Kʼalal la achan li foyeto liʼe, ¿mi labal tajek sba laj avil ti koʼol kʼusi chal Vivlia xchiʼuk li kʼusi staojik ta ilel li sientifikoetike? Epal krixchanoetike labal tajek sba chaʼiik taje. Jech xtok, labal tajek sba chaʼiik kʼalal chakʼik venta ti mu jechuk chal Vivlia kʼuchaʼal chchanubtasvan epal relijionetike, ti ta jun noʼox la kʼakʼal ti yichʼoj 24 ora la spas Dios li vinajel, balumil xchiʼuk skotol li kʼusitik kuxajtike. Li Vivlia xtoke muʼyuk tskontrain li kʼusi chal sientifikoetik ta sventa ti kʼu xa sjalil slikel tal li vinajel o li balumile. *

Ta skoj ti muʼyuk jamal chal Vivlia kʼuxi lek la spas kuxlejal Dios liʼ ta balumile, xuʼ to xchanbeik skʼoplal li sientifikoetike. Li kʼusi jamal chal Vivliae jaʼ ti jaʼ Dios la spas skotol li kʼusitik kuxajtike xchiʼuk ti jeltos stsʼunbal la spase (Jenesis 1:11, 21, 24). Taje mu van koʼoluk xchiʼuk li kʼusi chalik jlom sientifikoetike, pe oy onoʼox kʼusitik staojik ta ilel ti jaʼ jech chal ek li Vivliae. Chjelilaj li chanubtasel chakʼik li sientifikoetike, jaʼuk li kʼusitik staojik xa ta ilele muʼyuk.

Ep buchʼutik mu skʼan xchanbeik skʼoplal Vivlia ta skoj li kʼusitik tspas li relijionetike, yuʼun chakʼik venta ti naka loʼlavanej tspasike, ti jaʼ noʼox tskʼan tspasik kanal takʼine xchiʼuk ti naka paskʼop yesike. Pe ¿mi sta˗o ti chopol chkiltik Vivlia ta skoj noʼox li kʼusitik tspasike? Ep buchʼutik tstunesik li chanubtasel ti ta kʼunkʼun kʼataj talel li kuxlejal sventa xilbajinik li buchʼutik yan˗o stsʼunbalike. ¿Mi sta˗o van ti chopol xa chkiltik li chanubtasel taje ta skoj noʼox li kʼusitik tspasike? ¿Mi mu jaʼuk lek ti baʼyuk jkʼelbetik sprevail li chanubtasele? Lek ti jaʼuk jech xichʼ pasel ta sventa li kʼusi chal li Vivlia eke.

Mi jech la apase, labal van sba chavil ti jelel kʼusi chakʼ ta chanel jech kʼuchaʼal chchanubtasvan epal relijionetike, yuʼun li Vivliae chal ti mu jtikʼ jbatik ta paskʼope xchiʼuk ti mu xijpʼajvane, moʼoj yuʼun chal ti skʼan jkʼantik li jchiʼiltaktike (Isaias 2:2˗4; Mateo 5:43, 44, 26:52). Li Vivliae muʼyuk chal ti skʼan jpʼajtik ta jech noʼox li chanubtaseletik yuʼun krixchanoetike, li kʼusi chale jaʼ ti skʼan oyuk lek sprevail li kʼusitik jchʼunojtik sventa lekuk xijtun ta stojolal Diose (Romanos 12:1; Ebreos 11:1). Jech xtok, tstij koʼontontik sventa jsabetik skʼoplal li kʼusitik labal sba ta jakʼbe jbatike.

Jech kʼu chaʼal liʼe, ¿mi oy xa ajakʼojbe aba kʼu yuʼun oy choplejal ta balumil mi oy Diose? Li Vivliae jamal chalbe smelolal taje xchiʼuk chalbe smelolal li yan kʼusitik ta jakʼbe jbatike. * Oy ta koʼontonkutik ti xa saʼ li kʼusi melele. Li Vivliae labal sba li kʼusitik chchapbe smelolale, kʼunik ta aʼibel smelolal xchiʼuk oy lek sprevailtak, taje jaʼ svinajeb ti oy buchʼu lek la spas li Vivliae.