OY KʼUSI toj chopol kʼotem ta pasel. Naka to la smilik li Juan j-akʼvanej ta voʼe. Herodías, li yajnil ajvalile, skontrainoj li Juane. Li Herodiase kuch onoʼox yuʼun sventa xal mantal ajvalil ti akʼo xtuchʼbeik sjol li Juane.

Kʼalal la jyaʼi Jesús taje, lik yat yoʼonton. Bat stuktuk ti bu chʼabal krixchanoe. Pe li krixchanoetike te tijil batel. Kʼalal la jyil Jesús li epal krixchanoetik taje, kʼuxubaj ta yoʼonton. Jaʼ yuʼun, lik xchanubtas ta sventa li ajvalilal yuʼun Diose xchiʼuk la xpoxta li buchʼutik ip chaʼike.

Li mal kʼakʼal taje li yajtsʼaklomtake nopajik tal ta stojolal Jesús, xi la jyalbeike: Mal xa kʼakʼal, jech noxtok muʼyuk jnaklejetik liʼe. Albo ti akʼo sutikuk batel li krixchanoetike, sventa xba sman sveʼelik li ta nopol bikʼtal lumetike, xiik.

Li Jesuse xi la stakʼe: Mu persauk ta xbatik. Xuʼ xa makʼlinik li voʼoxuke, xi. Laj ne li Jesuse xi la sjakʼbe li Felipee: ¿Bu xuʼ jmantik veʼlil sventa skotol li krixchanoetik liʼe?, xi.

Li Felipee xi la stakʼe: Toj toyol chlokʼ stojol ta smanel li veʼlil sventa tstaik uni jujutiʼuk skotol li krixchanoetike, xi. Li Andrese xi la jyale: Oy jun kerem liʼe yichʼoj tal voʼpech pan xchiʼuk chaʼkot choy. Mi jaʼuk jsetʼuk xlokʼ-o sventa skotol li krixchanoetik liʼe, xi.

Albeik skotol krixchanoetik ti akʼo chotiikuk ta yaxaltike, xi li Jesuse. Vaʼun li Jesuse la stojbe ta vokol Dios li veʼlile, jech lik xutilan li pane. Li yajtsʼaklomtak Cristoe lik xchʼakik batel ta skotol krixchanoetik li pan xchiʼuk choye. Oy voʼmil viniketik, xchiʼuk ta smilal noʼox antsetik xchiʼuk ololetik. Skotolik lek noj xchʼutik. ¡Kʼalal li yajtsʼaklomtak Cristo la stsobik li sovrailtak veʼlile, noj lajcheb moch yuʼunik!

Vaʼun li Jesuse la jyalbe yajtsʼaklomtak ti akʼo ochikuk batel ta kanova sventa chtuchʼik li nab Galileae. Li ta akʼobaltike lik tsatsal ikʼ, jech noxtok ta skoj ti ta syukʼilan sba li nabe li kanovae xbat ta jujujot. Xiʼik tajek li yajtsʼaklomtak Cristoe. Vaʼun, kʼalal solel ikʼ osile la jyilik ti oy buchʼu chanav tal ta stojolalik ta ba voʼe. Lik avanikuk ta xiʼel, yuʼun mu snaʼik li kʼusi yakal ta xilike.

Mu xa xiʼik. Voʼonun, xi li Jesuse. Yokel to mu xchʼunik ti jaʼ Jesuse. Jech oxal xi la jyal li Pedroe: Mi voʼote Kajval, alo mantal ti akʼo xanavkun batel ta atojolal ta ba voʼe, xi. Li Jesuse xi la stakʼe: ¡Laʼ! ¡Vaʼun li Pedro lokʼ batel xchiʼuk lik xanavuk ta ba voʼ! Pe lik xiʼuk vaʼun lik mutʼijuk yaʼlel ta voʼ, pe li Jesuse la skolta.

Ta mas tsʼakal, li Jesuse la smakʼlin noxtok ta smilal krixchanoetik. Tana liʼe la stunes vukub pan xchiʼuk uni jaykot choyetik. Jech noxtok lek lokʼ-o skotol li krixchanoetike. ¡Toj lek ti ta jnaʼtik kʼux-elan ta skolta krixchanoetik li Jesuse! ¡Kʼalal ch-ajvalilaje muʼyuk kʼusi ta jvul-o koʼontontik ta sventa ti kʼusi chtun kuʼuntike! ¿Mu jechuk?