Kʼalal te van jun jabil xchiʼuk oʼlol slikesoj cholmantal li Jesuse, oy kʼusi tsots skʼoplal skʼan spas. Yuʼun skʼan stʼuj buchʼutik ta xkoltaat li ta abtele xchiʼuk yoʼ xkoltaat ta sbeiltasel li tsobobbaile. Pe, ¿buchʼutik chichʼik tʼujel yuʼun li Jesuse? Kʼalal skʼan toʼox stʼuj li yajtakboltake baʼyel la skʼanbe koltael li Jeovae, vaʼun muy ta jun vits yoʼ stukuk te oye xchiʼuk sjunul akʼobal la skʼopon li Jeovae. Ta sob yokʼomale, la stsob li jlom yajchankʼoptak vaʼun la stʼuj li 12 yajtakboltake. ¿Mi xanabe sbi ta jujuntal? Li sbiike jaʼ Pedro, Andres, Santiago, Juan, Felipe, Bartolome, Tomas, Mateo, Santiago xnichʼon Alfeo, Tadeo, Simon xchiʼuk Judas Iskariote.

Buyuk noʼox xbat li Jesuse te xchiʼinat batel yuʼun li 12 yajtakboltake. Vaʼun la xchanubtasan ta xcholel li mantale, pe ta tsʼakale la stak batel stukik ta cholmantal. Pe maʼuk noʼox yuʼun akʼbat sjuʼelik yuʼun Jeova li jtakboletik yoʼ slokʼesik pukujetik xchiʼuk ti xpoxtavanike.

Li Jesuse la spat yoʼonton ta stojolal li 12 yajtakboltake yuʼun laj yil kʼuchaʼal yamigotak. Yan li jfariseoetike la snopik ti muʼyuk tsotsik  skʼoplal li jtakboletike xchiʼuk ti mu kʼusi snaʼike. Pe li Jesuse mu jechuk laj yil, yuʼun la xchanubtasan lek yoʼ spas yuʼunik li abtelal tspasike. Jech xtok, te chchiʼinik Jesus kʼalal oy kʼusi tsotsik skʼoplal chkʼot ta stojolale. Yuʼun te la xchiʼinik-o jaʼ to ti kʼuxi chame xchiʼuk kʼalal mi chaʼkuxie. Jutuk mu skotoluk li jtakboletike likemik ta Galilea ti jaʼ te likem ek li Jesuse xchiʼuk junantike oy xa yajnilik.

Jaʼik jmulavil krixchanoetik ek li jtakboletike. Jaʼ yuʼun bakʼintike oy kʼusitik chalik ti muʼyuk bu tsnopik baʼyuke, bakʼintik xtoke chopol kʼusi chkʼot ta nopel yuʼunik, chʼabal smalael yuʼunik xchiʼuk chut sbaik ta skoj ti tskʼanik ti oyuk buchʼu mukʼ skʼoplal yuʼunike. Akʼo mi jech skʼanojik li Jeovae. Xchiʼuk kʼalal chʼabal xa liʼ oy li Jesuse jaʼ chkoltavanik ta skʼelel tsobobbail li jtakboletike.