LIʼ VAʼAL li jtakbol Pedroe, li buchʼutik te vaʼajtik ta spate jaʼ yamigotak. Pe, ¿kʼu yuʼun kejel ta stojolal Pedro li vinik leʼe? ¿Mi stakʼ jech spas? ¿Mi xa naʼ buchʼu li vinike?

Li vinike jaʼ Cornelio. Jaʼ jun bankilal soltaro ta Roma. Li Cornelioe mu xojtikin li Pedroe, pe albat ti akʼo yikʼ tal ta snae. Jkʼeltikik kʼuxi kʼot ta pasel taje.

Li baʼyel krixchanoetik ti kʼotik ta yajtsʼaklomtak li Jesuse, jaʼ judioetik, pe li Cornelioe maʼuk judío vinik. Manchuk mi jech, skʼanoj Dios, ta spas orasion xchiʼuk ep kʼusitik lek ta spas ta stojolal li krixchanoetike. Oy jun mal kʼakʼale, jun anjel te kʼot ta stojolal, xi albate: Lek cha yilot li Diose, jech oxal ta stakʼbot li aorasiontake. Tako ta ikʼel jun vinik ti jaʼ sbi Pedroe. Te ta Jope, ta sna Simón ti nopol yiloj nabe, x-utat.

Veno, li Cornelioe ta anil noʼox jech la spas. Ta yokʼomale, li Pedroe muy ta yamakʼil sjol sna Simón. Tee, li Diose la jyakʼbe snop Pedro ti chil jlik mukʼta pokʼ ti chyal tal ta vinajele. Te chupul tal ep ta tos chonetik. Li ta smantal Diose chal ti chonetik liʼe mu lekikuk ta tiʼel, pe oy buchʼu xi la jyale: Likan Pedro. Milo atiʼ li chonetik liʼe, x-utat.

¡Moʼoj!, xi li Pedroe. Muʼyuk bu jtiʼ-o li kʼusi muʼyuk leke, xi. Pe li buchʼu chkʼopoje xi la jyale: Mu xa val ti chopol li kʼusi slekubtasoj xa li Diose, xi. Oxib velta jech la jyal. Kʼalal yakal tsnopilan Pedro kʼusi smelolal taje, jaʼo kʼot li viniketik ti la stak batel li Cornelioe.

Li Pedroe yal tal, xi la jyale: Voʼon li buchʼu cha saʼike. ¿Kʼu yuʼun la talik?, xi. Kʼalal li viniketik la jyalik ti oy jun yaj-anjel Dios la svulaʼan li Cornelioe xchiʼuk ti la jyalbe ti akʼo stak ta ikʼel li Pedroe, li Pedroe la jyal ti chchiʼin batel li viniketike. Ta yokʼomale, li Pedro xchiʼuk jayvoʼ yamigotake bat skʼelik li Cornelio ta Cesareae.

Li Cornelioe la stsob yutsʼ yalaltak xchiʼuk li buchʼutik batsʼi lek skʼoponane. Kʼalal kʼot li Pedroe, li Cornelioe la skejan sba ta stojolal, jech kʼuchaʼal cha vile. Pe li Pedroe xi la jyale: Vaʼlan, yuʼun koʼol krixchanoutik, xi. Jech, li Vivliae ta xakʼ ta ilel ti mu lekuk ti xi jkeji ta smuyubtael jun krixchanoe. Yuʼun jaʼ noʼox Jeova skʼan jmuyubtatik.

Tana liʼ ne, li Pedroe lik xcholbe mantal li buchʼutik te oye. Ta xkakʼ venta ti lek chil Dios skotol li krixchanoetik ti oy ta yoʼontonik ta xtunik ta stojolale, xi li Pedroe. Kʼalaluk yakal chkʼopoje, li Diose la stak tal li xchʼul espiritue, vaʼun li krixchanoetike lik kʼopojikuk ta yan kʼopetik. Taje labal to la jyilik li yajtsʼaklomtak Cristo ti jaʼ judioetik ti te xchiʼukik li Pedroe, yuʼun yalojik mi jaʼ noʼox lek chil Dios li judioetike. Liʼe jech akʼbat yilik ti parejo chil skotol krixchanoetik li Diose. ¿Mi mu lekuk ti jvules ta joltik taje?