Li Mariae jaʼ jun tojol tseb ti te nakal ta Nasaret ta jun bikʼit lum ta Galileae xchiʼuk jaʼ yutsʼ yalal sbaik xchiʼuk li Elisabete. Li Mariae chnupun xchiʼuk jun karpintero ti Jose sbie. Kʼalal oy xa ox ta vakib u xchiʼinoj yol li Elisabete, li anjel Gabriele jaʼo laj yakʼ sba ta ilel ta stojolal li Mariae, xi laj yalbee: «Liʼote Maria, lek ilbilot yuʼun li Jeovae». Pe li Mariae muʼyuk laj yaʼibe smelolal li kʼusi albate. Jaʼ yuʼun xi laj yal li anjel Gabriele: «Ta xachiʼin avol yuʼun chavokʼes jun kerem, Jesus chavakʼbe sbi, ta xkʼot ta ajvalil xchiʼuk muʼyuk bu chlaj skʼoplal li Ajvalilal yuʼune».

Xi la stakʼ li Mariae: «Pe chʼabal to jmalal, ¿kʼuxi xa noʼox ti ta xkil jun kole?». Xi laj yal li anjel Gabriele: «Li Jeova xuʼ yuʼun spasel skotol, chtal ta atojolal li xchʼul espiritue jech chlik achiʼin avol ek. Yuʼun li avutsʼ avalal Elisabete xchiʼinoj xa yol». Jaʼ yuʼun xi la stakʼ li Mariae: «Jaʼ smosoun li Jeovae akʼo kʼotuk ta pasel li kʼusi yaloj tspas ta jtojole».

 Li Mariae bat svulaʼan li Elisabet ti te nakal ta jun vitse, kʼalal kʼot kʼoponatuk yuʼun Maria li Elisabete laj yaʼi bakʼ ta xchʼut li yole vaʼun ventainat yuʼun li xchʼul espiritu Jeovae, jaʼ yuʼun xi laj yalbe li Mariae: «Maria laj xa yakʼbot bendision li Jeovae. Jaʼ jun mukʼta matanal chkaʼi ti chtal avulaʼanune». Xi la stakʼ li Mariae: «Ta xkichʼ ta mukʼ ta sjunul koʼonton li Jeovae». Vaʼun li Mariae te kom xchiʼin Elisabet oxibuk u, ta tsʼakale sut batel ta Nasaret ti jaʼ te nakale.

Kʼalal laj yaʼi Jose ti xchiʼinoj xa yol li Mariae mu xa ox skʼan xnupun xchiʼuk. Ta skoj taje, laj yakʼ sba ta ilel jun anjel ta xvayich li Josee xchiʼuk xi albate: «Mu xaxiʼ ta yikʼel li Mariae. Yuʼun muʼyuk kʼusi chopol spasoj». Jaʼ yuʼun li Josee nupun xchiʼuk li Mariae, vaʼun laj yikʼ batel ta sna.