Koltao li buchʼutik chaʼibot sventa xakʼik venta ti kʼu yelanike. Oyuk kʼusitik lek xajakʼ sventa xakʼik venta li kʼusi oy ta yoʼontonike.

Akʼo oyuk kʼusi lek xtijbat yoʼontonik. Akʼo snopik avuʼun ti kʼu yuʼun tspasik li lekil abtelale. Koltao li buchʼutik chaʼibot sventa jaʼuk spasik li kʼusi leke: ta skoj ti skʼanojik li Jeovae, li xchiʼiltakike xchiʼuk li chanubtaseletik ta Vivliae. Rasonajan xchiʼuk li buchʼutik chaʼibot sventa mu snopik ti jaʼ noʼox te xavulvun ta yalel mantale. Kʼalal mi laj xa ox aval li mantale, skʼan me mu chopoluk xaʼi sbaik avuʼun, yuʼun skʼan ti akʼo lek xtijbat yoʼontonik ta spasel ti bu kʼalal xuʼ yuʼunike.

Jaʼ mas albo skʼoplal li Jeovae. Albo skʼoplal ti jaʼ tskoltautik li chanubtaseletik, li beiltaseletik xchiʼuk li mantaletik ta Vivlia sventa jnaʼtik ti skʼanojutik li Diose xchiʼuk ti xkojtikintik-oe. Koltao li buchʼutik chaʼibot sventa stsakik ta venta ti kʼu yelan chaʼi sba li Jeovae xchiʼuk ti jaʼ spasik li kʼusi lek chile.