«Jchanubtasvanejoxuk xa jechuk» li voʼoxuke (Evr. 5:12). ¡Jnoptik noʼox avaʼi! Li Jeova ti jaʼ li mas lekil Jchanubtasvanej ta spʼejel vinajelbalumile chalbutik ti akʼo jchanubtastik yantik ta sventa li kʼusitik jnaʼojtik ta stojolale. Jaʼ jun mukʼta matanal jtaojtik xchiʼuk jaʼ jun abtelal ti toj tsots skʼoplal ti chkakʼtik ta chanel li kʼusi melel ta sventa Jeova ta stojolal kutsʼ kalaltik, ta tsobobbail o li ta cholmantale. Pe ¿kʼuxi xuʼ xijkʼot ta lekil jchanubtasvanej?

Te ta jtabetik stakʼobil li kʼusi laj yalbe Timoteo li jtakbol Pabloe: «Akʼo-o me ta avoʼonton li skʼelel chʼul tsʼibetik ta stojolal krixchanoetike, akʼo-o me ta avoʼonton li tojobtasvaneje xchiʼuk li chanubtasvaneje». Xi to laj yale: «Mi jech chapase ta me xakol xchiʼuk ta me xkolik ek li buchʼutik chchikintabote» (1 Tim. 4:13, 16). Chakʼ kuxlejal li lekil aʼyej chkaltik batele. Jaʼ yuʼun toj tsots skʼoplal ti xkakʼtik persa ti lekuk jchantik skʼelel li vune xchiʼuk ti xijtojobuk ta chanubtasvaneje. Li ta foyeto liʼe jaʼ me tskoltaot yoʼ spas avuʼune. Jkʼeltik batel li kʼusitik yichʼoje.

Li Jeovae jaʼ li Mukʼta Jchanubtasvaneje (Is. 30:20). Jaʼ yuʼun li foyeto liʼe jaʼ tskoltaot yoʼ xlekub batel ti kʼu yelan chakʼel li vune xchiʼuk ti kʼu yelan chachanubtasvane. Pe mu me xchʼay xavaʼi ti jaʼ te likem tal ta stojolal Jeova li aʼyej chkaltike xchiʼuk ti jaʼ Stuk chikʼ tal li krixchanoetike (Juan 6:44). Kʼanilanbo-o me xchʼul espiritu li Jeovae. Tuneso skotol kʼakʼal li Vivliae. Jaʼuk me xavalbe-o skʼoplal li Jeovae maʼuk xavalbe aba akʼoplal atuk. Akʼo persa ti xlik skʼan ta sjunul yoʼonton Jeova li buchʼutik chchikintabote.

Li Diose la stʼujot sventa xaval batel li jun aʼyej ti mas tsots skʼoplal ti muʼyuk jech albil-o ta spʼejel balumile. Jnaʼojkutik ti tspas avuʼunik mi jaʼ la apat-o avoʼontonik ta stojolal li Dios ti jaʼ chakʼ avipalike (1 Ped. 4:11).

Li achiʼiltakik ta chanubtasvaneje,

Li Jtsop Jbeiltasvanej yuʼun li Stestigotak Jeovae