Ta mas tsʼakale, jaʼ och ta ajvalil ta Babilonia li Belsasare. Jun akʼobale la spas jun mukʼta veʼel, laj yikʼ ta veʼel jmil krixchanoetik. Jaʼik li buchʼutik mas tsots skʼoplalik ta sjunul lume. Laj yalbe yajtuneltak ti akʼo slokʼesik tal li vasoetik pasbil ta oro ti yichʼoj lokʼel ta stemplo Jeova li Nabukodonosore. Li vasoetik taje jaʼ la stunesik sventa x-uchʼbolajik li Belsasar xchiʼuk li buchʼutik laj yikʼ ta veʼele xchiʼuk lik smuyubtaik li sdiosike. Ta anil noʼox lik vinajuk skʼob jun vinik, vaʼun oy kʼusi lik stsʼiba li ta yibel na o kʼalna ti bu tsobol chveʼike, la stsʼiba jaypʼel kʼop ti mu xojtikinike.

Xiʼ tajek li Belsasare. La stak ta ikʼel li buchʼutik tspasik majiae xchiʼuk xi laj yalbee: «Li buchʼu xuʼ yuʼun xalbun smelolal li kʼusitik tsʼibabil liʼe ta jvaʼan ta yoxibal ajvalil ta sjunul li Babiloniae». Jaʼ yuʼun laj yakʼik persa sventa xalbeik smelolal, pe muʼyuk buchʼu x-al yuʼun. Vaʼun xi kʼot yal li meʼ ajvalile: «Oy jun vinik ti Daniel sbie laj yalbe smelolal xvayichtak li Nabukodonosore. Jaʼ xuʼ xalbot smelolal li kʼusitik tsʼibabil liʼe».

Bat skʼel ajvalil li Daniele. Kʼalal kʼote, xi albat yuʼun li ajvalile: «Mi xkʼel avuʼun xchiʼuk mi xuʼ avuʼun yalbel smelolal li kʼusitik tsʼibabil liʼe, chkakʼbot jun natsʼil pasbil ta oro xchiʼuk ta jvaʼanot ta yoxibal ajvalil ta sjunul li Babiloniae». Xi la stakʼ li Daniele: «Mu jkʼan matanaletik. Pe chkalbot avaʼi smelolal li kʼusitik tsʼibabil liʼe. Li atot Nabukodonosore toj toyba echʼ, vaʼun bikʼtajesbat skʼoplal yuʼun li Jeovae. Anaʼoj xa onoʼox skotol li kʼusi kʼot ta stojolale, akʼo mi jech, muʼyuk xavichʼ ta mukʼ li Jeovae. La atunes sventa chavuchʼ-o vino li vasoetik pasbil ta oro ti te toʼox oy ta stemploe. Jaʼ yuʼun xi la stsʼibabot li Diose: MENE, MENE, TEKEL xchiʼuk PARSIN. Taje jaʼ skʼan xal ti tstsalik Babilonia li jmediaetik xchiʼuk jpersiaetike, vaʼun maʼuk xa ajvalil chakom».

Muʼyuk buchʼu xuʼ stsal yileluk li Babiloniae. Lek  joyibtabil ta tsatsal muro xchiʼuk joyol ta mukʼta ukʼum. Pe li vaʼ akʼobale tal stsakik ta kʼop Babilonia li jmediaetik xchiʼuk jpersiaetike. Li ajvalil Siro ta Persiae la skʼejbe yok li ukʼume, taje jaʼ sventa xkʼotik ta stiʼ jteklum li yajsoltarotake. Kʼalal kʼotike, ¡jaʼ to yilike jamal li stiʼ jteklume! Li soltaroetike ta anil noʼox lik tsakvanikuk ta kʼop, vaʼun la stsalik li jteklume xchiʼuk la smilik li ajvalile. Jech oxal jaʼ xa och ta ajvalil ta Babilonia li Siroe.

Kʼalal jun toʼox jabil yochel ta ajvalil li Siroe, xi laj yal mantale: «Laj yalbun Jeova ti jchaʼvaʼanbe li stemplo ta Jerusalene. mi oy junuk juda ti chbat koltavanuk yaʼie, xuʼ xbat». Jaʼ yuʼun ep judaetik sut batel ta slumalik kʼalal lokʼem xa ox 70 jabil ti laj yichʼ lajesel li Jerusalene. Jech kʼot ta pasel li kʼusi yaloj Jeovae. Jech xtok, li Siroe laj yakʼ sutel li vasoetik pasbil ta oro xchiʼuk ta platae xchiʼuk li yan kʼusitik yichʼoj lokʼel ta templo li Nabukodonosore. ¿Mi laj avakʼ venta ti la stunes Siro sventa tskolta steklumal li Jeovae?