¿KʼU VAN yelan li kuxlejal ti chichʼikuk ta mukʼ xchiʼuk xchʼunbeik smantal Jeova skotol li jteklum xchiʼuk li ajvalil yuʼunike? Xuʼ jtabetik stakʼobil kʼalal ajvalilaj 40 jabil li Salomone.

Kʼalal skʼan toʼox xcham li Davide la svaʼan ta xkʼexol li xnichʼon ti Salomón sbie. Jun kʼakʼale, laj yakʼ sba ta ilel Jeova ta xvayich li Salomone xchiʼuk laj yalbe ti chakʼbe kʼusiuk tskʼane. Li chex kerem ajvalile la skʼan pʼijilal xchiʼuk yojtikinel sventa tukʼ xchapanvan. Lek laj yil Jeova li kʼusi la skʼane, vaʼun laj yakʼbe taje. Jech xtok, laj yalbe ti mi chchʼun-o mantale, ta xakʼbe skʼulejal, ichʼel ta mukʼ xchiʼuk jal chkuxi.

Ta skoj ti toj pʼije puk batel skʼoplal li Salomone. Jun veltae, kʼot ta stojolal Salomón chaʼvoʼ antsetik, yuʼun chalik ti jaʼ la yolik li jun olole. ¿Kʼusi la spas li Salomone? ¡Laj yal mantal ti akʼo xichʼ tuchʼel ta oʼlol li neneʼe! Li baʼyel antse laj yal ti akʼo xtuchʼike, pe li smeʼ olole la skʼan vokol ti jaʼ mas lek akʼo xakʼbeik batel li yan antse. Jaʼ jech laj yakʼ venta Salomón ti jaʼ mero meʼil li ants ti tsʼakal kʼopoje. Kʼalal laj yaʼi jteklum li kʼusi kʼot ta pasele, laj yakʼik venta ti akʼbil spʼijil yuʼun Dios li Salomone.

Jtos ti kʼusi mas lek la spas Salomone jaʼ ti la svaʼan li alakʼ sba xchʼulna Jeova ta Jerusalene, ti jaʼ te chichʼik ta mukʼ Dios ta melel li Israele. Kʼalal ta sba velta la stunesik li chʼulnae, xi laj yalbe ta orasion Dios li Salomone: «Yuʼun me mu xaʼoch o ta vinajel ti toj muqʼue, ¿cʼu xʼelan xuʼ xaʼoch o ta avunin chʼulna ti la jpasbote?» (1 Reyes 8:27).

Li Salomone laj yichʼ tajek ojtikinel, kʼot to skʼoplal ta namal balumil kʼuchaʼal Sabá (Seba), ta Arabia. Li meʼ ajvalil ta lum taje bat ta Israel sventa tskʼel ta sat stuk li smukʼulal xchiʼuk li skʼulejal Salomone, xchiʼuk sventa chakʼbe ta preva li spʼijile. Toj labal xa noʼox sba laj yilbe spʼijil li Salomone xchiʼuk li lekilal oy ta Israele, vaʼun la skʼupil kʼopta Jeova ta skoj ti la stʼuj jun ajvalil ti toj pʼije. Ta sventa ti laj yakʼ sbendision Jeovae, ti kʼu sjalil ajvalilaj li Salomone, jaʼ li bu mas lek xchiʼuk oy jun oʼontonal echʼ ta voʼneal Israele.

Kʼux ta alel ti muʼyuk onoʼox laj yakʼ sba ta beiltasel ta spʼijilal Jeova li Salomone. Yuʼun muʼyuk la stsak ta venta ti yaloj onoʼox Jeova ti mu stakʼ saʼ ep yajnil li ajvaliletike, li stuke ta sienal noʼox yajnil la saʼ xchiʼuk epik ti chichʼik ta mukʼ jecheʼ diosetike. Ta skoj taje kʼunkʼun la snamajesik ta stojolal Jeova xchiʼuk laj yakʼbeik xchʼun ti akʼo xichʼ ta mukʼ lokʼoletike. Jech oxal, li Diose laj yal ti yutsʼ yalal Salomone chichʼ pojbel jutuk mu skotoluk li ajvalilale. Li srasonal sventa mu xchʼay yuʼunik skotole jaʼ ta skoj li kʼusi yalojbe David li Jeovae. Ta melel, akʼo mi la svalopatin Jeova li Salomone, li Jeovae tukʼ la yakʼ sba ta sventa li trato la spas xchiʼuk Davide.

(Lokʼem ta kapitulo 1 kʼalal ta 11 yuʼun 1 Reyes, ta kapitulo 1 kʼalal ta 9 yuʼun 2 Crónicas xchiʼuk Deuteronomio 17:17.)