Te nakalik ta Nasaret li Jesus, stot smeʼ xchiʼuk li xchiʼiltak ta vokʼele. Li Josee ch-abtej ta karpintero sventa smakʼlintas li yutsʼ yalale. Pe maʼuk noʼox yuʼun chchanubtas ta Smantaltak Jeova li yutsʼ yalale. Skotolik nopem xaʼiik ti chbatik li ta snail tsobobbail yoʼ smuyubtaik li Diose xchiʼuk chbatik jujun jabil ta Jerusalen yoʼ spasik li kʼin Koltaele.

Kʼalal 12 xa ox sjabilal li Jesuse nat xanavik batel xchiʼuk yutsʼ yalal yoʼ xbatik ta Jerusalen jech kʼuchaʼal nopem onoʼox xaʼiike. Epal krixchanoetik kʼotik li ta Jerusalen sventa spasik li kʼin Koltaele. Kʼalal laj xa ox li kʼine, chaʼsutik ta snaik li Jose xchiʼuk Mariae. Vaʼun la snopik ti tey batem Jesus xchiʼuk li xchiʼiltak ta vokʼele. Pe kʼalal la saʼike muʼyuk la staik.

Jaʼ yuʼun chaʼsutik yan velta ta Jerusalen li Maria xchiʼuk Josee, oxib kʼakʼal la saʼik li Jesuse vaʼun te la staik ta yut li temploe. Te chotol la staik ta oʼlol ti bu oyik li jchanubtasvanejetike yuʼun yakal chchikinta li kʼusi chalike xchiʼuk oy kʼusitik tsjakʼ ti tsotsik ta takʼele.  Li jchanubtasvanejetike solel toj labal to sba chaʼiik li kʼusi chal li Jesuse, vaʼun oy kʼusi lik sjakʼik. Chʼayal to kʼot yoʼontonik ti kʼu yelan la stakʼ li Jesuse. Vaʼun laj yakʼik venta ti xaʼibe smelolal li Smantaltak Jeovae.

Li Jose xchiʼuk Mariae chat tajek yoʼontonik, jaʼ yuʼun xi laj yalbe Jesus li Mariae: «Kuni kerem solel laj xa jsaʼotkutik tajek xchiʼuk li atote. ¿Bu toʼox oyot chaʼa?». Vaʼun xi la stakʼ li Jesuse: «¿Mi mu xanaʼik ti skʼan liʼ oyun ta sna li Jtot Jeovae?».

Vaʼun li Jesuse sut batel xchiʼuk stot smeʼ li ta Nasarete. Vaʼun chanubtasat yuʼun stot ta karpinteroal. Ta tsʼakale chʼi xchiʼuk pʼijub batel li Jesuse. Jaʼ yuʼun lek kʼanbil yuʼun Jeova xchiʼuk li krixchanoetike. Pe, ¿kʼu toʼox van yelan xanaʼ kʼalal bikʼit toʼoxe?