LOKʼ xa lajuneb jabil ti ikʼatik batel ta Babilonia yuʼun Nabucodonosor li j-israeletik ti lek chanemike. ¡Tana liʼ ne kʼelavil! Li Jerusalene yakal ta xichʼ chikʼel, jech noxtok li j-israeletik ti muʼyuk chamike, yakal ta xichʼik chukel batel ta Babilonia.

Vuleso ta ajol ti jech albatik yuʼun jchʼul alkʼopetik ti jech onoʼox chkʼot ta pasel mi mu xiktaik spasel li kʼusitik chopole. Pe li j-israeletike muʼyuk bu la xchikintaik li kʼusi la jyalik li jchʼul alkʼopetike. Jaʼ la smuyubtaik-o li jecheʼ diosetike, maʼuk la smuyubtaik li Jeovae. Jech oxal staʼo stoj smulik. Taje ta jnaʼtik, yuʼun Ezequiel li yajchʼul alkʼop Diose chalbutik li kʼusitik chopol tspas li j-israeletike.

¿Mi xa naʼ buchʼu li Ezequiele? Jaʼ li buchʼu la jyichʼ ikʼel batel ek ta Babilonia yuʼun li ajvalil Nabucodonosor leʼ xa ta lajuneb jabil kʼalal skʼan toʼox xtal ta stojolal Jerusalén li mukʼta lajel liʼe. Li Daniel xchiʼuk li oxvoʼ yamigotake, li Sadrac, Mesac xchiʼuk Abed-negoe, jmoj yorail la jyichʼik ikʼel batel ta Babilonia xchiʼuk li Ezequiele.

Kʼalaluk te to oy ta Babilonia li Ezequiele, akʼbat yil yuʼun Jeova skotol li kʼusi chopol tspasik te ta chʼulna ta Jerusalene. Taje ta sjuʼel Jeova akʼbat yil. Manchuk mi te to ta Babilonia li Ezequiele, la jyil skotol li kʼusitik tspasik te ta chʼulnae. ¡Toj echʼ noʼox chopol li kʼusi la jyile!

Kʼelavil li kʼusitik toj chopol tspas li krixchanoetik liʼ ta chʼulnae, x-utat yuʼun Jeova li Ezequiele. Kʼelavil li ta yibeltak nae te slokʼtaojik kiletel chonetik xchiʼuk yantik chonetik. Pe ¡kʼelavil, li j-israeletike yakal ta smuyubtaik! Li Ezequiele ta xil li kʼusitik taje xchiʼuk la stsʼiba ta vun li kʼusi yakal chkʼot ta pasele.

¿Mi xa vil li kʼusi yakal tspasik ta mukul li bankilaletik ta Israele?, x-utat yuʼun Jeova li Ezequiele. Ta melel xil noxtok liʼe. Oy 70 viniketik, skotol yakal ta smuyubtaik jecheʼ diosetik. Xi ta xalike: Mu xi jyilutik li Jeovae. Lokʼem xa batel ta jlumaltik, xiik.

Vaʼun ti Jeovae la jyakʼbe yil Ezequiel jlom antsetik ti te oyik ta tiʼ na ta snorteal li chʼulnae. Te chotol yakal ta smuyubtaik li jecheʼ dios Tamuze. ¡Kʼelavil noxtok li viniketik ti te oyik ta yochebal xchʼulna Jeovae! Oy 25 ta voʼ. Li Ezequiele la jyil taje. ¡Kejelik batel ta slokʼeb Kʼakʼal, yakal ta smuyubtaik li Kʼakʼale!

Li krixchanoetik liʼe mu xi stsakikun ta mukʼ, xi li Jeovae. ¡Yuʼun maʼuk noʼox ta spasik li kʼusitik chopole, moʼoj, yuʼun liʼ chtal spasik ta jchʼulnae! Jaʼ yuʼun ti Jeovae xi la jyal ta melele: Ta xaʼiik kʼu stsatsal li jtiʼole. Muʼyuk bu kʼux chkaʼi kʼalal mi tal li slajelike, xi.

Jutuk xaʼox mu oxibuk jabil yechʼel ti kʼalal akʼbat yil Ezequiel li kʼusitik taje, li j-israeletike jaʼo lik stoy sbaik ta stojolal li ajvalil Nabucodonosore. Jech oxal bat spas leto ta skontra li j-israeletike. Ta jun jabil xchiʼuk oʼlol, li jbabiloniaetike la svokʼik ochel li smuroaltak Jerusalene, vaʼun la xchikʼik li lume. Jutuk mu skotoluk cham li krixchanoetike, li yantike chukbil batik ta Babilonia.

¿Kʼu yuʼun la jyakʼ Jeova ti akʼo taluk li chopol lajel ta stojolal li j-israeletike? Yuʼun muʼyuk la xchikintabeik mi jaʼuk la xchʼunbeik smantaltak li Jeovae. Taje chakʼ kiltik ti tsots skʼoplal skʼan jpastik-o li kʼusi chi yalbutik li Jeovae.

Ta baʼyele la jyichʼik iktael uni jvokʼ krixchanoetik li ta slumal Israele. Li ajvalil Nabucodonosore la svaʼan komel jun judío vinik ti jaʼ sbi Gedalías sventa tsventain li krixchanoetik taje. Pe oy jlom j-israeletik la smilik li Gedaliase. Vaʼun li krixchanoetike ta xiʼtaik li jbabiloniaetike, jaʼ ti mi ta xtal milatikuk skotolik ta skoj taje. Jech oxal la sujik Jeremías sventa xjatav batel xchiʼukik ta Egipto.

Ta skoj taje muʼyuk buchʼu te kom li ta yosilal Israele, 70 jabil muʼyuk buchʼu te xnaki. Solel xokol kom ta jyalel. Pe li Jeovae la jyal ta melel ti mi lokʼ 70 jabile ta xchaʼikʼ sutel tal li slumale. Pe kʼalal te to oyik ta Babiloniae, ¿kʼusi yakal chkʼot ta pasel ta stojolal li slumal Dios tee? Jkʼeltikik.