

Li Josué xchiʼuk li jteklume la spasik li kʼusi la jyal Jeovae. Tsʼijil skotolik kʼalal chchan yokike. Li kʼusi noʼox chichʼ aʼyele, jaʼ noʼox li xkachuike xchiʼuk li yok jpas letoetike. Ta melel xiʼik tajek li buchʼutik chkontrainvanik ta Jericoe. ¿Mi xa vil li tsajal chʼojon te jokʼol ta ventanae? ¿Buchʼu sventana leʼe? Jaʼ, li Rahabe la spas li kʼusi la jyal li chaʼvoʼ jpaʼivanejetike. Te xchiʼuk skotol yutsʼ yalal, yakal tsmalaik kʼusi chkʼot ta pasel.

Ta svukubal xa kʼakʼal ne, kʼalal la xa xchan yokik vukub velta ta spat xokon li lume, la jyichʼan okʼesel li kachuetike, avanik li soltaroetike, laj ne ijin yalel li muroetike. Xi la jyal li Josuee: Milik li krixchanoetike, xchiʼuk chikʼik li lume xchiʼuk skotol li kʼusi te oye, jaʼ noʼox mu xa chikʼik li sakil takʼine, li kʼanal takʼine xchiʼuk li tsatsal takʼine, yuʼun chichʼ akʼel ta skʼejobil skʼulejal Dios te ta chʼulna pasbil ta nukul.

Xi albatik yuʼun Josué li chaʼvoʼ jpaʼivanejetike: Ba lokʼesik ta sna li Rahabe xchiʼuk li yutsʼ yalaltake. Li krixchanoetik taje kuxul komik, jech kʼuchaʼal yalojik ta melel li chaʼvoʼ jpaʼivanejetike.