Li Jesus xchiʼuk yajchankʼoptake sutik batel ta Galilea kʼalal laj xa ox li kʼin Koltaele. Te echʼik batel ta Samaria vaʼun te pajik ta sposo Jakob ti nopol xil li jteklum Sikare. Li Jesuse te kom xkux, yan li yajchankʼoptake bat smanik tal veʼlil.

Vaʼun te kʼot slup yaʼal jun ants li ta posoe. Xi albat yuʼun li Jesuse: «Akʼbun jutebuk avaʼal». Pe xi laj yal li jsamaria antse: «¿Kʼu yuʼun ti chakʼoponune? Yuʼun mu lekuk xil sbaik xchiʼuk jsamariaetik li judaetike». Xi la stakʼ li Jesuse: «Ti xanaʼuk buchʼuune la akʼanbun voʼ ti jechuke, vaʼun kuxul voʼ laj kakʼbot ti jechuke». Vaʼun xi la sjakʼ li antse: «¿Kʼusi chakʼan chaval taje? Yuʼun muʼyuk slupobil avuʼun». Pe xi la stakʼ li Jesuse: «Li buchʼu chuchʼ li voʼ chkakʼbee mi jaʼuk bu ch-akʼbat takitiʼil yan velta». Vaʼun xi laj yal li antse: «Kajval akʼbun li voʼ taje».

Li Jesuse xi laj yalbe li antse: «Batan, bat ikʼo tal li amalale». Pe xi la stakʼe: «Chʼabal jmalal». Vaʼun xi laj yal li Jesuse: «Melel xaval, yuʼun li voʼote svoʼobal xa amalal echʼem, vaʼun li vinik ti achiʼinoj ta naklej avie maʼuk amalal. Jech oxal, melel li kʼusi laj avale». Jaʼ yuʼun xi laj yal li antse: «Chkakʼ venta ti j-alkʼopote. Li ta jlumale chalik ti skʼan xkichʼkutik ta mukʼ Dios li ta vits liʼe, pe li judioetike chalik ti skʼan xkichʼtik ta mukʼ Dios leʼ ta Jerusalene. Pe li voʼone jnaʼoj ti chtal li Mesiase, vaʼun jaʼ chalbunkutik kʼuxi ta ichʼel ta mukʼ li Diose». Jaʼ yuʼun li Jesuse oy kʼusi laj yalbe ti muʼyuk buchʼu yalojbee, yuʼun xi laj yalbe: «Voʼon li Mesiase».

Vaʼun li antse xi bat yalbe ta anil li jnaklejetik ta Samariae: «¡Laʼik!  Laʼ kʼelo avilik yuʼun yikʼaluk laj xa jta li Mesiase. Yuʼun laj yalbun skotol ti kʼu yelan li jkuxlejale». Jaʼ yuʼun li jnaklejetike bat xchiʼinik li antse, vaʼun la xchikintaik li kʼusi chakʼ ta chanel li Jesuse.

Li jsamariaetike laj yalbeik Jesus ti akʼo te xkome. Jaʼ yuʼun te kom chib kʼakʼal li Jesuse xchiʼuk ep kʼusitik laj yakʼ ta chanel. Ep buchʼutik laj yakʼ xchʼunel yoʼontonik ta stojolal. Jaʼ yuʼun xi laj yalbeik li jsamaria antse: «Laj xa kaʼikutik li kʼusi chale xchiʼuk jnaʼojkutik ta melel ti jaʼ jkoltavanej yuʼun li krixchanoetike».