KʼALAL pasem xaʼox ta yajtsʼaklom Cristo li Pabloe, ta sjunul yoʼonton lik xcholbe skʼoplal li Ajvalilal yuʼun Diose. Pe avi une jaʼ xa chichʼ tsatsal kontrainel. Li jtakbol ti mu snaʼ xlube ep bu nom xanav sventa tspukbe skʼoplal li kʼusi oy onoʼox ta yoʼonton Dios ta slikeb ta sventa li krixchanoetike.

Li ta baʼyel velta lokʼ ta xcholel mantale, la svulaʼan Listra xchiʼuk la xpoxta jun vinik ti koxo vokʼe. Li epal krixchanoetik ti laj yilik kʼusi kʼot ta pasele lik avanikuk ti jaʼ la diosetik li Pablo xchiʼuk Bernabee. Vokol paj yuʼunik li krixchanoetik sventa mu x-akʼbat smotonike. Pe ta tsʼakale li krixchanoetike laj yakʼ sbaik ta loʼlael ta stojolal li yajkontratak Pabloe, vaʼun laj yakʼbeik ton. Akʼo mi chamem xa laj yiktaik yileluk li jtakbole kuxul ikom, ta tsʼakal jutuke chaʼsut li ta jteklum sventa stsatsubtasbe yoʼonton li yajtsʼaklomtak Cristoe.

Ta mas tsʼakale, junantik yajtsʼaklom Cristo ti judioetike laj yalik akʼo la xchʼunik jayibuk sMantal Moisés li jchʼunolajeletik ti maʼuk judioetike. Sventa xchapaj li kʼop taje, li Pabloe bat ta Jerusalén ta stojolal li jtakboletik xchiʼuk li moletike, sventa jaʼ xchapanik li kʼop taje. Kʼalal laj xaʼox xchanbeik lek skʼoplal li sKʼop Diose xchiʼuk ti la skʼanbeik beiltasel li chʼul espiritue, la stakbeik batel kartaetik li tsobobbailetike xchiʼuk laj yalik mantal ti akʼo mu xichʼik ta mukʼ lokʼoletik, ti mu stiʼik chʼichʼ mi jaʼuk bekʼet ti muʼyuk malbil xchʼichʼele xchiʼuk ti mu me xmulivajike. Li mantaletik taje jaʼ li kʼusitik skʼan spasike, pe maʼuk skʼan xal ti skʼan xchʼunik li sMantal Moisese (Hechos 15:28, 29).

Li ta xchibal velta lokʼ ta chol mantal li Pabloe, la svulaʼan Berea, jun lum ti te oy ta Grecia avie. Lek la xchʼamik mantal li judioetik ti te nakalike, akʼo mi chchanbeik skʼoplal skotol kʼakʼal li sKʼop Dios sventa tskʼelik mi melel li kʼusi yakal xchanike. Ta jelavel jutuke, li Pabloe jatav ta skoj li yajkontratake. Bat kʼalal ta Atenas, te laj yal jun lekil mantal ta stojolal li krixchanoetik ti lek chanemike, ti tstijbe yoʼonton li buchʼutik chaʼiike xchiʼuk ti lek noʼox smelolale.

Kʼalal laj xaʼox yuʼun li yoxibal velta lokʼ ta chol mantal li Pabloe, bat ta Jerusalén. Kʼalal bat ta chʼulnae, tskʼan ox chmilat yuʼun jtsop krixchanoetik. Pe la stikʼ sbaik ta spojel Pablo li jromail soltaroetike xchiʼuk laj yikʼik batel sventa oy kʼusi tsjotsʼol jakʼbeik. Ta skoj ti jaʼ jromail vinike, laj yakʼik akʼo spoj sba ta stojolal li ajvalil Felicse. Li judioetike mu bu xuʼ yuʼunik yakʼel ta ilel mi melel li kʼusi chalik ta stojolal Pabloe. Akʼo mi jech, li Festo —ti jaʼ li xkʼexol Felicse— oy ta yoʼonton chakʼbe ta skʼob li judioetike. Sventa mu jechuk xkʼot ta pasele, li jtakbol Pabloe laj yal ti tskʼan chbat ta stojolal Cesare, xi la stakʼ li ajvalile: «Jaʼ te chabat» (Hechos 25:11, 12).

Ta Roma chichʼ chapanel li Pabloe. Jaʼ yuʼun ta varko ibat li ta Italiae, pe li varkoe lik butʼijuk, ta skoj taje te echʼ yuʼun li yorail siktik ta jun bikʼit balumil kakal ta nab ti Malta sbie. Kʼalal kʼot ta Romae, te naki ta jun chʼamunbil na. Akʼo mi mu xakʼik xlokʼ, xmuyubaj noʼox xchiʼuk la xcholbe mantal skotol li buchʼutik chkʼot vulaʼanatuke.

(Lokʼem ta Hechos 11:22–28:31.)