¿MI XA vojtikin li alakʼ sba tseb ti chtal ta stojolal Davide? Jaʼ sbi Abigail. Leʼe lek snaʼ snopel, jech la spajtsan David sventa mu kʼusi chopol ta spas. Pe muʼyuk to bu ta jchantik taje, jaʼ baʼyel ta jkʼeltik li kʼusi kʼotemik ta pasel ta stojolal li Davide.

Kʼalaluk jatav ta skoj Saúl li Davide, la snakʼ sba ta nail chʼen. Li xchiʼiltak ta vokʼel xchiʼuk li yantik yutsʼ yalaltake batik ti bu oy li Davide. Xchiʼuk noxtok jutuk mu 400 viniketik batik ta stojolal, jaʼ kʼot ta bankilal yuʼunik li Davide. Ti Davide bat ta stojolal ajvalil ta Moab, xi la jyalbee: Avokoluk, chiʼinbun komel li jtot jmeʼe jaʼ to mi la jnaʼ li kʼusi chkʼot ta pasel ta jtojolale. Vaʼun li David xchiʼuk li sviniktake lik snakʼ sbaik ta teʼtik.

Ta mas tsʼakal, li Davide la jyojtikin Abigail. Li smalale, jaʼ sbi Nabal, jkʼulej vinik ti toj ep sbalumiltake. Oy oxmil xchijtak xchiʼuk jmil stentsuntak. Li Nabale toj simaron. Pe li Abigaile, li yajnil Nabale, snaʼ spasel li kʼusi leke. Jech xtok toj alakʼ sba. Jun veltae oy kʼusi la spas sventa mu xlaj ta milel li yutsʼ yalale. Jkʼeltikik kʼuxi la jyut.

Li David xchiʼuk sviniktake toj lek yoʼontonik ta stojolal li Nabale. Skoltaojik ta skʼelbel xchij. Oy jun kʼakʼal, li Davide la stak batel sviniktak sventa tskʼanik vokol ta stojolal Nabal. Kʼalal kʼotik li sviniktak Davide, li Nabal xchiʼuk yajtuneltake yakal ta slokʼbeik stsatsal xchijtak. Jaʼo oy kʼin, jech oxal li Nabale toj ep lekil veʼliletik yuʼun. Jaʼ yuʼun xi la jyalik li sviniktak Davide: Lek koʼontonkutik ta atojolal. Muʼyuk bu xkelkʼankutik mi jkotuk achij, jaʼ noʼox jkoltaojotkutik ta skʼelel. Jech oxal, avokoluk akʼbunkutik jutebuk kʼusi jlajeskutik, xiik.

Li Nabale xi la stakʼe: Muʼyuk ta xkakʼbe sveʼel viniketik kʼuchaʼal voʼoxuke, xi. Toj tsots ye chkʼopoj xchiʼuk ep kʼusitik chopol ta xal ta stojolal David. Kʼalaluk li viniketik la jyalbeik yaʼi David li kʼusi la jyal Nabale, li Davide ilin ta jyalel. Xi la jyale: ¡Chukino avespadaik!, xi. Vaʼun lokʼik batel, sventa chba smilik li Nabale xchiʼuk li sviniktake.

Oy jun svinik li Nabale, kʼalaluk la jyaʼi li kʼusitik chopol la jyal li Nabale, bat yalbe Abigail. Ta anil noʼox lik xchapan veʼlil li Abigaile, la skajan batel ta sburotak vaʼun la stam batel sbe. Kʼalal la sta li Davide, yal li ta sburoe, vaʼun la spatan sba ta balumil xchiʼuk xi la jyale: Avokoluk, bankilal, mu xa tukʼulanbe li kʼusi la jyal li jmalal Nabale. Yuʼun bol vinik, jech oxal bolik li kʼusi tspase. Liʼ kichʼojbot tal amotone. Tsako avokoluk xchiʼuk chʼayo li jmulkutike, xi li Abigaile.

Toj pʼijot, xi la stakʼ li Davide. La apajtsanun ta smilel Nabal ta skoj ti toj chopol kʼusi la spase. Junuk avoʼonton sutan batel ta ana, xut. Kʼalaluk cham li Nabale, li Abigaile kʼot ta yajnil David.