KʼALALUK yakal ta xanav ta mukʼta lum li Jesuse, ta xpoxtaan jchameletik. Li skʼelobiltak juʼelal tspas Jesuse la jyaʼiik li yan jteklumetike. Jaʼ yuʼun li krixchanoetike la jyikʼik batel maʼsatetik, koxoetik, xchiʼuk yan jchameletik. Skotolik poxtaatik yuʼun li Jesuse.

Lokʼ xa oxib jabil ti akʼbat yichʼ voʼ yuʼun Juan li Jesuse. Li Jesuse la jyalbe yajtakboltak ti poʼot xa xbat ta Jerusalén ti bu ta xichʼ milele, xchiʼuk la jyal ti ta xchaʼkuxie. Kʼalal mu to chkʼot ta pasel taje, li Jesuse yokel to ta xpoxta li jchameletike.

Jun veltae, li Jesuse yakal ta xchanubtasvan ta skʼakʼalil sabado. Li kʼakʼal taje jaʼ xkuxobil yoʼontonik li judioetike. Li ants te cha vile xkujkun toʼox chanav vaxaklajuneb jabil, mi jsetʼuk tukʼ xvaʼi. Jech oxal li Jesuse la jyakʼ skʼob ta stojolal li antse, vaʼun tukʼib li sbakile. ¡Poxtaj!

Taje jaʼ ilinik-o li jnitvanejetik ta relijione. Oy jun xi la jyalbe li epal krixchanoetike: Oy vakib kʼakʼal sventa chi j-abtejutik. ¡Liʼe jaʼ skʼakʼaliltak sventa chtal apoxta abaik, mu jaʼuk li ta skʼakʼalil sabadoe!, xi.

Pe xi la stakʼ li Jesuse: ¡Chopol viniketik! Li voʼoxuke ta onoʼox xa titunik batel atsʼunob chonik ta skʼakʼalil sabado sventa chbat avakʼbeik yuchʼ voʼ. Jech oxal, ¿mi mu stauk-o poxtael xa naʼik li abol sba ants ti oy xa ta vaxaklajuneb jabil ipe?, xi. Li kʼusi la stakʼ Jesuse jaʼ kʼexlal komik-o li chopol viniketik taje.

Ta tsʼakale, li Jesús xchiʼuk li yajtakboltake batik ta Jerusalén. Kʼalal nopol xaʼox oyik li ta jteklum Jericoe, te x-avetik tal chaʼvoʼ jkʼan limuxna maʼsatetik, xi ta xalike: Jesús, koltaunkutik, xiik.

Li Jesuse la jyikʼ tal li maʼsatetike, vaʼun xi la sjakʼe: ¿Kʼusi cha kʼan cha jpasboxuk?, xi. Kajval, ta jkʼan cha jambun li jsatkutike, xiik. Pikbat satik yuʼun li Jesuse, ¡vaʼun ta anil noʼox lik yilik osil! ¿Mi xa naʼ kʼu yuʼun tspas skʼelobiltak juʼelal li Jesuse? Yuʼun skʼanojan li krixchanoetike xchiʼuk tskʼan ti akʼo yakʼ xchʼunel yoʼontonik ta stojolale. Taje jaʼ chakʼ kiltik ti kʼalal ch-ajvalilaj li Jesuse muʼyuk xa buchʼu ch-ipaj li ta Balumile.