XCHANOBIL 18
Li skʼelobiltak juʼelal tspas Jesuse
Li ta skʼelobil juʼelal tspas Jesuse chakʼ ta ilel kʼuyelan tstunes sjuʼel kʼalal mi och ta Ajvalile
LI Diose laj yakʼbe sjuʼel xNichʼon sventa tspas kʼusitik ti mu spas yuʼun li krixchanoetike. La spas ep skʼelobiltak juʼelal ta yeloval epal krixchanoetik. Jaʼ jech laj yakʼ ta ilel ti xuʼ tstsal li yajkontratak krixchanoetik xchiʼuk li kʼusitik tsnuptanike. Jkʼeltik jayibuk.
Viʼnal. Li baʼyel skʼelobil juʼelal la spas Jesuse —ti la skʼatajes ta yaʼlel tsʼusub li voʼe— laj yakʼ ta ilel ti xuʼ chakʼ ep veʼlil xchiʼuk kʼusitik chkuchʼtike. Chib veltae, ta smilal noʼox krixchanoetik la smakʼlin ti chviʼnajike, laj yepajes li uni jaypech pane xchiʼuk jaykotuk noʼox choye. Xchibal velta jech la spase oy to skomenal ikom.
Chamel. Li Jesuse la xpoxta «ep jchameletic xchiʼuc bochʼotic cʼusiuc noʼox cʼux chaʼyic» (Mateo 4:23). La xpoxta maʼsatetik, pakʼchikinetik, koxoetik, jkʼaʼemal chameletik xchiʼuk buchʼutik ipik ta tupʼ ikʼ. Ta melel, chʼabal spajeb sjuʼel sventa chpoxtavan.
Tsatsal ikʼal voʼ, nikeletik xchiʼuk yantik. Jun akʼobale, kʼalal yakal chanavik batel ta kanova ta nab Galilea li Jesús xchiʼuk yajtsʼaklomtake, tal tsatsal ikʼal voʼ. Xiʼik tajek li yajtsʼaklomtake, pe li Jesuse kʼajomal la stoy muyel sat ta vinajel xchiʼuk xi laj yale: «Chʼabian, pajan». Ta anil noʼox ichʼab li tsatsal ikʼal voʼe (Marcos 4:37-39). Ta yan veltae, kʼalal oy tsatsal ikʼal voʼ xtoke, xanav ta ba nab li Jesuse (Mateo 14:24-33).
Pukujetik. Li pukujetike jaʼ mas tsots yipik, mu sta jech li krixchanoetike. Ta melel, yilbajinoj epal krixchanoetik xchiʼuk muʼyuk kʼusi xuʼ spasik sventa xkolik li ta skʼob pukujetike. Pe li Jesuse muʼyuk bu la xiʼtaan. Moʼoj, jaʼ li pukujetik ti la xiʼtaik Jesuse xchiʼuk ta ora noʼox la xchʼunbeik smantal kʼalal albatik ti akʼo xiktaik li krixchanoetik ti yuʼuninojike.
Lajel. Li kajkontratik taje, ti «slajeb [kontrail]» tsbiiltas li Vivliae, mi junuk krixchano xuʼ stsal (1 Corintios 15:26). Akʼo mi jech, li Jesuse la xchaʼkuxes animaetik, june jaʼ skerem jun meʼon ants, li yane jaʼ uni tseb. Pe li bu mas to labal sbae jaʼ ti la xchaʼkuxes ta yeloval epal krixchanoetik li Lázaro ti jaʼ yamigoe, ti oy xaʼox ta xchanibal kʼakʼal slajele. Kʼalal ta yajkontratak laj yakʼik venta ti oy sjuʼel li Jesuse (Juan 11:38-48; 12:9-11).
Pe kʼalal kʼot yoraile, ipajik xchiʼuk chamik xtok li krixchanoetik ti la skoltae. Vaʼun chaʼa, ¿kʼusi stu yilel li skʼelobiltak juʼelal la spase? Oy ep kʼusi stu, yuʼun laj yakʼ ta ilel ti oy lek yoyal o snakleb li kʼupilik sba albil kʼopetik ta sventa li Ajvalilal yuʼun Mesiase. Ta melel, li Ajvalil ti stʼujoj Diose tslajesbe skʼoplal li viʼnale, li chameletike, li tsatsal ikʼal voʼ, nikeletik o yantike, li pukujetike xchiʼuk li lajelal eke. Jamal chkiltik ti Jeovae yakʼojbe sjuʼel sventa tspas yuʼun skotol li kʼusitik taje.
