TA SKʼAKʼALIL ajvaliletik ta Israel xchiʼuk Judae ikuxiik jtsop krixchanoetik ti tsots skʼoplalike, jaʼ li j-alkʼopetike. Skotolik taje skʼan tsots xchʼunel xchiʼuk tsotsuk yoʼontonik sventa chalik li aʼyejetik yuʼun Diose. Ep li albil kʼopetik laj yalike jaʼ laj yalbeik skʼoplal liʼe:

1. Li sjinesel Jerusalene. Li yaj-alkʼoptak Diose —mas to li Isaías xchiʼuk Jeremiase— kʼalal ep toʼox jabil skʼan xkʼot ta pasele, laj yalik ti ta xichʼ jinesel xchiʼuk chʼabal jnaklom chkom li ta Jerusalene. Jech xtok lek laj yalbeik srasonal kʼu yuʼun la sabeik skʼakʼal yoʼonton Dios li jteklum taje. Akʼo mi laj yalik ti jaʼ steklumal Jeovae, li kʼusitik la spasik sventa jecheʼ relijione, ti jamal xvinaj ti tsman sbaik ta takʼine xchiʼuk li saʼ kʼop tspasike chakʼik ta ilel ti maʼukike (2 Reyes 21:10-15; Isaías 3:1-8, 16-26; Jeremías 2:1–3:13).

2. Chchaʼta yav li melel yichʼel ta mukʼ Diose. Kʼalal echʼem xaʼox li 70 jabil ikʼbilik batel ta Babilonia li steklumal Diose, tsutik batel ta slumalik xtok, chchaʼmeltsanik li chʼulna ta Jerusalene xchiʼuk chchaʼta yav li melel yichʼel ta mukʼ Diose (Jeremías 46:27; Amós 9:13-15). Kʼalal chib toʼox sien jabil skʼan xkʼot ta pasel taje, li Isaiase laj yal ti jun vinik ti Ciro sbie jaʼ li buchʼu tstsal li Babiloniae xchiʼuk ti tskolta lokʼel li steklumal Diose. Jech noxtok, laj yal ti kʼuyelan ch-och batel sventa tstsal li Babiloniae (Isaías 44:24–45:3).

3. Kʼalal chvul ta lokʼel li Mesiase xchiʼuk li kʼusitik ch-echʼ ta xkuxlejale. Li Mesiase laj yichʼ alel ti ch-ayan ta jun jteklum ti Belén sbie (Miqueas 5:2). Jaʼ jun krixchano ti bikʼit chakʼ sbae, ti kajal ta jkot vuro ch-och batel li ta Jerusalene (Zacarías 9:9). Manchuk mi skʼanoj xchiʼuk chichʼ ta kʼux li krixchanoetike, ep buchʼutik ta spʼajik (Isaías 42:1-3; 53:1, 3). Jech, toj chopol kʼuyelan chcham. ¿Mi jaʼ skʼan xal ti te chlaj-o skʼoplal li Mesiase? Moʼoj, yuʼun chichʼ chaʼkuxesel sventa oyuk sbalil li xkuxlejal laj yakʼ ta matanale xchiʼuk ti jech staik perton ta skoj smul li krixchanoetike (Isaías 53:4, 5, 9-12).

4. Li ajvalilal yuʼun Mesiase. Li jmulavil krixchanoetike muʼyuk bu chapalik sventa ch-ajvalilajik, pe li Ajvalil Mesiase lek chapal. Maʼuk noʼox taje, yuʼun J-akʼ Jun Oʼontonal, xi sbi (Isaías 9:6, 7; Jeremías 10:23). Kʼalal mi la sventain li Balumile, oy me jun oʼontonal xchiʼuk jun me yoʼonton chkuxiik xchiʼuk chonbolometik li krixchanoetike (Isaías 11:3-7). Chchʼay skʼoplal skotol li chameletike (Isaías 33:24). Li lajel xtoke chchʼay-o skʼoplal (Isaías 25:8). Jech ta melel, ta smiyonal noʼox krixchanoetik chchaʼkuxiik (Daniel 12:13).

(Lokʼem ta slivroal Isaías, Jeremías, Daniel, Amós, Miqueas, xchiʼuk Zacarías.)