¡I,KʼELAVIL! ¿Kʼusi yakal chkʼot ta pasel liʼe? ¿Mi toj ep la syayijes sba li uni kerem te telel ta lumtike? ¡Kʼelavil, li vinik te chlokʼ tale jaʼ li Pabloe! ¿Mi xa vil li Timoteo ti te oy eke? ¿Mi pʼaj van yalel tal ta ventana li kerem liʼe?

Jech, pʼaj yalel tal. Li Pabloe yakal toʼox ta xalbe mantal li yajchankʼoptak Jesús liʼ ta Troase. Li Pabloe snaʼoj ti jal muʼyuk ta skʼopon sbaike, yuʼun chlokʼ xa batel ta varko ta yokʼomal. Jech oxal yokel to chkʼopoj ti kʼalal sta oʼlol akʼobale.

Veno, li kerem liʼe, jaʼ sbi Eutíco, te toʼox chotol ta ventana, te och svayel. ¡Ta yoxkojal to na pʼaj yalel tal! Jaʼ yuʼun xuʼ cha vakʼ venta ti kʼu yuʼun ta xat tajek yoʼontonik li krixchanoetike. Kʼalal li viniketik bat spetik likel li uni kereme, la jyakʼik venta ti kʼot ta pasel li kʼusi mas ta xiʼtaike. ¡Toj chamel to kʼot li uni kereme!

Kʼalal la jyil Pablo ti chamem li uni kereme, la spatan sba ta stojolal xchiʼuk la smey. Vaʼun xi la jyale: Mu xa vat avoʼontonik. ¡Lek oy!, xi. ¡Jech onoʼox, li uni kereme lek oy! ¡Jaʼ skʼelobil juʼelal! ¡Li Pabloe la xchaʼkuxes li uni kereme! Jun xa noʼox muyubajel ta xaʼiik li krixchanoetik taje.

Chaʼmuyik batel, vaʼun lik veʼikuk. Li Pabloe lik chaʼkʼopojuk jaʼ to paj kʼalal to ta sakubel osil. ¡Pe xuʼ xkaltik ta melel ti Euticoe muʼyuk xa xchaʼvay! Vaʼun li Pabloe, li Timoteoe xchiʼuk li xchiʼiltakike muyik batel ta varko. ¿Mi xa naʼ bu batik?

Li Pabloe tsutsobal xa yuʼun li yoxkojal xanvil ta xcholel mantale, vaʼun chbat xa ta sna. Liʼe mas xa nom xanav, jaʼ jutuk toʼox ti kʼalal ay ta xchibal veltae, yuʼun tanae chaʼa jaʼ noʼox li ta yosilal Efesoe jalij oxib jabil.

Kʼalaluk lokʼik batel ta Troase, li varkoe te paj jayibuk kʼakʼal ta Mileto. Li Efesoe nopol xil sbaik xchiʼuk li Miletoe, jaʼ yuʼun li Pabloe la stak ta ikʼel li moletik ta tsobobbail ta lum Efesoe yuʼun tskʼan ta skʼoponan yaʼi ta slajebal velta. Ta mas tsʼakal ti kʼalal chbat xa li varkoe, ¡ta xat tajek yoʼontonik yuʼun chbat xa li Pabloe!

Vaʼun li varkoe sut tal ta Cesarea. Kʼalaluk kom jayibuk kʼakʼal li Pablo liʼ ta sna li jchankʼop Felipee, li jchʼul alkʼop Agaboe la jyal ti mi kʼot ta Jerusalén li Pabloe ta xtikʼat ta chukel. Jech kʼot ta pasel kʼuchaʼal la jyal li Agaboe. Kʼalal lokʼ xaʼox chib jabil yochel ta chukel ta Cesarea li Pabloe, la stakik batel ta Roma sventa chchapanat yuʼun César li ajvalil tee. Jkʼeltikik kʼusi chkʼot ta pasel kʼalal yakal chbatik ta Romae.