TI KʼALAL lokʼik li ta jkʼol na ta toyole, li Jesús xchiʼuk li yajtakboltake batik ta nichimaltik Getsemaní. Ep xa noʼox ta velta ayemik liʼe. Li Jesuse la jyalbe yajtakboltak ti akʼo julavemikuke xchiʼuk ti akʼo spasik orasione. Vaʼun li Jesuse namaj batel jutuk, la spatan sba ta lumtik jech lik spas orasion.

Ta mas tsʼakal, li Jesuse sut tal ti bu oy li yajtakboltake. ¿Kʼusi yakal tspasik xa naʼ? ¡Yakal chvayik! Oxib velta albatik yuʼun Jesús ti akʼo julavemikuke, pe kʼalaluk ta sut tal jujun velta li Jesuse vayem chvul sta li yajtakboltake. Jech oxal kʼalal sut tal ta yoxibal velta li Jesuse, xi la jyalbe li yajtakboltake: ¿Mi lek noʼox cha vaʼiik ti vayaloxuk ti sta xa yorail ta xkichʼ akʼel ta skʼob li kajkontratake?, xi.

Kʼalal jech la jyal taje jaʼo xa te xvochlajet tal epal krixchanoetik. ¡Kʼelavil! ¡Yichʼojanik tal yespadaik xchiʼuk steʼik li viniketike! Stsakoj tal stojik ti chakʼ xojobale. Kʼalaluk nopajik tale, oy buchʼu te lokʼ tal li ta epal krixchanoetike te bat ti bu oy li Jesuse. La stsʼutsʼ, jech kʼuchaʼal cha vil liʼ ta lokʼole. ¡Li vinik leʼe jaʼ Judas Iscariote! ¿Kʼu yuʼun ta stsʼutsʼ li Jesuse?

Li Jesuse xi la sjakʼe: Judas ¿mi ta jtsʼutsʼel noʼox cha vakʼun ta kʼabal?, xut. Jech, li tsʼutsʼele oy kʼusi tskʼan chal. Li kʼusi la spas Judase jaʼ te vinaj-o li buchʼu yakal ta saʼik li viniketik te xchiʼuk tale. Jaʼ yuʼun li yajkontratak Jesuse nopajik batel ta stojolal sventa chchukat batel. Li Pedroe mu jechuk noʼox ta xakʼ batel li Jesuse, ta slikes yaʼi kʼop. Jech oxal la slokʼes yespada ti yichʼoj batele, vaʼun la syayijes li vinik te ta stsʼele. La sbojbe li sbatsʼi chikine. Pe li Jesuse la spikbe, jech poxtaj.

Li Jesuse xi la jyalbe li Pedroe: Suteso ta yavil li espadae. ¿Mi mu xuʼuk jkʼanbe jTot xa naʼ ti akʼo stak tal ta smilal noʼox anjeletik sventa chi skoltaike?, xut. ¡Xuʼ, xuʼ skʼanbe! Pe li Jesuse muʼyuk la skʼanbe Dios ti akʼo stak tal anjeletike, yuʼun snaʼoj ti kʼot xa yorail sventa tstsakat batel yuʼun li yajkontratake. Jkʼeltikik kʼusi chkʼot ta pasel ta stojolal li Jesús tanae.