¿MI JAʼ pʼijil Ajvalil li Jeovae? Sventa ta jnaʼtike, skʼan jkʼeltik li tojobtaseletik chakʼ ta sKʼope. ¿Mi chtun van ta melel? ¿Mi chlekub van jkuxlejaltik yuʼun? Li ta slivroal Proverbiose, li ajvalil Salomone ta sienal noʼox tojobtaseletik la stsʼiba ti chtun ta jutuk mu skotoluk li jkuxlejaltike. Jkʼeltik jayibuk.

Ti kʼuyelan xkil jbatik xchiʼuk Diose. Sventa lek xkil jbatik xchiʼuk Jeovae, tsots skʼoplal ti jpat koʼontontik ta stojolale. Xi laj yal li Salomone: «Jaʼ noʼox pato avoʼnton ta stojol li Mucʼul Diose; mu me jaʼuc xapat avoʼnton yuʼun li abijil atuque. Acʼo sventain Mucʼul Dios scotol li cʼusi chapase, yuʼun jaʼ xuʼ chayicʼot batel ta tuqʼuil be» (Proverbios 3:5, 6). ¿Kʼuxi chkakʼtik ta ilel ti jpatoj koʼontontik ta stojolal Diose? Jaʼo kʼalal chkakʼtik akʼo xi sbeiltasutike xchiʼuk ti jchʼunbetik smantale. Mi jech ta jpastike chkakʼtik ti oyuk sbalil li jkuxlejaltike: ta jmuyubtabetik yoʼonton li jTotik ta vinajele xchiʼuk chkakʼtik ta ilel ti jaʼ jut kʼop li Satanase (Proverbios 27:11).

Kutsʼ kalaltik xchiʼuk kamigotaktik. Li utsʼ-alaletike mas to me tskʼanik beiltasel yuʼun Dios li avi kʼakʼale. Xi chalbe malalil li Diose: «Cuxetuc noʼox avoʼntonic o achiʼuc li avajnil onoʼox ta aqueremale», sventa tsvulesbe ta sjol ti skʼan tukʼuk oy ta stojolal li yajnile (Proverbios 5:18-20). Ta sventa li ajnilale, ta skapituloal 31 ta Proverbios chalbe jun slekil kʼelobil kʼuxi xuʼ lek x-ilatik xchiʼuk ti xkʼanat yuʼun li smalale xchiʼuk li yalabtake. Li alab-nichʼnabiletik ta xichʼik albel ti akʼo xchʼunbeik smantal stot smeʼik (Proverbios 6:20). Li livro xtoke chal ti tsots skʼoplal ti lekuk xkil jbatik xchiʼuk li kamigotaktike, xchiʼuk chalbutik xtok ti mi ta jchʼak jbatik ta stojolal yantike, chi jpas ta tʼutʼ (Proverbios 18:1). Akʼo mi tsots me skʼoplal ti oyuk lek kamigotaktike, skʼan me lek jtʼujtik xchiʼuk mu jchiʼintik li buchʼutik xuʼ tsokesutike (Proverbios 13:20; 17:17).

Ta jkuxlejal jtuktik. Li slivroal Proverbiose yichʼoj tal lekil tojobtaseletik sventa lekuk oyutik xchiʼuk tskoltautik sventa jpʼajtik chopol nopbenaletik, ti mu xi jyakube, ti lekuk li kʼusi ta jnoptike xchiʼuk ti xi jkʼot ta lekil j-abtelutike (Proverbios 6:6; 14:30; 20:1). Xchiʼuk chalbutik xtok kʼusi xuʼ xkʼot ta jtojolaltik mi jaʼ ta jchʼuntik li kʼusi mu jechuk chal smantaltak Diose (Proverbios 14:12). Tspʼijubtasutik xtok ti mu xkikʼubtas li koʼontontike, yuʼun «jaʼ te chlic tal li [jkuxlejaltike]» (Proverbios 4:23).

Li beiltaseletik taje ta smiyonal noʼox krixchanoetik stukʼibtasojbe xkuxlejal, ti yakʼojik xa lek venta ti jaʼ mas lek ti chchʼamik kʼuchaʼal ajvalil yuʼunik li Jeovae.

(Lokʼem ta slivroal Proverbios.)