Ti kʼusi tsnuptan jchanunetike
Li smaestra Pedroe jaʼ to laj yalbe skʼoplal li chanubtasel yuʼun Charles Darwin ti ta jech noʼox kʼataj talel li kuxlejale, laj yal ti toj lek li chanubtasel taje, yuʼun ep la kʼusitik laj yakʼbe xchan li sientifikoetike xchiʼuk laj la svikʼbe sat li krixchanoetike, vaʼun albatik ti akʼo yalik li kʼusi tsnopike.
Mu xa snaʼ kʼusi tspas li Pedroe, toj vokol chaʼi, yuʼun chanubtasbil yuʼun stot smeʼ ti jaʼ Dios la spas li balumile xchiʼuk skotol li kʼusitik oye, ti melel la kʼusi chal li Vivliae xchiʼuk ti jaʼ la jecheʼ chanubtasel ti ta jech noʼox kʼataj talel li kuxlejale. Pe oy srason yaʼeluk xtok li smaestrae, jaʼ yuʼun mu xa snaʼ bu junukal chchʼun.
Taje ta smilal xa noʼox jchanunetik jech tsnuptanik ta spʼejel balumil. ¿Kʼusi van xuʼ spasik? ¿Mi mu jechuk ti skʼan snopik bu junukal chchʼunike? Jech, jaʼ yuʼun skʼan xchanbeik skʼoplal kʼu yuʼun chalik ti ta jech noʼox kʼataj tal li kuxlejale o ti oy jun Jpasvaneje.
Li Vivliae chal ti skʼan mu jchʼuntik ta anil li kʼusitik chkichʼtik albele, xi tspʼijubtasutike: «Li buchʼu muʼyuk spʼijile chchʼun skotol li kʼusi ch˗albate, yan li buchʼu pʼije tsnop lek li kʼusi tspase» (Proverbios 14:15). Chal xtok ti skʼan jtunes lek jnopbentik sventa xkiltik mi melel li kʼusi chij˗albate (Romanos 12:1, 2).
¿Kʼu yuʼun laj yichʼ pasel li foyeto liʼe? Maʼuk sventa suj eskuelaetik sventa xchanubtasvanik ti oy jun Jpasvaneje, jaʼ noʼox chchanbe skʼoplal li sprevailtak yakʼojik li buchʼutik chalik ti ta jech noʼox lik tal li kuxlejale xchiʼuk ti chalik ti jecheʼ loʼil noʼox la li kʼusi chal Vivliae.
Jaʼ chkalbetik skʼoplal li selulae, ti jaʼ kuxulutik˗o yuʼune. Ta jkʼeltik kʼu yelan labal sba pasbil li selulae xchiʼuk ta jchanbetik skʼoplal li sprevailtak yuʼunik li buchʼutik chalik ti ta jech noʼox kʼataj tal li kuxlejale.
Xi onoʼox ta jnoptik bakʼintike: ¿Mi oy van jun jpasvanej kuʼuntik? O mi ta jech noʼox lij˗ayan tal? Yikʼaluk van achanoj be xa skʼoplal, pe li foyeto liʼe chakʼbe sprevailtak kʼu yuʼun oy ep buchʼutik xchʼunojik ti oy jun Jpasvaneje.
