Li Juane xi la xcholbe skʼoplal li Mesiase: «Oy jun vinik ti te xtal ta jpat ti jaʼ jbabe kuʼune xchiʼuk ti jutuk xa skʼan xtale». Kʼalal te van 30 xa ox sjabilal li Jesuse, lik batel ta Galilea vaʼun bat li ta ukʼum Jordane. Kʼalal kʼote, laj yil ti yakal chakʼbe yichʼik voʼ krixchanoetik li Juane. Vaʼun li Jesuse laj yalbe Juan ti akʼo akʼbatuk yichʼ voʼ eke, pe xi la stakʼ li Juane: «Voʼon chavakʼbun kichʼ voʼ ti jechuke, mu smeloluk ti voʼon chkakʼbot ichʼvoʼe». Xi la stakʼ li Jesuse: «Li Jeovae laj yalbun ti voʼot chavakʼbun kichʼ voʼe». Jaʼ yuʼun ochik batel li ta ukʼum Jordane, vaʼun li Juane la smuk ta voʼ sjunul li Jesuse.

Kʼalal lokʼ ta ukʼum Jordan li Jesuse la skʼopon li Jeovae, vaʼun laj yil jam li vinajele xchiʼuk laj yil yal tal li xchʼul espiritu Dios ti xkoʼolaj kʼuchaʼal palomae. Vaʼun xi laj yal tal li Jeovae: «Voʼot Jnichʼonot ti jkʼanojot tajeke, ximuyubaj avuʼun».

Li Jesuse laj yichʼ li xchʼul espiritu Jeovae, vaʼun jaʼo kʼot ta Mesias o Kristo. Jaʼo te la slikes li abtelal akʼbat spas yuʼun Jeova liʼ ta balumile.

Kʼalal laj xa ox yichʼ voʼ li Jesuse bat 40 kʼakʼal li ta takixokol balumile. Vaʼun kʼalal sut xa ox talele ay skʼopon li Juane, kʼalal laj yil Juan ti yantik xnopaj talel li Jesuse, xi laj yale: «¡Kʼelo avil, li Xchʼiom Chij Dios ti chchʼay mulil ta balumile!». Ti jech la spase jaʼ sventa tskolta krixchanoetik yoʼ xakʼik venta ti jaʼ Mesias li Jesuse. ¿Mi xanaʼ kʼusi la snuptan Jesus kʼalal te oy li ta takixokol balumile? Jkʼeltik batel.