¡KʼELAVIL li kʼusi toj chopol yakal chkʼot ta pasele! Yakal ta smilik li Jesuse. Jokʼol ta teʼ yuʼunik. Spajojbeik laux ta skʼob xchiʼuk ta yok. ¿Buchʼu xa noʼox jech ta skʼan ta spas taje?

Yuʼun ep krixchanoetik chopol ta xilik li Jesuse. ¿Mi xa naʼ buchʼutik taje? June jaʼ Satanás ti Diablo sbi xtoke. Jaʼ ti buchʼu la spas ti akʼo mu xchʼunbeik smantal Jeova li Adán xchiʼuk Evae. Jaʼ la spas noxtok ti akʼo spasik li kʼusi toj chopol li yajkontratak Jesuse.

Kʼalal mu toʼox ta xjokʼanat ta jtel teʼ yuʼun yajkontratak li Jesuse, ep kʼusitik toj chopol pasbat. ¿Mi xvul ta ajol ti talik ta nichimaltik Getsemaní xchiʼuk ti la jyikʼik batel li Jesuse? ¿Buchʼutik li jkontrainvanejetik taje? Jaʼ, jaʼik li jnitvanejetik ta relijione. Jkʼeltikik kʼusi kʼot ta pasel ta mas tsʼakal.

Kʼalal la jyikʼik batel Jesús li jnitvanejetik ta relijione, li jtakboletike jatavik. Xiʼik, stuk xa la jyiktaik Jesús xchiʼuk li yajkontratake. Pe li jtakbol Pedro xchiʼuk li Juane muʼyuk bu nom xjatavik. Te nopol tijilik batel sventa tskʼelik kʼusi chichʼ pasbel li Jesuse.

Li paleetike la jyikʼik batel Jesús ta stojolal mol Anás, li pasaro mero bankilal palee. Muʼyuk bu jal te pajik li epal krixchanoetike. Laj ne la jyikʼik batel ta sna Caifás ti jaʼ xa ochem ta mero bankilal palee. Ep jnitvanejetik ta relijion te.

Te la spasik jun chapanel ta sna li Caifase. La stakik ta ikʼel jayvoʼ viniketik sventa chtal sjutbeik smul li Jesuse. Skotol li jnitvanejetik ta relijione, xi la jyalike: Akʼo yichʼ milel, xiik. Vaʼun la stubtabeik sat li Jesuse xchiʼuk la stʼanbeik majel.

Kʼalal yakal jech chkʼot ta pasel taje, li Pedroe te oy ta amakʼ. Li akʼobal taje jaʼo oy sik, jaʼ yuʼun li krixchanoetike stsanoj skʼokʼik. Kʼalaluk te tsobol chkʼatinike, te oy jun kiara, la skʼel batel li Pedroe, xi la jyale: Li vinik liʼe te toʼox xchiʼuk li Jesús eke, xi.

¡Moʼoj, muʼyuk bu jchiʼin!, xi la stakʼ li Pedroe.

Oxib velta albat yuʼun krixchanoetik ti te toʼox xchiʼuk Jesús li Pedroe. Pe kʼalal ta xjakʼbat jujun veltae ta xal ti mu meleluke. Kʼalal la stakʼ jech ta yoxibal velta li Pedroe, li Jesuse la stoy sat, la skʼel batel li Pedroe. Li Pedroe lik yat yoʼonton ta skoj ti la sjut kʼope, lokʼ batel, bat okʼuk.

Ta sob viernese, li paleetike la jyikʼik batel Jesús ta Sanedrín, li ta snail tsobobbail yuʼunike. Liʼ ta xchapik li kʼusi ta spasbeik li Jesuse. La jyikʼik batel ta stojolal Poncio Pilato ti jaʼ ajvalil ta yosilal Judeae.

Xi kʼot yalbeike: Liʼe jaʼ jun chopol vinik. Akʼo yichʼ milel, xiik. Kʼalal laj yoʼonton ta sjakʼbel Jesús li kʼusi tskʼan ta snaʼ li Pilatoe, xi la jyale: Muʼyuk kʼusi chopol spasoj chkil li vinik liʼe, xi. Jaʼ yuʼun li Pilatoe la stak batel Jesús ta stojolal Herodes Antipas, jaʼ li ajvalil ta Galilea ti te oy ta Jerusalene. Liʼ xtoke muʼyuk bu la stabe smul li Jesuse, vaʼun la stak sutel ta stojolal Pilato.

Li Pilatoe ta skʼan ta skolta lokʼel li Jesuse. Pe li yajkontratak Jesuse tskʼanbeik Pilato ti akʼo skolta lokʼel yan jchukele, jaʼ li j-elekʼ Barrabase. Oʼloltik xaʼox van kʼakʼal ti kʼalal vaʼanat yuʼun Pilato ta stojolal krixchanoetik li Jesuse. Li Pilatoe xi la jyalbe li krixchanoetike: ¡Kʼelavilik! ¡Li ajvalil avuʼunike, liʼ oye! Pe li bankilal paleetike tsots xi avanike: ¡Lokʼesik batel! ¡Ba milik! ¡Ba milik! xiik. Jaʼ jech la skoltaik lokʼel ta chukel li Barrabase, pe li Jesuse la jyikʼik batel sventa chbat smilik.

Ta mal kʼakʼal viernese la sjokʼanik ta teʼ. Manchuk mi mu xa vil li ta lokʼole, pe te la sjokʼanik ta jujujot xokon Jesús viniketik ti tsots smulike sventa te jokʼol chchamik ek. Kʼalal jutuk xaʼox skʼan xcham li Jesuse, li jun vinik tsots smule, xi la jyale: Naʼun me ti kʼalaluk chlik apas mantale, xi. Li Jesuse xi la stakʼe: Ta melel cha kalbot, te cha chiʼinun ta paraiso, xut.

¡Toj lek li kʼusi la jyal ta melel li Jesuse! ¿Mu jechuk? ¿Mi xa naʼ kʼusi paraisoal ta xalbe skʼoplal li Jesuse? ¿Bu jotukal la jyakʼ Dios li baʼyel paraiso la spase? Jech, liʼ la jyakʼ ta Balumile. Kʼalal ta x-ajvalilaj ta vinajel li Jesuse, ta xchaʼkuxes li vinik taje, sventa tskʼupin li achʼ Paraiso liʼ ta Balumile. ¿Mi mu jechuk ti toj lek taje?