Li ta jvokʼ xchanobil liʼe ta jchanbetik batel skʼoplal ta sventa li Tsʼibetik ta Griego Kʼop ti chalbe skʼoplal Kristoe, ta jkʼeltik ti te vokʼ Jesus ta jun utsʼ alalil ti muʼyuk lek stakʼinike, te nakiik ta jun jteklum xchiʼuk la xchiʼin ta abtel ta karpinteroal li stote. Li Jesuse jaʼ jpojvanej chkʼot ta stojolal li krixchanoetike, jaʼ li buchʼu stʼujoj Jeova yoʼ xkʼot ta Ajvalil li ta Ajvalilal ta vinajele. Mi oy avalab anichʼnabe koltao ta yaʼibel smelolal ti Jeovae la stʼuj jun lekil utsʼ alalil yoʼ xkʼotik ta stot smeʼ Jesus xchiʼuk sventa lekuk tsʼitesike. Xchiʼuk albo kʼu yelan chabiat yuʼun Jeova li Jesus kʼalal chichʼ xa ox milel yuʼun li Erodese. Akʼbeik snaʼik xtok ti persa chkʼot ta pasel yuʼun Jeova li kʼusitik yaloj tspase akʼo mi oy kʼusitik chmakvan. Jech xtok, chanubtasik ti jaʼ laj  yichʼ tʼujel yuʼun Jeova li Juan sventa xchapanbe sbe li Jesuse. Yuʼun li Jesuse ta sbikʼtal onoʼox laj yakʼ ta ilel ti lek chilbe li spʼijil Jeovae xchiʼuk ti jaʼ spatoj yoʼonton ta stojolale.