Skotol li kʼusi tspasik li jfariseoetike jaʼ sventa lekuk x-ilatik xchiʼuk yoʼ lekuk skʼoplalik ta stojolal li krixchanoetike. Yoʼ x-ilatike jaʼ tey tspasik orasion yoʼ bu oy epal krixchanoetike, skomtsan ta sjolik orasionetik ti jalik tajeke, vaʼun chchaʼalilanik ta snail tsobobbailetik o ta kayeetik sventa xaʼiik li krixchanoetike. Jaʼ yuʼun toj labal sba laj yaʼiik li krixchanoetik kʼalal xi laj yal li Jesuse: «Kʼalal chapasik orasione, mu me jechuk xapasik kʼuchaʼal tspasik li jfariseoetike. Yuʼun tsnopik ti jaʼ to ch-aʼibatik yuʼun Dios mi jal tajek tspasik orasione, pe taje mu meleluk. Jaʼ yuʼun kʼalal chapas orasione mu persauk xaʼi li yantike yuʼun jaʼ noʼox voʼot xanaʼ xchiʼuk li Jeovae. Jech xtok mu jaʼuk xachaʼalilan li kʼusi avaloj xae. Yuʼun li Jeovae tskʼan ti jaʼuk xavalbe kʼu yelan chavaʼi aba ta melele».

 Li Jesuse xi to laj yalbe skʼoplal ta sventa ti kʼu yelan ta pasel li orasione: «Jtotik ta vinajel, akʼo yichʼ chʼultajesel li abie. Akʼo taluk li Ajvalilal avuʼune, akʼo kʼotuk ta pasel avuʼun li kʼusi tskʼan avoʼonton ta sba balumil jech kʼuchaʼal ta vinajele». Pe maʼuk noʼox taje, yuʼun xuʼ jkʼanbetik ta orasion ti akʼo yakʼ jveʼeltik jujun kʼakʼale, ti akʼo spasbutik perton li jmultike xchiʼuk yan kʼusitik ti chtun ta jkuxlejaltike.

Xi laj yal xtoke: «Mu xavikta aba ta spasel orasion, kʼanilanbo li kʼusitik lekik li Atot ta vinajele, ti jaʼ li Jeovae. Yuʼun skotol li totiletike oy ta yoʼonton chakʼbeik xnichʼnabik li kʼusitik lekike. Ti mi skʼanbot pan li anichʼone, ¿mi ton van chavakʼbe? Ati mi skʼanbot choye, ¿mi chon van chavakʼbe?».

Li Jesuse laj to yalbe skʼoplal li kʼusitik chakʼ jchantik taje, yuʼun xi laj yale: «Mi lek li matanaletik xanaʼ xavakʼbeik li anichʼnabike, ¡buuk xa jech tspas li Jtotik te oy ta vinajele, yuʼun chakʼbutik li xchʼul espiritue! Li kʼusi skʼan xapase jaʼ ti xakʼanbee». ¿Mi chapas li kʼusi laj yal li Jesuse? ¿Kʼusi chakʼanbe ta orasion li Jeovae?