VAXAKIB jabil yichʼoj Josías kʼalal lik sventain li chaʼvokʼ nitilulal ta Israel ta sure. Toj kʼox to sventa ch-ajvalilaj. Jaʼ yuʼun, koltaat yuʼun krixchanoetik ti oy xa sjabilalik sventa tsventain li jteklume.

Kʼalal vukub xaʼox jabil yochel ta ajvalil li Josiase, lik saʼ Jeova. Jaʼ la xchanbe stalelal li lekil ajvaliletik kʼuchaʼal David, Josafat xchiʼuk Ezequías. Manchuk mi uni kerem to, oy kʼusi ta spas ti skʼan tsotsuk yoʼontone.

Ep jabiletik jutuk mu skotoluk li j-israeletike toj ven chopolik. Ta smuyubtaik jecheʼ diosetik. Ta skejan sbaik ta stojolal santoetik. Jech oxal li Josías xchiʼuk sviniktake lik slokʼesik ta lum li smuyubtael jecheʼ diosetike. Taje jaʼ jun tsatsal abtel, yuʼun epal krixchanoetik ta smuyubtaik jecheʼ diosetik. Jaʼ yuʼun te cha vil Josías xchiʼuk sviniktak ti yakal ta slilinik li santoetike.

Ta mas tsʼakal, li Josiase la svaʼan oxvoʼ viniketik sventa chchaʼmeltsanik li xchʼulna Jeovae. La jyichʼ tsobel takʼin ta jteklum sventa x-akʼbat li viniketik ti chchaʼvaʼanik li chʼulnae. Kʼalaluk yakal ch-abtejik li ta chʼulnae, li mero bankilal pale Hilquiase oy kʼusi la sta ti toj tsots skʼoplale: Jaʼ li slivroal smantal Jeova ti la stsʼiba toʼox Moisés ta voʼnee, li livro taje chʼayem toʼox.

Kʼalal la jyichʼbeik batel Josías li livroe, la skʼan ti akʼo kʼelbatuke. Kʼalal la jyaʼie, li Josiase la jyakʼ venta ti muʼyuk ta xchʼunbeik smantal Jeova li jteklume. Lik svul yoʼonton, vaʼun la sjat skʼuʼ kʼuchaʼal cha vil ta lokʼole. Xi la jyale: Li Jeovae ilinem ta jtojolaltik, yuʼun li jtot jmeʼtike muʼyuk la xchʼunik li mantaletik liʼ tsʼibabil ta livroe.

Li Josiase la jyalbe li mero bankilal pale Hilquías ti akʼo sjakʼ li kʼusi tspasbatik yuʼun Jeovae. Li Hilquiase bat skʼel li meʼ jchʼul alkʼop Huldae sventa tsjakʼbe kʼusi yaloj Jeova. Li Huldae la jyalbe batel Hilquías li yaʼyej Jeova sventa chbat yalbe li Josiase, li aʼyeje xi ta xale: Li Jerusalén xchiʼuk skotol li jteklume ta stoj smulik yuʼun yakal ta smuyubtaik li jecheʼ diosetike xchiʼuk noxtok li balumile noj ta choplejal. Pe li voʼote, Josías, apasoj li kʼusi leke, jech oxal li stojobil mulil liʼe jaʼ to ta xtal mi la cham xaʼoxe.