Tuneso skʼelobiltak ti kʼunik ta aʼiele. Chanbo stalelal li Jesuse, tuneso li kʼusitik bikʼitik sventa xavalbe smelolal li kʼusitik mukʼtike, jech xtok, alo li kʼusitik kʼunik ta aʼiel sventa xachapbe smelolal li kʼusitik vokol ta aʼiele. Mu persauk xaval li kʼusi mu xa xichʼ aʼibel-o smelolal li ta skʼelobil chatunese. Kʼelo lek mi snitbe sba skʼoplal li skʼelobil chatunes xchiʼuk li kʼusi chakʼan chavakʼ ta chanel sventa mu yanuk-o kʼusi xtal ta snopbenike.

Nopo ta sventa li buchʼu chchikintabote. Tuneso skʼelobiltak ti xkoʼolaj xchiʼuk li kʼusi nopem xaʼiik spasel jujun kʼakʼale o jaʼ xatunes li kʼusi oy ta yoʼonton chaʼiike. Kʼelo lek ti mu buchʼu xkʼexav avuʼune o ti chopol xaʼi sbae.

Albo smelolal li kʼusitik tsots skʼoplal chakʼan chavakʼ ta chanele. Tuneso skʼelobiltak sventa xavalbe smelolal li kʼusi mas tsots skʼoplale maʼuk li kʼusi muʼyuk tsots skʼoplale. Kʼelo lek ti akʼo xkom ta sjolik li kʼusi chakʼan chavakʼ ta chanele ti mu jaʼuk noʼox xkom ta sjolik li skʼelobil la atunese.