¿MI TSKOLTA krixchanoetik Jeova sventa chojtikinik li albil Mesiase? Tana. Jkʼeltik li kʼusi la spas Diose. Kʼalal echʼem xaʼox 400 jabil laj yichʼ tsʼibael li Tsʼibetik ta Hebreo Kʼope, jun anjel ti Gabriel sbie, kʼot ta stojolal María, jun tseb ti te toʼox nakal ta norte yuʼun Galilea ta Nazarete. Li Gabriele laj yalbe ti ta xil yol li Mariae. Akʼo mi tojol tseb, li Diose chakʼ ayanuk yol ta stojolal li yip ch-abteje, jaʼ xkaltik, li xchʼul espiritue. Li olol taje jaʼ me li albil Ajvalil ti ch-ajvalilaj sbatel osile. Ta melel, li Diose tsjelubtasbe tal ta yalajeb María li xkuxlejal sbaʼyel Nichʼone.

Li Mariae bikʼit laj yakʼ sba ta xchʼamel li tsatsal abtel taje. Li José, ti jaʼ toʼox karpinteroe jaʼ chikʼ li Mariae, inupun xchiʼuk kʼalal la stak talel jun yaj-anjel Dios sventa chalbe smelolal ti kʼu yuʼun jech chkʼot ta pasele. Pe jvules ta joltik ti albil onoʼox skʼoplal ti ta Belén chvokʼ li Mesiase, maʼuk ta Nazaret (Miqueas 5:2). ¿Kʼuxi chkʼot ta pasel taje, ti 140 kilometro snamal yiloj li Nazarete?

Jun ajvalil ta Roma laj yal mantal ti skotol akʼo xbat stsak sbiik li ta slumal bu ivokʼike. Yaʼeluke ta Belén likemik li yutsʼ yalal María xchiʼuk Josee, jaʼ yuʼun te ibatik kʼalal jutuk xaʼox skʼan xvokʼ yol li Mariae (Lucas 2:3). Te vokʼ ta jun snail vakax li Jesuse xchiʼuk la xpuchʼanik ta sveʼeb vakax. Vaʼun, li Diose la stak yaj-anjeltak sventa chalbe jtsop jchabichijetik ti te noʼox nopol oyik —ti jaʼ te toʼox tskʼel xchij li Davide— ti vokʼ xa li albil Mesías o Cristoe.

Oy yan krixchanoetik xtok ti chakʼik ta ojtikinel ti jaʼ albil Mesías li Jesuse. Li j-alkʼop Isaiase laj onoʼox yal ti oy buchʼu chchapan batel be sventa li tsatsal abtelal tspas Cristoe (Isaías 40:3). Taje jaʼ li Juan J-akʼvanej ta voʼe. Jun veltae, xi laj yal kʼalal laj yil li Jesuse: «Qʼuelavilic, leʼ xa xtal li chʼium chij yuʼun Dios ti chchʼaybe smul scotol cristianoetic ta banamile». Ta anil noʼox, ep buchʼutik ti jaʼ toʼox stsʼakliojik li Juane kʼotik ta yajtsʼaklomtak Jesús. Xi laj yal june: «Laj xa jtacutic Buchʼu ti Mesiase» (Juan 1:29, 36; 1:41, Ch).

Pe li bu mas lek laj yichʼ akʼel ta ojtikinele, jaʼo kʼalal laj yakʼbe yichʼ voʼ Jesús li Juane. Li Jeovae jaʼ la stʼuj ta Mesías ta stojolal li xchʼul espiritue xchiʼuk xi laj yale: «Liʼi jaʼ Jnichʼon; lec jcʼanoj, lec jpatoj coʼnton yuʼun» (Mateo 3:16, 17). ¡Jaʼ to vul ta lokʼel un li Mesiase!

Pe ¿bakʼin kʼot ta pasel taje? Ta sjabilal 29 ta jkʼakʼaliltik, jaʼo kʼalal nel li 483 jabil yaloj onoʼox Daniele. Ta melel, taje jaʼ noʼox junantik albil kʼopetik ti chakʼ ta ilel ti jaʼ albil Mesías li Jesuse. Vaʼun chaʼa, ¿kʼusi aʼyej chal ti kʼu sjalil liʼ oy ta Balumile?

(Lokʼem ta kapitulo 1 kʼalal ta 3 yuʼun Mateo, ta kapitulo 1 yuʼun Marcos, ta kapitulo 2 yuʼun Lucas xchiʼuk ta kapitulo 1 yuʼun Juan.)