Li Jesuse tal ta balumil yoʼ xcholbe skʼoplal li lekil aʼyejetik ta sventa li Ajvalilal yuʼun Diose. Jech xtok li Jeovae laj yakʼbe xchʼul espiritu sventa spas skʼelobiltak juʼelal yoʼ xakʼ ta ilel li kʼusi tspas mi och ta Ajvalile. Li Jesuse xpoxtaj yuʼun kʼusuk chamelal. Jaʼ yuʼun li buchʼutik ipike tskʼanbeik vokol Jesus yoʼ xpoxtaatike. La sjambe sat li maʼsatetike, la sjambe xchikin li pakʼchikinetike xchiʼuk lik xanavuk yuʼun li buchʼutik mu xanavike. Yuʼun akʼo mi jaʼ noʼox tspikbeik stsitsumal skʼuʼ li Jesuse xuʼ xpoxtajik-o pe maʼuk noʼox, yuʼun la snuts lokʼel pukujetik xtok. Tstsʼakliat batel yuʼun krixchanoetik li Jesus ti buyuk noʼox chbate, pe muʼyuk bu la spʼaj li krixchanoetike akʼo mi tskʼan xa yaʼi ti stukuk xa oye.

Jun veltae, ikʼbat tal ta stojolal Jesus jun vinik ti alubem sbekʼtale. Pe ta skoj ti noj tajek ta krixchanoetik li nae, mu xjelavik batel ti bu oy li Jesuse, jaʼ yuʼun la sjombeik sjol li na ti bu stukʼil oy li Jesuse vaʼun la xchechik yalel xchiʼuk svayeb li vinik ti alubem sbekʼtale. Vaʼun li Jesuse xi laj yalbe li vinike: «Vaʼlan xchiʼuk xanavan». Toj chʼayal to kʼot yoʼonton li krixchanoetik kʼalal laj yilik ti lik xanavuk li vinike.

Ta yan kʼakʼal kʼalal chkʼot xa ox ta jun jteklum li Jesuse, xi tsots laj yalik lajuneb viniketik ti ipik ta kʼaʼemal chamele: «¡Jesus koltaunkutik!». Li vaʼ kʼakʼale mu xuʼ xnopajik ta stojolal krixchanoetik li buchʼutik ipik ta kʼaʼemal chamele. Jech xtok li ta Mantal yaloj Jeovae chal ti skʼan xbatik ta templo mi poxtajik xa ox li  buchʼutik ipik ta kʼaʼemal chamele. Jaʼ yuʼun li Jesuse laj yalbe ti akʼo te xbatike. Vaʼun kʼalal yakal chanavik batel yoʼ xbatik ta templo li viniketike, poxtaj li xchamelike. Vaʼun jaʼ noʼox jun sut stojbe ta vokol Jesus xchiʼuk lik yichʼ ta mukʼ li Diose.

Oy jun ants ti oy xa ta 12 jabil yipajele xchiʼuk tskʼan ti akʼo xa xpoxtaje, yuʼun mu xa xkuch chaʼi li xchamele. Jaʼ yuʼun nopaj batel ta spat epal krixchanoetik yoʼ spikbe skʼuʼ li Jesuse. Vaʼun kʼalal la spike kol li xchamele. Pe xi la sjakʼ li Jesuse: «¿Buchʼu la spikbun li jkʼuʼe?». Akʼo mi xiʼem tajek li antse laj yalbe Jesus ti kʼu yuʼun jech la spase. Vaʼun li Jesuse la spatbe yoʼonton xchiʼuk xi laj yalbee: «Jtseb junuk avoʼonton batan».

Jech xtok oy jun bankilal jpas mantal ti Jairo sbie, xi ay skʼanbe vokol li Jesuse: «Avokoluk batik li ta jnae yuʼun toj ip li jtsebe». Pe kʼalal muʼyuk to bu chkʼot ta sna Jairo li Jesuse cham li tsebe. Kʼalal kʼot li Jesuse laj yil ti yakal ch-okʼik skotol yutsʼ yalal li tsebe. Jaʼ yuʼun xi laj yale: «Mu xa okʼik yuʼun jaʼ noʼox chvay». Vaʼun li Jesuse la stsakbe skʼob li tsebe xchiʼuk xi laj yalbee: «Tseb ¡Likan!». Ta ora noʼox lik li uni tsebe, vaʼun li Jesuse laj yalbe li totil meʼil ti akʼo xakʼbeik sveʼele. ¡Nopo xa noʼox avaʼi ti kʼu yelan laj yaʼi sbaik stot smeʼ li tsebe!