LI JFILISTAETIKE tal saʼik kʼop noxtok ta stojolal li Israele. Li oxvoʼ sbankiltak Davide ochemik ta yajsoltarotak Saúl. Jech oxal, oy jun kʼakʼal xi albat yuʼun Isaí ti Davide: Ba akʼbo sbekʼtak trigo xchiʼuk panetik li abankiltake. Kʼelokik kʼu x-elanik, xut.

Kʼalaluk kʼot ti bu oy li karpanaetike, bat ta anil ti bu tspasik letoe yuʼun chba saʼ li sbankiltake. Li mukʼta natil tsatsal jfilista Goliate lokʼ slaban li j-israeletike. Jech la spasilan 40 kʼakʼal ta jujun sob xchiʼuk ta jujun akʼobal. Xi tsots avane: Tʼujik tal junuk vinik sventa ta jtsak jbakutik ta milel. Mi jaʼ kuch yuʼun xchiʼuk mi la smilune, ta xi ochkutik ta mosovik un bi. Yan mi voʼon kuch kuʼun xchiʼuk mi la jmile cha ochik ta jmosovkutik un bi. Yuʼun tal jsaʼoxuk ta kʼop, takbikun tal junuk vinik sventa ta jtsak jbakutik ta milel, xi li Goliate.

Li Davide xi la sjakʼbe jayvoʼ soltaroetike: ¿Kʼusi chichʼ akʼbel li buchʼu ta smil li jfilista vinik leʼe, xchiʼuk sventa jech chlaj skʼoplal li kʼexlal chakʼbe Israele?

Ta x-akʼbat skʼulejal yuʼun Saúl, xi jun soltaro. Xchiʼuk ta xakʼbe yikʼ stseb li Saule.

Pe skotol li j-israeletike ta xiʼtaik li Goliate yuʼun toj mukʼ. Jutuk mu oxibuk metro snatil, xchiʼuk oy jun yajsoltaro ti xkuchojbe batel smakobile.

Oy jayvoʼ soltaroetik la jyalbeik Saúl ti chbat yaʼi David ta stsakel ta leto li Goliate. Pe li Saule xi la jyalbe li Davide: Mu xuʼ avuʼun. Yuʼun uni keremot to, yan leʼe ta sbikʼtal onoʼox xchanoj soltaroal. Li Davide xi la stakʼe: Li voʼone la jmil jkot oso xchiʼuk jkot leon ti la xaʼox skatsʼbeik batel xchijtak li jtote. Li jfilista vinik tana leʼe, xkoʼolaj kʼuchaʼal li chonetik taje. Jeova chi skoltaun. Ta skoj taje, li Saule xi la jyale: Batan chaʼa, Jeova xa xchiʼinot batel, xut.

Li Davide yal batel ta jun ukʼum, te bat stsob tal voʼpʼej ton ti lek chʼululike, jech la stikʼ batel ta xvorxa. Vaʼun lokʼ tal li ta ukʼume stsakoj batel xjimichʼ sventa chbat spas kʼop xchiʼuk li mukʼta natil tsatsal vinike. Li Goliate mi jsetʼuk xchʼun. Toj kʼun ta milel chil li Davide.

Laʼ liʼe, xi li Goliate, yuʼun ta xkakʼbe stiʼ mutetik xchiʼuk yantik chonetik li abekʼtale, xut. Pe li Davide xi la stakʼe: Ta xtal atsakun ta milel ta avespada, ta alansa xchiʼuk ta jichʼil takʼin ti tsʼubtsʼub sniʼe, jaʼuk ti voʼone ta jtsakot ta milel ta sbi Jeova. Tana liʼ ne, ti Jeovae ta xakʼot ta jkʼob xchiʼuk ta jmilot.

Vaʼun ti Davide anil bat ta stojolal Goliat. La slokʼes jpʼej ton ta xvorxa, la jyakʼ ta xjimichʼ vaʼun ta skotol yip la sjimbe batel li Goliate. ¡Och ta sjol li Goliate, toj chamel ikʼot! Kʼalaluk li jfilistaetik la jyilik ti yal ta lum li bankilal yajsoltaroike jatavik batel. Pe li j-israeletike la stijluik batel, jech kuch yuʼunik li pas letoe.